Liua
“Aua o le loto i la le tino o le oti lea,” o le tala lea a le Aposetolo o Paulo, “ae o le loto i la le agaga o le ola lea ma le manuia” (Roma 8:6; tagai foi 2 Nifae 9:39). I lo tatou tulaga pau, e masani ona tatou fetaiai ma tofotofoga, ma o nisi taimi tatou te gauai atu ai i le “loto o le tino ma le leaga o i ai“ (2 Nifae 2:29; tagai foi ”Pau,“ itulau 130–133 i le tusi lenei). Ina ia mafai ona maua faamanuiaga o le ola e faavavau, e ao ona maua e i tatou le ”loto i la le agaga“ ma faatoilalo o tatou manaoga lē tonu. E manaomia ona suia i tatou. I se faaupuga sili atu ona sa’o, e ao ona tatou suia, pe liua, e ala i le mana o le Togiola a le Faaola ma e ala i le mana o le Agaga Paia. O lenei gasologa e ta’ua o le liua.
O le liua e aofia ai se suiga o le amio, ae e mamao atu nai lo le amio; o se suiga i o tatou lava natura. O se suiga matagofie lea e ta’ua e le Alii ma Ana perofeta o se toe fanauina, o se suiga o le loto, ma o se papatisoga i le afi. Na fetalai mai le Alii:
“Aua e te ofo, aua e ao ina toe fanauina tagata uma lava, ioe, o tane atoa ma fafine, o atunuu uma, ituaiga, ma gagana eseese, ma nuu, ioe, ia fanauina i la le Atua, ma ia liua mai le faaletino ma le pau i le amiotonu ona ua togiolaina e le Atua, ma ua avea mona atalii ma afafine;
“Ua faapea foi ona avea i latou ma tagata fou, a latou le faia lenei mea, e le mafai ona fai mo latou tofi le malo o le Atua ” (Mosaea 27:25–26).
O Le Faagasologa o le Liua
O le liua o se faagasologa; e lē o se mea e tupu i se taimi e tasi. E te liua ona o se taunuuga o au taumafaiga amiotonu e mulimuli i le Faaola. O nei taumafaiga e aofia ai le faaaogaina o le faatuatua i a Iesu Keriso, salamo i agasala, papatiso, mauaina o le meaalofa a le Agaga Paia, ma le tumau i le faatuatua e oo i le iuga.
E ui lava o le liliuga e ofoofogia ma suia ai olaga, ae o se vavega e lē leoa. O asiasiga a agelu ma isi mea matautia e tutupu, e lē aumaia ai le liliuga. E oo lava i a Alema na vaai i se agelu, na liliu ina ua uma ona faia “anapogi ma tatalo i aso e tele“ mo se molimau o le mea moni (Alema 5:46). Ma o Paulo, o lē na vaai i le Faaola toetu, na aoao mai ”e leai foi se tasi na te mafaia ona ta’ua o Iesu o le Alii, ua na o le Agaga Paia“ (1 Korinito 12:3).
Talu ai ona o le liliuga o se faagasologa faifai pea e lē leoa, e ono mafai ona e liua nei e aunoa ma lou iloaina. E mafai ona pei oe o Sa Lamana “ona o lo latou faatuatua ia [Keriso] i le aso o lo latou liliu mai, sa papatisoina i latou i le afi ma le Agaga Paia, a ua latou le iloa ai” (3 Nifae 9:20). O au taumafaiga faaauau pea e faaaogaina le faatuatua ma mulimuli i le Faaola, o le a taitai atu ai i le liliuga e sili atu.
O Foliga Vaaia o Tagata Ua Liua
Ua tuuina mai e le Tusi a Mamona faamatalaga o tagata o e ua liliu i le Alii:
Ua latou fia faia pea le amio lelei. Na alagaina e le nuu o le Tupu o Peniamina, “Ona o le Agaga o le Atua pule aoao na ia faaliliuina a matou amio ma o matou loto ua le toe ai so matou manatu e fai amio leaga, ae fai pea lava le amio lelei” (Mosaea 5:2). Na tautala Alema e uiga i tagata o e “ua le mafai ona vaai i le agasala, sei iloga ua inoino i ai“ (Alema 13:12).
Latou te le tetee i le Alii. Sa faamatalaina e Mamona se vaega o Sa Lamana o e na amioleaga ma fiainu i le toto ae sa “faaliliuina [i latou] i le Atua“ (Alema 23:6). Na suia e nei tagata o latou igoa i a Aneti-Nifae-Liae ma “ua avea i latou ma nuu amiotonu, ua latou lafoai la latou auupega o lo latou fouvale, ua le toe tau ai ma le Atua, po o se tasi o latou uso” (Alema 23:7).
Ua latou fetufaai atu le Talalelei. O Enosa, Alema le Matua, Alema le Itiiti, o atalii o Mosaea, Amoleka, ma Seseroma na ofoina atu i latou lava e talai le talalelei ina ua mavae ona latou liliu i le Alii (tagai Enosa 1:26; Mosaea 18:1; Mosaea 27:32–37; Alema 10:1–12; 15:12).
Ua faatumuina i latou i le alofa. Ina ua mavae ona asiasi atu le Faaola Toetu i tagata i Amerika, “ona faaliliu mai ai lea i le Atua le nuu atoa i luga o le fogaeleele uma o sa Nifae atoa ma sa Lamana ua leai foi ni fefinauaiga po o feupuaiga ia te i latou a ua faamaoni tagata uma o le tasi i le tasi… .
“Ua oo foi ina leai ni finauga i le nuu, ona o le alofa o le Atua ua mau i loto o le nuu.
“Ua leai foi se matau’a, po o se finauvale, po o faanunununu po o faitaaga, po o pepelo, po o fasioti tagata, po o se mea faamataitu e tasi; e moni lava, e le mafai ona sili i ai le fiafia o se tasi nuu o nuu uma lava ua faia e le aao o le Atua.
“Ua leai foi ni tagata faomea, po o ni tagata fasioti tagata, ua leai foi ni sa Lamana po o se tasi ituaiga, a ua tasi lava i latou, o fanau i latou a Keriso, o suli foi o le malo o le Atua” (4 Nifae 1:2, 15–17).
Taumafaiga mo se Liua e Sili Atu
O loo ia te oe le matafaioi patino mo lou lava liliuga. E leai se tasi e mafai ona liua mo oe, ma e leai foi se tasi e faamalosia oe e te liliu. Ae peitai, e mafai e isi ona fesoasoani ia te oe i le faagasologa o le liua. Aoao mai faataitaiga amiotonu a tagata o le aiga, o taitai ma faiaoga o le Ekalesia, ma alii ma tamaitai i totonu o tusitusiga paia.
O lou malosi e faatupuina ai se liliuga tele o le loto o le a faateleina pe a e taumafai e mulimuli i faataitaiga atoatoa a le Faaola. Suesue i tusitusiga paia, tatalo i le faatuatua, tausia poloaiga, ma saili le mafutaga faifai pea ma le Agaga Paia. Ao e faaauau pea i le faagasologa o le liua, o le a e maua ai le “olioli ma le fiafia e faapea ona matua tele,“ e pei ona maua e le nuu o le Tupu o Peniamina ina ua “faaliliuina [e le Agaga] , , , o [latou] loto” (tagai Mosaea 5:2, 4). O le a mafai ona e mulimuli i le fautuaga a le Tupu o Peniamina e “tutumau ma le le mafaagaeetia, ia fua mai pea i galuega lelei, ina ia faamaufaailogaina outou mona e Keriso le Alii le Atua pule aoao, ina ia outou maua le olataga e tumau ma le ola e faavavau” (Mosaea 5:15).