Filemu
E toatele tagata e manatu o le filemu o le leai lea o ni taua. Peitai e mafai lava ona tatou lagonaina le filemu i taimi o taua, ma e mafai foi ona tatou le mauaina le filemu e tusa lava pe leai se taua o faia. O le leai o ni feteenaiga, e lē lava lena e aumaia ai le filemu i o tatou loto. O le filemu e ala mai i le talalelei—e ala mai i le Togiola a Iesu Keriso, o le faamafanafanaga a le Agaga Paia, ma lo tatou lava ola amiotonu, salamo faamaoni, ma galulue ma le filiga.
E tusa lava pe o vevesi i ou autafa le lalolagi, e mafai lava ona e mauaina le faamanuiaga o le filemu i totonu. O lenei faamanuiaga o le a faaauau pea ona ia te oe pe a e tumau ai ma le faamaoni i lau molimau o le talalelei ma pe a e manatuaina foi e alolofa le Tama Faalelagi ma Iesu Keriso ia te oe ma o loo puipuia foi oe e i la’ua.
E le gata i lou lagonaina o le filemu, ae e mafai foi ona avea oe ma se aafiaga o le filemu i totonu o lou aiga, lou nuu, ma le lalolagi. E te galue mo le filemu pe a e tausia poloaiga, tuuina atu auaunaga fesoasoani, tausia tagata o lou aiga ma tuaoi, ma fetufaai atu le talalelei. E te galue mo le filemu i soo se taimi lava e te fesoasoani atu ai e aveesea le mafatiaga o se isi tagata.
O upu nei a le Faaola ua aoao mai ai i tatou i le ala tatou te mauaina ai aafiaga o le filemu lea e aumaia e le talalelei:
“A o le Fesoasoani, o le Agaga Paia lea, e auina mai e le Tama i lo’u igoa, o ia lava na te a’oa’o ia te outou i mea uma lava; e faamanatu mai foi o ia ia te outou i mea uma ua ou fai atu ai ia te outou.
“Ou te tuuina atu ia te outou le manuia; o lo’u manuia ou te avatu ai ia te outou; ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau” (Ioane 14:26–27).
“Ou atalii e, aua le fefefe e fai mea lelei, aua o le mea lua te lulu, o le mea lava lea lua te seleseleina; o le mea lea, afai lua te lulu le lelei o le a oulua selesele foi le lelei mo lo oulua taui.
“O le mea lea, aua le matatau, le lafu mamoe itiiti e; ia faia mea lelei; ia tuu i le lalolagi ma seoli e autasia oulua, aua afai ua faavaeina oulua i luga o lau papa, latou te le mafai ona manumalo.
“Faauta, ou te le tausalaina oulua; o ia i o oulua ala ma aua le toe agasala; ia fai ma le faautauta le galuega na ou poloaiina ai oulua.
“Ia faalagolago ia te au i manatunatuga uma; aua le masalosalo, aua le fefe.
“Ia matau lelei i manu’a na tuia ai lo’u itu, ma tulaga fao foi na tutui ai o’u lima ma o’u vae; ia faamaoni, tausi i a’u poloaiga, ma o le a mau tofi oulua i le malo o le lagi” (MFF 6:33–37).
“Ua ou fai atu nei mea ia te outou, ina ia outou maua le manuia ia te au; e maua foi outou e le puapuaga i le lalolagi, a ia outou loto tetele, ua ou manumalo i le lalolagi” (Ioane 16:33).
A e manatua le Faaola ma mulimuli atu ia te Ia, e mafai moni lava ona e lototele. E mafai ona e mauaina aafiaga moni ma tumau o le filemu i taimi uma. E mafai ona e mauaina le faamoemoe i upu muamua a le Faaola i Lona au soo ina ua mavae Lona Toetu mai: “Ia outou manuia” (Ioane 20:19).