Ulugalii Tetea

I le “Aiga: O se Folafolaga i le Lalolagi,” o le Au Peresitene Sili ma le Korama a Aposetolo e Toasefululua ua “ta’utino atu ma le faamaoni, o le faaipoipoga i le va o se alii ma se tamaitai ua faauuina e le Atua, ma o le aiga o le ogatotonugalemu lea o fuafuaga a Lē Foafoa, mo le taunuuga e faavavau o Lana fanau“ (tagai itulau 10–12 o le tusi lenei). E ui lava i nei upu moni, o loo avea pea le tetea o ulugalii ma vaega taatele i le tele o sosaiete ma ua faateleina pea i tagata o le Ekalesia. O lenei faafitauli faifai pea e lē mai le Atua, ae o le galuega a le fili.

O ulugalii faaipoipo taitasi e ao ona galulue faatasi ina ia agavaa mo faamanuiaga o le faaipoipoga e faavavau. Afai ua e faaipoipo ma o loo oulua feagai ma lou toalua ma ni faafitauli, ia manatua o le fofo mo le tele o faafitauli o faaipoipoga e lē o le tetea po o le nonofo eseese. O le fofo o loo maua i totonu o le Talalelei a Iesu Keriso—i le salamo, loto faamagalo, amiosa’o, ma le alofa. E maua i le tausia o lou toalua i le ala e te manao e tausia mai ai oe (tagai Mataio 7:12). A o oulua galulue e foia ni faafitauli, e ono manaomia lo oulua o faatasi e saili se fautuaga mai lo oulua epikopo po o le peresitene o le paranesi.