Sauniga

I totonu o le Ekalesia, o se sauniga o se galuega e paia ma mamalu e faatinoina e ala i le pule o le perisitua. O nisi sauniga e tatau mo lo tatou faaeaga. O nei sauniga e ta’ua o sauniga faaola. E aofia ai le papatisoga, faamauga, faauuina i le Perisitua Mekisateko (mo alii), o le faaeega paia o le malumalu, ma le faamauga o le faaipoipoga. O nei sauniga taitasi tatou te ulu atu ai i feagaiga paia ma le Alii.

O isi sauniga, e pei o le faaigoaina ma le faamanuiaina o tamaiti, faapaiaina o le suauu, ma le faauuina o e mamai ma puapuagatia, e faia foi e ala i le pule o le perisitua. E ui e le manaomia mo lo tatou faaolataga, ae taua i latou mo lo tatou faamafanafanaga, taitaiga, ma faamalosiauga.

O sauniga ma feagaiga e fesoasoani ina ia tatou manatua ai pe o ai i tatou. E faamanatu mai ai ia i tatou lo tatou tiute i le Atua. Ua saunia e le Alii ia sauniga ma feagaiga e fesoasoani ina ia tatou foi atu ai ia te Ia ma maua le ola e faavavau. Pe afai tatou te faamamaluina, o le a Ia faamalolosia i tatou.

E mafai ona e mauaina le tele o avanoa e faataunuuina ai sauniga o le perisitua. O le taimi lava e te mauaina ai lena avanoa, ia faia mea uma lava e te mafaia e saunia ai oe, e tusa pe o e tuuina atu le sauniga pe o e mauaina foi. E mafai ona e saunia e ala i le tatalo, anapogi, saili fautuaga mai taitai perisitua, ma suesue i tusitusiga paia ma saunoaga a perofeta o aso e gata ai. Afai o e umia le perisitua, e ao ona e saunia faaleagaga i taimi uma e faia se sauniga. Ia ola i se olaga mama ma agavaa, ma taumafai atili ina ia e maua le mafutaga faifai pea ma le Agaga Paia.