Talalelei
O le Talalelei o le fuafuaga o le fiafia a le Tama Faalelagi. O le mataupu autu o le talalelei o le Togiola a Iesu Keriso.
Na saunoa mai le Perofeta o Iosefa Samita, “O muai mataupu faavae ma sauniga o le talalelei e faapea: muamua, Faatuatua i le Alii o Iesu Keriso; lona lua, Salamo, lona tolu, Papatisoina i le faatofuina mo le faamagaloina o agasala; lona fa, Faaee atu o lima e maua ai le mea foaifua, o le Agaga Paia lea“ (Mataupu Faavae o le Faatuatua 1:4). I lona atoatoaga, o le talalelei e aofia ai mataupu autu uma, mataupu faavae, tulafono, sauniga, ma feagaiga e tatau mo lo tatou faaeaga i le malo selesitila. Na folafola mai e le Faaola, afai tatou te tumau e oo i le gataaga, faamaoni i le ola ai i le talalelei, o le a Ia tauamiotonuina i tatou i luma o le Tama i le Aso o le Faamasinoga Mulimuli (tagai 3 Nifae 27:16).
Ua talaiina atu le atoatoaga o le Talalelei i augatupulaga uma pe afai e saunia fanau uma a le Atua e talia le talalelei. I aso e gata ai, po o le tisipenisione o le atoaga o taimi, ua toefuataiina mai ai le talalelei e ala i le Perofeta o Iosefa Samita.