Alofa Mutimutivale
E silafia e lo tatou Tama Faalelagi o tatou vaivaiga ma agasala. E faaalia e ia le alofa mutimutivale pe a Ia faamagaloina a tatou agasala ma fesoasoani ina ia tatou toe foi atu e nonofo faatasi ma Ia.
O lena alofa e foliga e feteenai ma le tulafono o le faamasinoga tonu, lea e le faatagaina ai se mea e le mama ona nonofo faatasi ma le Atua (tagai 1 Nifae 10:21). Peitai o le Togiola a Iesu Keriso ua mafai ai foi ona avea le Atua ma se tasi e “sao ona lelei, o le Atua amiotonu, o le Atua foi ua finagalo alofa” (Alema 42:15).
Mauaina o le Alofa Mutimutivale o le Atua
Sa faamalieina e le Faaola manaoga o le faamasinoga tonu ina ua tulai o Ia i o tatou tulaga ma puapuagatia i le faasalaga mo a tatou agasala. Ona o lenei gaoioiga e lē manatu faapito, e mafai ai e le Tama ona finagalo alofa e taofi le faasalaga mai ia i tatou ma faaulufale atu i tatou i Lona afioaga. Ina ia maua le faamagaloga a le Alii, e tatau ona tatou matuai salamo faamaoni i a tatou agasala. E faapei ona aoao mai le perofeta o Alema, “Ua faaaogaina e le faamasinoga lana pule uma; ua pule foi le alofa i ana lava mea uma, o lea ua na o e salamo faamaoni e faaolaina ai” (Alema 42:24; Tagai foi i fuaiupu 22–23, 25).
O le faamagaloga o agasala e le na o le pau lea o le meaalofa o le alofa mutimutivale mai le Tama Faalelagi ma Iesu Keriso. O faamanuiaga uma ua e maua o ni faatinoga ia o le alofa mutimutivale, e sili atu nai lo mea e mafai ona e mauaina e oe lava ia. Sa aoao mai Mamona, “O mea uma ua lelei, e mai ia Keriso ia; a le o lea, ua pauu tagata, ma ua le mafai ona oo mai ia te i latou se mea lelei e tasi” (Moronae 7:24). Mo se faataitaiga, o oe o se tasi ua mauaina le alofa mutimutivale paia i le taimi e faafofoga ma tali mai ai le Tama Faalelagi i au tatalo, i le taimi e te mauaina ai le taitaiga mai le Agaga Paia, ma le taimi foi e te manuia ai mai se ma’i e ala mai i le mana o le perisitua. E ui lava o na faamanuiaga uma e oo mai o se taunuuga o lou usiusitai, e le mafai lava ona e mauaina mai i au lava taumafaiga na o oe. O ni meaalofa o le alofa mutimutivale mai se Tama alofa ma agalelei.
Faaali atu o le Alofa Mutimutivale mo Isi
I Lana fetalaiga i Ona soo, na poloai atu ai le Faaola: “Ia mutimutivale lo outou alofa, pei ona alofa mutimutivale o lo outou Tama” (Luka 6:36). E mafai ona e mulimuli i le faataitaiga a lou Tama Faalelagi o le alofa tunoa i au sootaga ma isi. Ia taumafai malosi e aveesea mai ia te oe le faasausili, faamaualuga, ma le manatu faapito. Saili i auala e faaali atu ai lou alofa, faaaloalo, loto faamagalo, filemu, ma le onosai, e tusa lava pe ua e iloa vaivaiga o isi tagata. A e faia lena mea, o le a avea au faataitaiga ma ala e taitai ai isi ina ia alofa mutimutivale, ma o le a silisili ai ona e mauaina le alofa tunoa o le Atua.