Faaaliga

O faaaliga, o fesootaiga mai le Atua i Lana fanau. O lenei taitaiga e ala mai i ni auala eseese e tusa ma manaoga ma tulaga o i ai i tagata taitoatasi ma le Ekalesia atoa.

Pe a faaali mai e le Alii Lona finagalo i le Ekalesia, e fetalai mai o Ia e ala mai i Ana perofeta. O loo i tusitusiga paia le tele o na ituaiga faaaliga —o afioga a le Alii e ala mai i perofeta anamua ma aso e gata ai. O loo faaauau pea e le Alii i le taimi nei ona taitaiina le Ekalesia e ala i le faaali mai o Lona finagalo i Ana auauna filifilia

E le na o perofeta latou te mauaina faaaliga. Pe a tusa ai ma lou faatuatua, e mafai ona e mauaina faaaliga e fesoasoani ia te oe i ou manaoga faapitoa, o tiutetauave, o fesili, ma fesoasoani foi e faamalosia ai lau molimau.

Saunia ia Maua Faaaliga e ala mai i le Agaga Paia

O loo faamatala mai e tusitusiga paia ituaiga faaaliga eseese, e pei o faalepo, miti, ma asiasiga a agelu. O auala na, ua toefuataiina mai ai e le Alii Lana talalelei i aso e gata ai ma faaali mai ai upumoni e faatatau i na mataupu faavae e pei o le muai olaga, o le faaolaina o e ua maliliu, ma malo e tolu o le mamalu. Peitai, o le tele o faaaliga i taitai ma tagata o le Ekalesia e auala mai i musumusuga a le Agaga Paia.

O uunaiga filemu faaleagaga e foliga mai e le ofoofogia e pei o faaaliga ma asiasiga a agelu, ae e sili atu lo latou malosiaga ma umi ma suia ai foi le olaga. O le molimau a le Agaga Paia e na te faia se uunaiga i le agaga e sili atu ona taua nai lo se isi lava mea e te vaai pe faalogo i ai. O na faaaliga, o le a e mauaina ai le malosi e te tumau ai ma le faamaoni i le talalelei ma fesoasoani ai i isi e faia lea lava mea e tasi.

O le fautuaga o loo mulimuli mai o le a fesoasoani e saunia ai oe mo le mauaina o uunaiga mai le Agaga Paia:

Tatalo mo le Taitaiga. Na fetalai mai le Alii, “Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tu’itu’i atu, ona toina mai ai lea ia te outou: Aua ai se ole atu, e maua e ia; o lē saili foi, e iloa e ia; e toina foi i lē tu’itu’i atu” (Mataio 7:7–8). Ina ia iloa ma maua, e tatau ona e saili ma ole atu. Afai e te lē tu’itu’i—tatalo atu i lou Tama Faalelagi mo le taitaiga—o le a lē tatalaina faitotoa o faaaliga ia te oe. Peitai afai e te faalatalata atu i lou Tama i le tatalo ma le lotomaualalo, o le a oo lava ina e “maua lea faaaliga ma lea faaaliga, o lea poto ma lea poto, ina ia e iloa mea lilo atoa ma mataupu tau le filemu—e aumaia le olioli, e aumaia foi le ola faavavau” (MFF 42:61).

Ia Migao. O le migao o se uiga loloto o le faaaloalo ma le alofa. Pe a e migao ma filemu, ua e valaauliaina faaaliga. E tusa lava pe pisapisao mea uma lava o loo siomia ai oe, e mafai lava ona ia te oe se uiga migao ma saunia ai mo le mauaina o taitaiga mai le Alii.

Ia Lotomaualalo. O le lotomaualalo e vavalalata lava lona fesootaiga ma le migao. Pe a e lotomaualalo, o le a e iloaina lou faalagolago atu i le Alii. Na aoao mai le perofeta o Mamona, “ona o le agamalu foi ma le lotomaulalo e oo mai ai le asiasiga o le Agaga Paia; o lea Fesoasoani e oo mai ai le faamoemoe ma le alofa atoatoa” (Moronae 8:26).

Tausia Poloaiga. Pe a e tausia poloaiga, ua e saunia e mauaina, iloa, ma mulimuli i uunaiga a le Agaga Paia. Na folafola mai e le Alii, “A o lē tausia a’u poloaiga ou te tuuina atu i ai mea lilo o lo’u malo, o ia lava mea o le a ia te ia e pei o se punavai ola, e puna ae i le olaga faavavau” (MFF 63:23).

Agavaa e taumafa i le faamanatuga. O tatalo o le faamanatuga o loo aoaoina ai i tatou i le ala tatou te maua ai pea le mafutaga ma le Agaga Paia. Pe a e taumafa i le faamanatuga, ua e molimau atu i le Atua ua e loto e ave i ou luga le suafa o Lona Alo ma o le a e manatua pea o Ia ma tausia Ana poloaiga. Pe a tatou tausia nei feagaiga, ua folafola mai e le Tama Faalelagi o le a mafuta pea le Agaga ma i tatou (Tagai MFF 20:77, 79.)

Suesueina tusitusiga paia i aso uma. A e suesue ma le filiga i tusitusiga paia, e te aoao mai i faataitaiga a alii ma tamaitai o e na faamanuiaina o latou olaga a o latou mulimuli atu i le finagalo faaalia o le Alii. O le a sili atu foi ona e gauai atu i le Agaga Paia i lou lava olaga. A e faitau ma manatunatu loloto, e mafai ona e mauaina faaaliga e uiga i le ala e faatatau ai se mau faapitoa ia te oe po o se isi lava mea e finagalo le Alii e faailoa mai ia te oe. Talu ai o le faitauina o tusitusiga paia e fesoasoani ia te oe e maua ai faaaliga tau ia te oe lava ia, ua tatau ai ona e suesueina tusitusiga paia i aso uma.

Faaalu se taimi e mafaufau loloto ai. Pe a e faaaluina se taimi e mafaufau loloto ai i upumoni o le talalelei, ua e tatalaina lou mafaufau ma lou loto i le taitaiga ma uunaiga a le Agaga Paia (tagai 1 Nifae 11:1; MFF 76:19; 138:1–11). O le mafaufau loloto e aveesea ai ou mafaufauga mai mea lē aoga o le lalolagi ma e latalata atu ai i le Agaga.

Pe a e sailia se taitaiga faapitoa, ia e muai suesueina le mataupu i lou mafaufau. E i ai taimi e faatoa talanoa mai ai le Alii pe a maea ona e suesueina le mataupu i lou mafaufau. Sa faamatala e le Alii lenei faagasologa ia Oliva Kaotui, o le na galue o se tusiupu ia Iosefa Samita mo le tele o le galuega faaliliu o le Tusi a Mamona. E ala mai i le perofeta o Iosefa Samita, na fetalai mai ai le Alii ia Oliva Kaotui, ma faamalamalama mai ai le mafuaaga na le mafai ai e Oliva ona faaliliuina le Tusi a Mamona e ui lava na tuuina atu ia te ia le meaalofa e faaliliu ai: “Faauta, e te le i malamalama; fa te oe ou te tuuina atu ia te oe, i le na o lou ole mai a e te le i mafaufau i ai. A e peitai, faauta, ou te fai atu ia te oe, e ao ina e filifili maea ai i lou mafaufau; ona e ole mai lea ia te au po ua sa’o, afai ua sa’o ou te faia ia mu lou loto i totonu ia te oe; o lea la, o le a e lagona ai ua tonu” (MFF 9:7–8).

Ia saili ma le onosai le finagalo o le Atua. E faaali mai le Atua “i lona lava aso tatau, ma i lona lava ala, e tusa ma lona lava finagalo” (tagai MFF 88:63–68). E ono oo mai faaaliga ia te oe i le “upu ma le upu, o le fuaiupu ma le fuaiupu, o sina mea itiiti iinei ma sina mea itiiti iina” (2 Nifae 28:30; Tagai foi i le Isaia 28:10; MFF 98:12). Aua nei e taumafai e faia i se auala faamalosi le faia o mea faaleagaga. E lē oo mai faaaliga i le ala lena. Ia onosai ma faalagolago i le taimi a le Alii.

Iloaina o Uunaiga a le Agaga Paia

Mai le tele o leo ma avefeau o loo i le lalolagi i le taimi nei, e tatau ona e aoao e iloa musumusuga a le Agaga Paia. O nisi nei o auala faavae e fesootai mai ai le Agaga Paia ia i tatou:

E talanoa mai o Ia i le mafaufau ma le loto i se leo filemu ma le itiiti. Na aoao mai le Alii: “O le a ou faaali atu ia te oe i lou mafaufau ma lou loto i le Agaga Paia e oo atu ia te oe ma o le a tumau i lou loto. O lenei, faauta, o le agaga lenei o faaaliga” (MFF 8:2–3). O nisi taimi o le a fesoasoani ai le Agaga Paia ia te oe ina ia e malamalama i upumoni o le talalelei pe tuuina atu foi ia te oe se uunaiga e “peiseai ua i ai pea i [lou] mafaufau, ma ua sili lona uunaiga i [lou] manatu” (MFF 128:1). E ui lava o lena faaaliga e mafai ona i ai se aafiaga malosi ia te oe, e toeitiiti lava a oo mai ma le filemu, e pei o se “leo filemu ma le itiiti” (tagai 1 Tupu 19:9–12; Helamana 5:30; MFF 85:6).

E uunaia i tatou e Ia e ala i o tatou lagona. E ui ua masani ona tatou faamatalaina fesootaiga mai le Agaga e faapea, o se leo, o lena leo o se mea e tele ina tatou lagonaina [i o tatou tino] nai lo le faalogoina [i taliga]. Ma a o tatou talanoa e uiga i le “faalogo” i musumusuga a le Agaga Paia, e masani ona tatou faamatalaina se uunaiga faaleagaga e ala i le faapea mai, “Sa i ai lava lo’u lagona …” O le apoapoaiga a le Alii ia Oliva Kaotui o loo i le vaega e 9 o le Mataupu Faavae ma Feagaiga, lea o loo talanoaina i le itulau 109 o loo aoaoina mai ai lenei mataupu faavae. Ae ui i lea, o nisi taimi e faauiga sese ai lea apoapoaiga. O nisi tagata o le Ekalesia e oo i ai le lē mautonu pe a faitau i lea fuaitau, e popole ona e faapea e latou te le i mauaina lava se uunaiga mai le Agaga Paia ona latou te le i lagonaina lava se mu o le loto i totonu o i latou. Tagai foi i upu mulimuli a le Alii o loo i le Mataupu Faavae ma Feagaiga 9:8: “O lea la, o le a e lagona ai ua tonu.” O le mumu o loo faamatalaina mai i lenei mau ua faailoa ai se lagona mafanafana ma le toafilemu, ae le o se faalogona o le vevela. A faaauau pea ona e mulimuli i le finagalo o le Alii i lou olaga, o le a oo ina e iloa pe faapefea ona suia oe e le Agaga Paia.

E aumaia e Ia le filemu. E masani ona ta’ua le Agaga Paia o le Fesoasoani (tagai Ioane 14:26; MFF 39:6). Ao Ia faaali mai le finagalo o le Alii ia te oe, o le a Ia “avatua…le toafilemu i lou mafaufau” (MFF 6:23). O le filemu na te aumaia e le mafai ona faaseseina i uunaiga a le lalolagi po o aoaoga sese. O le filemu lea na folafola atu e le Faaola ina ua Ia faamautinoa atu i Ona soo o le a Ia auina mai le Fesoasoani: “Ou te avatu ia te outou le manuia; o lo’u manuia ou te avatu ai ia te outou; ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau” (Ioane 14:27).

Faamatalaga Faaopoopo: Amosa 3:7; Mataio 16:13–18; 1 Korinito 2:9–14; 12:3; Faaaliga 19:10; Alema 5:43–48; 17:2–3; MFF 76:5–10; 121:26–33; Mataupu Faavae o le Faatuatua 1:7, 9.

Tagai foi Agaga Paia; Faatuatua; Meaalofa Faaleagaga; Migao; Tatalo; Tusitusiga Paia