Le Atua le Tama
O le Atua le Tama o Le Silisili Ese o Ia ua tatou talitonu i ai ma tatou tapuai i ai. O Ia o le Foafoa Sili, o le Taitaiau, ma le Faaola o mea uma. O Ia e atoatoa, e i ai le mana uma, ma silafia mea uma. E ia te Ia “le tino o aano ma ivi e pei lava o le tagata“ (MFF 130:22).
O lo tatou Tama Faalelagi o se Atua o le faamasinoga ma le malosi ma le poto ma le mana, ae o Ia foi o se Atua o le alofa mutimutivale atoatoa, agalelei, ma le alofa. E ui lava ina tatou “le iloa le uiga o mea uma,“ e mafai ona tatou maua le filemu i le iloa moni e alofa o Ia ia i tatou (tagai 1 Nifae 11:17).
O Le Tama o o Tatou Agaga
O se tasi o fesili taua o le olaga o le “O ai Au?” O se pese matagofie a le Peraimeri e fesoasoani e oo lava i tamaiti e tali lenei fesili. Tatou te pepese, “O au o se atalii o le Atua, ua na auina mai au nei.“ O le iloa o i tatou o fanau a le Atua e aumaia le malosi, faamafanafanaga, ma le faamoemoe.
O oe o se atalii/afafine moni o le Atua, na fanauina faaleagaga i le muai olaga. I le avea ai ma Ona atalii/afafine, e mafai ona faamautinoaina o loo ia te oe ni mana paia faavavau ma o le a Ia fesoasoani ia te oe i au taumafaiga faamaoni e ausia na mana.
O Le Foafoa Silisiliese
O le Tama Faalelagi o le Foafoa Silisiliese. E ala ia Iesu Keriso, na Ia foafoaina ai le lagi ma le lalolagi ma mea uma o i ai (tagai Mose 2:1). Na faapea mai Alema, “Ua faailoaina mai i mea uma e i ai le Atua; ioe, o le lalolagi, ma mea uma i luga o le fogaeleele, ioe, ma lona faataamilomilo, atoa ma fetu o loo taamilo i o latou ala, ua molimau e i ai le Foafoa Silisiliese na faia mea uma” (Alema 30:44).
Mai lea taimi i lea taimi, manatunatu loloto i le matagofie o le foafoaga: laau, fugalaau, manu, mauga, galu o le sami, o se tamaitiiti faatoa fanau mai. Ia faaavanoa se taimi e mata’i ai le lagi, lea e i ai taamilosaga a fetu ma paneta o ni faamaoniga ia “o le Atua o loo galue i lona mamalu sili ma le mana“ (tagai MFF 88:41–47).
O Le Mataisau o le Ata o le Faaolataga
E finagalo lo Tatou Tama i le Lagi ia i tatou e mau faatasi ma Ia e faavavau. O Lana galuega ma le mamalu “ia faataunuuina le faaofuina o le tagata i le tino ola pea ma le ola faavavau“ (Mose 1:39). Ina ia faataunuuina lenei mea, na Ia saunia ai le ata o le faaolataga. Na Ia auina mai Lona Alo Pele, o Iesu Keriso, e tatalaina fusi o le oti ma faaola mo agasala a le lalolagi: “Aua ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau” (Ioane 3:16). O lenei osigataulaga o se faaaliga silisili lea o le alofa o lo tatou Tama mo i tatou.
O Le Iloaina o le Atua le Tama
I le avea ai ma fanau a le Atua, ua i ai so tatou sootaga faapitoa ma Ia, ua tulaga ese ai i tatou mai isi Ana foafoaga uma. Ia saili ia iloa lou Tama i le Lagi. E alofa o Ia ia te oe, ma ua Ia tuuina atu le avanoa taua e faalatalata atu ai ia te Ia pe a e tatalo. O au tatalo, ao ofoina atu i le faamaualalo ma le faamaoni, e faafofogaina ma tali mai i ai.
E mafai foi ona e iloa lou Tama e ala i lou aoao e uiga i Lona Atalii Pele ma faatatau le talalelei i lou olaga. Na aoaoina e le Faaola Ona soo: “Ana iloa e outou o au, po ua iloa foi e outou lo’u Tama… . O le ua vaai mai ia te au, ua vaai o ia i le Tama” (Ioane 14:7, 9).
E te faalatalata atu i le Atua le Tama ao e suesue i tusitusiga paia ma saunoaga a perofeta o aso e gata ai, ma a o e faia le faiva o le tautua. Pe a e mulimuli i le finagalo o le Atua ma ola e tusa ma le ala ua Ia finagalo e te ola ai, o le a avea oe e faapei o Ia ma Lona Alo. Ua e saunia oe lava e toe foi atu e mau faatasi ma Ia i lo Laua afioaga.