Tatalo

O oe o se alo o le Atua. E alofa lou Tama Faalelagi ia te oe ma silafia ou manaoga, ma e manao o Ia ia te oe e te fesootai ma Ia e ala i le tatalo. Tatalo atu ia te Ia ae le o se isi. Na poloai mai le Alii o Iesu Keriso, “E tatau ai ona outou tatalo e le aunoa i le Tama i lo’u igoa” (3 Nifae 18:19).

Ao e faia se masani o le faalatalata atu i le Atua i le tatalo, o le a oo ina e iloa o Ia ma silisili ona latalata atu ai ia te Ia. O ou manao o le a avea e pei lava o Ona [manao]. O le a mafai ona e mautinoa mo oe lava ma isi le mauaina o faamanuiaga ua Ia sauni e aumai pe a e ole atu i le faatuatua.

Aoaoga Faavae o le Tatalo

E saunia e le aunoa lou Tama Faalelagi e faafofoga ma tali mai i au tatalo. O le mana o au tatalo e faalagolago lea i ou luga. Ao e taumafai atili e avea le tatalo ma vaega o lou olaga, ia manatua le fautuaga lenei:

Ia i ai se uiga o au tatalo. Na lapatai mai le perofeta o Mamona e faapea afai e iai se isi e “tatalo ma le le loto faamaoni i ai… e le aoga lava ia te ia, aua e le talia e le Atua se ua faapena” (Moronae 7:9). Ina ia iai se uiga o au tatalo, e tatau ona e tatalo ma le faamaoni ma le “malosi uma o le loto” (Moronae 7:48). Ia faaeteete ina ia aloese mai le “tautu i a outou upu” pe a e tatalo (tagai Mataio 6:7). Ia tuuina atu manatunatuga moni i lau amio ma upu e te faaaogaina.

Faaaoga le gagana e faaalia ai le alofa, faaaloalo, migao, ma lagona vavalalata. O le faatatauga o lenei aoaoga faavae o le a iai sona eseesega e faatatau i lau gagana. E tusa lava pe eseese gagana, e tumau pea le aoaoga faavae: Pe a e tatalo, e ao ona e faaaogaina upu e talafeagai ona faailoa atu ai le alofa, sootaga tapuai vavalalata ma le Atua. E ono iai ni faigata ia te oe i le aoaoina o le gagana o le tatalo, peitai o le a faasolosolo lava ona oo ina e maua le lagona mafanafana e uiga iai ao e tatalo ma faitauina tusitusiga paia.

Ia faafetai atu i le Tama Faalelagi e le aunoa. E tatau ona “nonofo ma le faafetai i aso fai soo, ona o le alofa ma manuia e tele ua foaiina mai e ia ia te outou” (Alema 34:38). A e faaaluina se taimi e manatunatu ai i ou faamanuiaga, o le a e iloaina ai le tele o mea ua faia e lou Tama Faalelagi mo oe. Avatu au faafetai ia te Ia.

Saili le taitaiga ma le malosi mai le Tama Faalelagi i mea uma e te faia. Sa fautuaina e Alema lona atalii o Helamana: “Tagi atu foi i le Atua ina ia fesoasoani o ia ia te oe i mea uma, ioe, ia faia au mea uma ona o le Atua; o mea uma e te alu i ai, ia alu i ai ona o le Atua. Ioe, ia liliu atu ou manatu i le Atua, ioe, ia e tuuina e faavavau le alofa o lou loto i le Atua. Ia oulua filifili ma le Atua i au mea uma e te faia, na te faatonu foi ia te oe i mea lelei. Ioe, pe a e taoto i le po, ia taoto ona o le Atua, ina ia leoleo o ia ia te oe i lou moe. Pe a e ala i le taeao, ia tumu lou loto i le faafetai i le Atua. Afai foi e te faia ia mea, e faaeaina oe i le aso gataaga” (Alema 37:36–37; Tagai foi i le Alema 34:17–26).

Manatua manaoga o isi pe a e tatalo. Tuuina atu tatalo “ina ia manuia outou, ina ia manuia foi i latou o e faatasi ma outou” (Alema 34:27). Ole atu i lou Tama Faalelagi e faamanuia ma faamafanafana i e o loo manaomia le fesoasoani. Ole atu ia te ia ina ia musuia ma foai atu le malosi i le Peresitene o le Ekalesia, o isi Pulega Aoao, ma ou taitai o le Ekalesia i le lotoifale. Tatalo mo le manuia o tagata o le aiga ma uo. Tatalo mo taitai o le malo. Ole atu i le Alii ina ia musuia ma puipuia faifeautalai ma tagata o loo latou aoaoina.

Saili le taitaiga a le Agaga Paia ina ia e iloa pe o a mea e ao ona ta’ua i au tatalo. E mafai e le Agaga Paia ona aoao oe e tatalo ma taitai oe i upu e te faia (tagai Roma 8:26; 2 Nifae 32:8). E mafai ona Ia fesoasonai ia te oe e tatalo “e tusa ma le finagalo o le Atua” (MFF 46:30).

Pe a e talosaga atu e ala i le tatalo, ia faia mea uma e te mafaia e fesoasoani ai ina ia maua. E faamoemoeina oe e le Tama Faalelagi e te faia mea sili atu nai lo o lou ole atu ia te Ia mo faamanuiaga. Pe a i ai se filifiliga taua e te faia, e masani lava ona finagalo o Ia ina ia e “filifili mae’a ai i lou mafaufau” ao lei tuuina mai e Ia ia te oe se tali (tagai MFF 9:7–8). O au tatalo mo le taitaiga o le a i ai sona taua pe a faia taumafaiga uma e talia ai musumusuga a le Agaga Paia. O au tatalo mo lou lava manuia ma le manuia o isi o le a leai se aoga pe afai e te “aauina fua atu o e matitiva, ma e le lavalava, a e le asiasi atu i e mama’i, ma e puapuagatia, pe foai atu ni a outou mea i e matitiva, afai ua ia te outou” (Alema 34:28).

Afai o loo i ai se galuega faigata i ou luma, o le a fiafia le Tama Faalelagi pe a tootuli ou tulivae ma ole atu mo le fesoasoani ma faapena ona e tu i luga i ou vae ma alu atu ma galue. O le a fesoasoani o Ia i au taumafaiga amiotonu uma, ae seāseā ona Ia faia lea mo oe o se mea e mafai e oe lava ia ona fai.

Tatalo a le Tagata Lava ia

I Lana lauga i luga o le Mauga, na apoapoai atu ai Iesu Keriso: “ina ulu atu ia i lou afeafe, ma pupuni lona puipui, i le e tatalo ai i lou Tama o i le mea lilo; o lou Tama foi o le silasila i le mea lilo, na te avatu faaaliali se taui ia te oe” (Mataio 6:6). O tatalo patino faaletagata lava ia o se vaega taua o lou atiina ae faaleagaga.

A itiiti, po o taeao taitasi ma po taitasi, vaai se nofoaga e leai se mea e faalavelave atu ai. Tootuli ifo i le lotomaualalo ma talanoa atu i lou Tama Faalelagi. E ui lava o nisi taimi e te manaomia ai lou tatalo le leoa, ia e faia se taumafaiga faaopoopo i nisi taimi e faaleo ai au tatalo (tagai MFF 19:28; 20:51).

Manatua o le tatalo o se fesootaiga e lua-itu. A faaiu au tatalo, ia i ai se taimi e te faatali ai ma faalogo. E i ai taimi, e fautua, taitai, pe faamafanafanaina ai oe e le Tama Faalelagi ao e i ai pea i ou tulivae.

Aua nei faaseseina oe i le manatu e faapea e te lē o agavaa e tatalo. O lenei manatu e sau mai ia Satani, o le o loo manao e faatalitonu oe e le tatau ona e tatalo (tagai 2 Nifae 32:8). Pe afai e te le o lagonaina le fia tatalo, tatalo seia e lagonaina lou fia tatalo.

Sa poloai mai le Faaola, “Ia tatalo pea, ina ia mafai ona e manumalo, ioe, ina ia mafai ona e manumalo ia Satani, ina ia mafai ona e sao mai lima o auauna a Satani o e fesoasoani i lana galuega” (MFF 10:5). E ui lava o le a i ai taimi e le mafai ai ona faaauau pea ona e tootuli, a ia faia pea tatalo patino, faaletagata lava ia, e mafai e lou loto ona “tumu, faalatalata i [le Atua] i le tatalo e le aunoa” (Alema 34:27; tagai foi i le 3 Nifae 20:1). I le gasologa o aso taitasi, o le a mafai pea ona e faatumauina se lagona o le alofa mo lou Tama Faalelagi ma Lona Alo Pele. E mafai ona e faailoa atu ma le le leoa le faafetai i lou Tama ma ole atu ia te Ia ina ia faamalosi ia te oe i ou tiutetauave. I taimi o tofotofoga ma faigata faaletino, e mafai ona e ole atu ma le le leoa mo Lana fesoasoani.

Tatalo Faaleaiga

E le gata ua poloaiina i tatou e tatalo i le mea lilo, ae ua faapea foi ona fautuaina i tatou e le Faaola e tatalo faatasi ma o tatou aiga. Na ia fetalai mai, “Tatalo i o outou aiga i le Tama i lo’u igoa, ina ia manuia a outou ava, ma a outou fanau” (3 Nifae 18:21).

Pe afai ua e faaipoipo, ia avea ia tatalo faaleaiga ma vaega tumau o le olaga o lou aiga. Ia tootutuli faatasi i le lotomaulalo, i taeao uma ma afiafi uma. Ia tuuina atu i tagata taitoatasi uma o le aiga le avanoa e tatalo ai. Ia aufaatasi i le faafetai mo faamanuiaga ua tuuina mai ia te outou e le Tama Faalelagi. Ia aufaatasi i le faatuatua e aioi atu mo faamanuiaga tou te manaomia, ma tatalo foi mo isi tagata.

O tatalo faifai pea faaleaiga, o le a latalata atu ai oe ma tagata o lou aiga i le Atua faapea foi le tasi i le isi. O le a iloa ai e lau fanau ona talanoa ma lo latou Tama i le Lagi. O le a sili ona saunia lelei outou uma e auauna atu i isi ma tetee atu i faaosoosoga. O le a avea lou aiga ma nofoaga o le malosiaga faaleagaga, o se malutaga mai uunaiga leaga a le lalolagi.

Tatalo mo le Lautele

E i ai taimi e valaauina ai oe e tuuina atu se tatalo mo le lautele, atonu o se sauniga a le Ekalesia po o se vasega. Pe a e maua lenei avanoa, ia manatua o loo e talanoa ma le Tama Faalelagi, ae le o le tuuina atu o se lauga. Aua le popole pe o a manatu o tagata i upu e te faia. Ae, ia tuuina atu se tatalo faigofie e sau mai lou loto.

Mauaina o Tali i Tatalo

Sa aoao mai le Faaola, “Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tu’itu’i atu, ona toina mai ai lea ia te outou” (Mataio 7:7–8). Na Ia fetalai atu i Sa Nifae, “O mea uma e tatau tou te ole atu ai i le Tama i lo’u igoa ma le faatuatua tou te maua ai, faauta, e foaiina mai ai ia te outou” (3 Nifae 18:20).

E faafofoga mai le Tama Faalelagi i au tatalo. Atonu o le a le tali mai o Ia i le auala o loo e manao i ai, peitai e tali mai o Ia—i Lana lava taimi ma le ala e tusa ai ma Lona finagalo. Ona e talu ai e silafia e Ia le mea e sili mo oe, o nisi taimi e ono tali mai ai o Ia e leai, e tusa lava pe faamaoni au aioiga.

E tele auala e oo mai ai tali i tatalo. E masani ona oo mai i le leo filemu ma le itiiti o le Agaga Paia (tagai “Faaaliga,” itulau 32–37). E mafai ona oo mai i mea e tutupu i lou olaga pe ala mai foi i galuega alofa a i latou o loo siomia oe. A faaauau pea ona e faalatalata atili atu i lou Tama Faalelagi i le tatalo, o le a e lava saunia e iloa Ana tali alofa ma le atamai i au aioiga. O le a e iloa o Ia o lou “malu ma lo tatou malosi; e fai o ia ma fesoasoani silisili i puapuaga” (Salamo 46:1).