Oti, Faaleagaga
O le oti faaleagaga o le tuliesea lea mai le afioaga o le Atua. Ua aoao mai e tusitusiga paia ni faapogai o oti faaleagaga e lua. O le faapogai muamua o le Pau, ma le lona lua o lo tatou lava lē usiusitai.
Na aoao mai le perofeta o le Tusi a Mamona o Samuelu e faapea, “Aua ua pei ua oti tagata uma lava i mea faalelalolagi atoa ma mea faalelagi” (Helamana 14:16). I le taimi o lo tatou olaga i lenei fogaeleele, ua tuueseina i tatou mai le afioaga o le Atua. O le Togiola, ua faaolaina ai e Iesu Keriso tagata uma mai le oti faaleagaga. Na molimau mai Samuelu e ala i le Toetu o le Faaola, “e togiolaina tagata uma lava ai le uluai oti—o le oti faaleagaga lea—e togiolaina tagata uma i le toe tu mai o Keriso, ioe, o tagata uma lava, ma toe aumaia i latou i luma o le Atua“ (Helamana 14:16–17). Na aoao mai le perofeta o Liae ona o le Togiola, “e o mai tagata uma i le Atua, o lea latou te tutu mai ai i ona luma e faamasinoina e ia e tusa ma le upu moni ma le paia e i ai ia te ia” (2 Nifae 2:10).
O le isi oti faaleagaga e oo mai ona o lo tatou lava le usiusitai. O a tatou agasala ua le mama ai i tatou ma lē mafai ai ona mau i le afioaga o le Atua (tagai Roma 3:23; Alema 12:12–16, 32; Helamana 14:18; Mose 6:57). O le Togiola, ua ofoina mai ai e Iesu Keriso le faaolataga mai le oti faaleagaga, ae seiloga lava tatou te faaaogaina le faatuatua ia te Ia, salamo i a tatou agasala, ma usiusitai i mataupu faavae ma sauniga o le Talalelei (tagai Alema 13:27–30; Helamana 14:19; Mataupu Faavae o le Faatuatua 1:3).