Faamagaloga

O loo talanoa tusitusiga paia i le faamagaloga i ni vaega se lua. Ua poloaiina i tatou e le Alii ia salamo i a tatou agasala ma saili atu mo Lana faamagaloga. Na Ia poloai mai foi ia i tatou e faamagalo atu i latou o e ua agaleaga mai ma faatiga ia i tatou. I le tatalo a le Alii, na fautuaina ai i tatou e Iesu e tatalo atu i le Tama Faalelagi e “faamagalo mai ia te i matou i a matou agasala, e pei o i matou foi ona matou faamagaloina atu i e ua agaleaga mai ia te i matou“ (Mataio 6:12).

Sailia o le Faamagaloga mai le Alii

O le agasala o se avega mamafa. Na te aumaia le luluti o le nofosala ma le lilivau ina ua tatou iloa ua tatou lē faia le finagalo o lo tatou Tama i le Lagi. Na te aumaia le faanoanoa tumau pe a tatou iloa o a tatou amioga ma mea e fai, atonu ua tatou faatiga ai i isi ma ua tatou lē maua ai faamanuiaga ua sauni lo tatou Tama e tuuina mai ia i tatou.

Ona o le Togiola a Iesu Keriso, e mafai ona tatou maua ai le faamagaloga mo a tatou agasala e ala i le salamo faamaoni atoatoa. O le agasala e aumaia ai le puapuaga ma le tiga, ae o le faamagaloga a le Alii e aumaia ai lagona lelei, mafanafana, ma le olioli. Ua folafola mai e le Alii:

“Faauta o lē ua salamo i ana agasala, e faamagaloina o ia, ma o au le Alii, ou te le toe manatua lava” (MFF 58:42).

“E ui lava ina pei o ofu mumu a outou agasala, e sisina ia e pei o le kiona; e ui lava ina mumu ia e pei o le ie ulaula, e avea e pei o fulufulu mamoe” (Isaia 1:18).

E mafai ona tupu ia te oe se vavega, pe e te manaomia le salamo i se agasala mamafa po o se vaivaiga o aso fai soo. E pei lava ona augani atu le Faaola i tagata anamua, ua faapena foi ona Ia augani mai ia te oe i le aso nei:

“Ia outou o mai ia te au o outou uma o e tigaina ma mafatia i avega, o au foi e malolo ai outou.

“Ia outou amoina la’u amo, ma ia outou faaaoao ia te au, aua o au le agamalu ma le loto maulalo; ona maua lea e outou le malologa mo o outou agaga.

“Aua e avegofie la’u amo, o la’u avega foi e mama ia” (Mataio 11:28–30).

“Pe tou te le foi mai nei ea ia te au, ma salamo i a outou agasala, ma faaliliuina, ina ia ou faamaloloina outou?

“Ioe, e moni, ou te fai atu ia te outou, afai tou te o mai ia te au, e maua e outou le ola faavavau. Faauta, ua faaloaloa atu lo’u lima alofa ia te outou, ai se sau, ou te talia o ia. Amuia i latou o e o mai ia te au” (3 Nifae 9:13–14).

Mo se faamalamalamaga o le salamo, tagai “Salamo,” itulau 146–150.

Faamagalo Atu i Isi

E le gata i le sailia o le faamagaloga o a tatou lava agasala, ae e tatau ona tatou naunau e faamagalo atu i isi. Na fetalai mai le Alii: “O le mea lea, ou te fai atu ai ia te outou, e tatau ona outou faamagalo atu le tasi i le tasi; aua o lē lē faamaglo atu i lona uso i ana solitulafono, ua ta’usalaina i luma o le Alii; aua e i ai pea ia te ia le agasala sili ona mamafa. O a’u le Alii, e faamagalo atu i e ou te loto ia faamagaloina, a o outou e ao ina outou faamagaloina atu i tagata uma“ (MFF 64:9–10).

I tulaga o le olaga i aso fai pea, o le a mautinoa lava le faaleaga o oe e isi tagata—o nisi taimi e lē mafaufauina, ae o nisi taimi e fai ma le loto i ai. E faigofie tele ona tupu ai le ita pe fia taui atu i tulaga faapea, ae e lē o le ala lea a le Alii. Na apoapoai mai le Alii, “Ia outou alolofa atu i e ua ita mai ia te outou, ia outou faamanuia atu i e ua fetuu mai ia te outou, ia outou agalelei atu i e ua inoino mai ia te outou, ia outou tatalo foi mo e ua tuuaifua mai ma faasaua mai ia te outou” (Mataio 5:44). Ua ia faia le faataitaiga sili o le faamagalo atu, ina ua i ai o Ia i luga o le satauro. Na faatatau i fitafita Roma o ē sa faasatauroina o Ia, na Ia tatalo atu ai, “Lo’u Tama e, ia e faamagaloina atu ia te i latou, aua ua latou le iloa le mea ua latou faia“ (Luka 23:34; tagai Faaliliuga Iosefa Samita, Luka 23:35.)

Ia tatalo mo le malosi e faamagalo atu ai i ē ua agaleaga mai ia te oe. Ia faate’a lagona ita, inoino, po o le fia tauimasui. Ia vaai atu mo mea e lelei ai isi, ae lē o le taulai atu i o latou masei ma faalauteleina o latou vaivaiga. Ia tuu pea i le Atua e avea ma faamasino o amioga faatiga a isi. E ono faigata tele ona faagalo lagona tiga, ae e mafai ona e faia i le fesoasoani mai o le Alii. O le a e iloa ai o le faamagaloga e mafai ai ona faamaloloina manua ogaoga, e suia le oona o le feitaga’i ma le inoino, i le filemu ma le alofa lea e na o le Atua e mafai ona aumaia.