Isi Punaoa
Afio Mai Faalua o Iesu Keriso

Afio Mai Faalua o Iesu Keriso

Ina ua afio ae Iesu Keriso i le lagi i le faaiuga o Lana galuega i le lalolagi, na folafola atu ai e ni agelu se toalua i Ona Aposetolo, “O Iesu lena, ua aveina ae nai ia te outou i le lagi, e faapea ona toe afio mai o ia, e pei o lona afio atu i le lagi na outou vaavaai i ai” (Galuega 1:11). Pe a toe afio mai le Faaola, o le a afio mai o Ia i le mana ma le mamalu e avea le lalolagi ma Ona malo. O Lona Afio Mai Faalua o le a faailogaina ai le amataga o le Meleniuma.

O le a avea le Afio Mai Faalua ma se taimi e fefefe ma tagiaue ai tagata amioleaga, ae o le a avea ma aso o le filemu ma manumalo mo e amiotonu. Na folafola mai e le Alii:

“Aua o e popoto ma sa talia le upu moni, ma avea le agaga Paia mo latou taitai, a e lei faaseseina—e moni ou te fai atu ia te outou, e le taia latou i lalo ma lafoina i le afi, a e tumau pea i latou i lea aso.

“E tuuina atu foi le lalolagi e fai mo latou tofi; e faatoateleina ma faamalosia foi i latou, ma a latou fanau e ola ae i le faaolataga e aunoa ma le agasala.

“Aua o le a faatasi le Alii ma i latou, e i o latou luga foi lona mamalu, e fai foi o ia mo latou tupu ma o latou faitulafono” (MFF 45:57–59).

E le i faailoa tonu mai e le Alii pe o afea o le a Ia afio mai ai: “A o le ituaso ma le aso e le iloa lava e se tasi, po o agelu foi i le lagi” (MFF 49:7). Ae na Ia faaali atu i Ana perofeta mea o le a tutupu ma faailoga o le a muamua mai i Lona Afio Mai Faalua. O nisi nei o mea ma faailoga ua valoia o le a tutupu:

  • Liliuese mai upumoni o le talalelei (tagai Mataio 24:9–12; 2 Tesalonia 2:1–3).

  • O le Toefuataiina o le talalelei, e aofia ai le Toefuataiina o le Ekalesia a Iesu Keriso (tagai Galuega 3:19–21; Faaaliga 14:6–7; MFF 45:28; 133:36).

  • O le Toefuataiina mai o ki o le perisitua (tagai Malaki 4:5–6; MFF 110:11–16).

  • O le oo mai o le Tusi a Mamona (tagai Isaia 29:4–18; 3 Nifae 21:1–11).

  • O le talaiina atu o le talalelei i le lalolagi (tagai Mataio 24:14).

  • O se taimi o le amioleaga, o taua, ma le le mautonu (tagai Mataio 24:6–7; 2 Timoteo 3:1–7; MFF 29:17; 45:26–33; 88:91).

  • Faailoga i le lagi ma luga o le fogaeleele (tagai Ioelu 2:30–31; Mataio 24:29–30; MFF 29:14–16; 45:39–42; 49:23; 88:87–90).

Aua e te popole i le taimi tonu e Afio Mai Faalua ai le Faaola. Ae ia ola ina ia e saunia i soo se taimi lava e afio mai ai o Ia. Ao e matauina ia faafatiatamai o nei aso mulimuli, ia manatua o tagata amiotonu e le tatau ona fefefe i le Afio Mai Faalua po o faailoga foi e muamua mai ai. O afioga a le Faaola i Ona Aposetolo ua faatatau foi ia te oe: “Aua le atuatuvale, aua pe a oo mai nei mea uma lava, tou te iloa ai ua faataunuuina folafolaga na faia ia te outou” (MFF 45:35).