Perisitua
O le perisitua o le mana ma le pule e faavavau a le Atua. O le perisitua na foafoaina ai ma pulea e le Atua le lagi ma le lalolagi. O lea foi mana ua Ia faaolaina ma faaeaina ai Lana fanau, i le aumaia lea o “le tino ola pea ma le ola faavavau” (Mose 1:39).
Ua Tuuina mai le Pule o le Perisitua i Alii i luga o le Fogaeleele
Ua tuuina mai e le Atua le pule o le perisitua i alii agavaa uma o le Ekalesia ina ia mafai ai ona latou galulue i Lona suafa mo le faaolataga o Lana fanau. E mafai ona tuuina atu le pule i e umia le perisitua e talai ai le talalelei, faia sauniga o le faaolataga, ma taitaiina ai le malo o le Atua i luga o le fogaeleele.
E mafai e tama tane o le Ekalesia ona amata auauna atu i le perisitua pe a atoa le 12 tausaga o lo latou matutua. E amata i lo latou mauaina o le Perisitua Arona, ma mulimuli ane ai e mafai ona agavaa mo le tuuina atu i ai o le Perisitua Mekisateko. I vaitausaga eseese o o latou olaga, ma a o saunia foi i latou mo le mauaina o matafaioi eseese, e umia e i latou tofi eseese i le perisitua, e pei o le tiakono, aoao, po o le ositaulaga i le Perisitua Arona ma le toeaina po o le faitaulaga sili i le Perisitua Mekisateko. (Mo faamatalaga patino e uiga i le Persitua Arona ma le Mekisateko, tagai itulau 138–140.)
Ina ia umia e se alii o le Ekalesia le perisitua, e tatau i se tasi ua i ai lena pule o le perisitua ona faaee atu i ona luga ma faauuina o ia i lena tofi o le perisitua (tagai Eperu 5:4; MFF 42:11; Mataupu Faavae o le Faatuatua 1:5).
E ui lava e na o alii agavaa o le Ekalesia ua tuuina atu i ai le pule o le perisitua, ae o faamanuiaga o le perisitua e avanoa mo tagata uma—alii, tamaitai, ma fanau. E faamanuiaina uma lava i tatou mai taitaiga a perisitua amiotonu, ma e i ai foi ia i tatou uma le avanoa e maua ai sauniga faaola o le perisitua.
Perisitua ma le Aiga
O le faaaogaina sili ona taua o le perisitua e tupu i totonu o le aiga. O tane ma tama taitoatasi uma i totonu o le Ekalesia e tatau ona taumafai atili ia agavaa e umia le Perisitua Mekisateko. Faatasi ai ma lana ava o se paaga tutusa, e pulefaamalumalu o ia ma le amiotonu ma le alofa, e galue o se taitai faaleagaga i le aiga. E na te taitaiina e le aunoa le aiga i tatalo, aoaoina o tusitusiga paia, ma afiafi faaleaiga. E galulue ma lana ava e aoao le fanau ma fesoasoani ia i latou e saunia mo le mauaina o sauniga o le faaolataga (tagai MFF 68:25–28). E na te tuuina atu faamanuiaga o le perisitua mo le taitaiga, faamanuiaina, ma le faamafanafanaina.
E toatele tagata o le Ekalesia e le o i ai nisi e faamaoni o umia le Perisitua Mekisateko i o latou aiga. Ae ui i lea, e ala atu i auaunaga a faiaoga o aiga ma taitai perisitua, e mafai ai e tagata uma o le Ekalesia ona olioli i faamanuiaga o le mana o le perisitua i o latou olaga.
Korama o le Perisitua
O se korama o le perisitua o se vaega tuufaatasi o uso e tutusa tofi o le perisitua o loo latou umia. O le uluai faamoemoega lava o korama o le auauna atu lea i isi, fausia le lotogatasi ma le lagona faaleusoga, ma aoaoina e le tasi le isi i mataupu ma aoaoga faavae ma tiutetauave.
O korama e i ai i vaega uma lava o le faatulagaga o le Ekalesia. O le Peresitene o le Ekalesia ma ona fesoasoani ua faatulagaina ai le Korama a le Au Peresitene Sili. O Aposetolo e Toasefululua o se tasi lena korama. O Fitugafulu, e le gata i Pulega Aoao ae faapea foi Fitugafulu Pule Eria ua faatulagaina foi i korama. O le peresitene o siteki taitasi e pulefaamalumalu i se korama o faitaulaga sili, lea e aofia ai faitaulaga sili uma lava i totonu o le siteki. O uarota foi po o paranesi taitasi e masani foi ona i ai korama a le au toeaina, ositaulaga, aoao, ma tiakono. Ua faatulagaina foi faitaulaga sili i totonu o uarota e galulue i ni vaega o faitaulaga sili.
Faiaoga o Aiga
Mai le taimi e faauuina ai e ua umia le perisitua i le tofi o le aoao, e latou te maua ai le avanoa ma matafaioi e auauna ai o ni faiaoga o aiga. O le ala lea latou te galulue ai agai i le faataunuuina o o latou tiute e “leoleo pea i le ekalesia, faatasi ai ma le faamalosia o i latou” (MFF 20:53).
O faiaoga o aiga o loo i ai se tiute paia o le avea ai ma fesoasoani muamua o le Ekalesia i tagata taitoatasi ma aiga. Latou te asiasi atu i aiga ua tofia i ai i latou ia lē itiiti ifo ma le ta’itasi i masina. O lo latou auauna atu ma asiasi i aiga ua tofia i ai, latou te lagolago atu ai i matua i o latou tiutetauave, aoao atu le talalelei i tagata taitoatasi o le aiga, atiina ae faigauo, ma fesoasoani i tagata ina ia saunia mo le mauaina o sauniga o le malumalu ma ola agavaa mo faamanuiaga o le talalelei.
Ia mautinoa e taitai i totonu o uarota ma paranesi ua tofia ni faiaoga o aiga i aiga taitasi po o tagata taitoatasi. Latou te taulogologo atu pea i faiaoga o aiga ina ia fesoasoani e taulima manaoga faaleagaga ma faaletino o tagata taitoatasi.
Ki o le Perisitua
O le faaaogaina o le pule o le perisitua i totonu o le Ekalesia e taitaiina e i latou o e umia ki o le perisitua (tagai MFF 65:2; 124:123). O i latou o e umia ki e ia i latou le aia tatau e pulefaamalumalu ai ma taitaia le Ekalesia e tusa ai ma faatonuga. Mo se faataitaiga, e umia e se epikopo ia ki o le perisitua e mafai ai e ia ona pulefaamalumalu i totonu o lana uarota. O le mea lea, pe a saunia se tamaitiiti i totonu o lena uarota e papatiso, o le tagata e faia le papatisoga e tatau ona ia maua mai le faatagaga mai le epikopo.
E umia e Iesu Keriso ki uma lava o le perisitua. Ua ia tuuina mai i Ana Aposetolo ia ki e manaomia mo le taitaiina o Lana Ekalesia. E na o le Aposetolo sinia, le Peresitene o le Ekalesia, e mafai ona faaaogaina (pe tuuina atu le faatagaga i se isi tagata e faaaoga ai) nei ki mo le taitaiina o le Ekalesia atoa (tagai MFF 43:1–4; 81:2; 132:7).
O le Peresitene o le Ekalesia e tuuina atu ki o le perisitua i isi taitai perisitua ina ia mafai ai ona latou pulefaamalumalu i vaega o loo latou vaaia. O ki o le perisitua e tuuina atu i peresitene o malumalu, misiona, siteki, ma itu; epikopo; peresitene o paranesi ma peresitene o korama. O se tagata e galue ai i se tasi o nei tofiga, na te umia lava ki seia oo i le taimi e faamalolo ai. O fesoasoani e lē tuuina i ai ni ki, ae tuuina latou te maua le pule e ala i o latou valaauga ma tiute e faataunuuina.
Faaaogaina ma le Amiotonu o le Perisitua
Afai o e umia le perisitua, ia manatua o le perisitua e tatau ona avea ma se vaega o oe i taimi uma ma soo se tulaga lava. E le pei o se ofu talaloa e te ofuina ma toe tatala ese pe a e loto i ai. O soo se faauuga lava i le tofi o le perisitua, o se valaauga o le auaunaga i le olaga, faatasi ai ma se folafolaga e faapea o le a faaagavaaina oe e le Alii e faia Lana galuega e tusa ai ma lou faatuatua.
E tatau ona e agavaa ina ia mafai ai ona faaaogaina le mana o le perisitua. O upu e te tautala ai ma au amioga, e aafia ai le tulaga e te auauna atu ai. O lau amio i luma o tagata lautele e tatau ona leai se mea e pona ai. A o lau amio pe a na o oe lava, e sili atu lena ona taua. E ala mai i le perofeta o Iosefa Samita, na saunoa mai ai le Alii e faapea “o aia tatau a le Perisitua e faafesoota’iina e le mavavae’eseina ma mana o le lagi, e le mafai foi ona faatonuina pe faaaogaina ia mana o le lagi tau lava o mataupu faavae o le amiotonu” (MFF 121:36). Sa Ia lapataiina i latou e umia le perisitua:
“A e pe a tau ufiufi a tatou agasala, pe faamalie lo tatou loto maualuga, lo tatou fia sili lē aoga, pe faatonuina pe pulea pe faamalosia i agaga o le fanau a tagata i soo se faiga lava o le amioletonu, faauta, e punitia lava le lagi; e tiga le Agaga o le Alii; pe a aveeseina foi, Amene i le perisitua po o le pule a lena tagata” (MFF 121:37–38).
E le mafai ona e faatumauina soo se mana po o se uunaiga o le perisitua se i vagana “i le tauanau atu, i le faapalepale, agalelei, ma le agamalu, ma le alofa faamaoni; i le agalelei, ma le malamalama mama, e matua faalauteleina ai le aga e aunoa ma le pepelo, e aunoa ma le faaoleole.” Pe afai ua “uunaiina e le Agaga Paia” oe e aoai atu i se tasi, ia faailoa atu ai mulimuli le “alofa faateleina i le ua e aoaoina, ina nei fai oe e ia mona fili; ina ia na iloa ai o lou faamaoni e sili atu ona malosi i lo noataga o le oti” (MFF 121:41–43).
Ao e faaogaina ma le amiotonu ma le alofa le perisitua, o le a e maua le olioli i le auauna ai o se meafaigaluega i aao o le Alii. Na Ia fetalai mai:
“Ia tumu foi lou loto i le alofa atu i tagata uma, ma le aiga o le faatuatua, ia teuteuina ou manatu i le mama e le aunoa; ona malosi ai lea o lou faatuatua fai ifo i luma o le Atua; ma toto ifo i lou agaga le mataupu faavae o le perisitua e pei o le sau mai le lagi.
“E avea le Agaga Paia ma au aumea tumau, a o lou tootoo ma tootoo le feliuliuai o le amiotonu ma le upu moni; o lou malo foi o le a faia ma malo faavavau, e aunoa foi ma faiga faamalosi o le a tafe ia te oe e faavavau faavavau lava” (MFF 121:45–46).