Malo o le Mamalu

E ala mai i le Togiola a Iesu Keriso, o le a toetutu ai tagata uma (tagai Alema 11:42–45). Pe a mavae ona tatou toetutu, o le a tatou laulaututu i luma o le Alii ina ia faamasinoina (tagai Faaaliga 20:12; 3 Nifae 27:14). O i tatou uma taitoatasi o le a tofia i se nofoaga e faavavau i se malo faapitoa o le mamalu. Na aoao mai e le Alii lenei mataupu faavae ina ua Ia fetalai, “E tele mea e nonofo ai i le maota o lo’u Tama” (Ioane 14:2).

E tolu malo o le mamalu: o le malo selesitila, o le malo terasitila, ma le malo telesitila. O le mamalu o le a e nofo ai e faalagolago lea i le loloto o lou liua, e faaalia lea i lou usiusitai i poloaiga a le Alii. O le a faalagolago i le tulaga na e “talia ai le mau ia Iesu” (MFF 76:51; Tagai foi i fuaiupu 74, 79, 101).

Malo Selesitila

O le malo selesitila o le malo maualuga lea o malo e tolu o le mamalu. O tagata o lea malo o le a nonofo e favavau i totonu o le afioaga o le Atua le Tama ma Lona Alo o Iesu Keriso. E tatau ona avea lea ma au sini: ia ulu atu i le mamalu selesitila ma fesoasoani atu i isi ina ia latou mauaina foi lena faamanuiaga sili. O lena sini e le mafai ona ausia i le na o se taumafaiga se tasi, o se taunuuga o se olaga amiotonu ma se faamoemoega mausali.

O le malo selesitila o le nofoaga ua saunia mo i latou ua “talia le mau ia Iesu” ma ua “faaatoatoaina ia Iesu le puluvaga o le feagaiga fou, o le na faia lenei togiola atoatoa i le faamaligiina o lona lava toto” (MFF 76:51, 69). Ina ia maua lenei meaalofa, e tatau ona tatou mauaina sauniga o le faaolataga, tausia poloaiga, ma salamo i a tatou agasala. Mo se faamatalaga auiliili o i latou o e o le a nonofo i le mamalu selesitila, tagai Mataupu Faavae ma Feagaiga 76:50–70, 92–96.

Ia Ianuari 1836 na maua ai e le perofeta o Iosefa Samita se faaaliga na faalauteleina ai lona malamalama i mea e manaomia ina ia ulu atu ai i le mamalu selesitila. Na tatalaina le lagi ia te ia, ma sa ia vaaia le malo selesitila. Na ofo o ia ina ua ia vaaia lona uso matua o Alavini iina, e ui ina sa maliu Alavini e le i mauaina e ia sauniga o le papatisoga. (tagai MFF 137:1–6.) Ma na oo mai le siufofoga o le Alii i le perofeta o Iosefa:

“O i latou uma o e oti e aunoa ma le malamalama i lenei talalelei, o e semanu latou te talia pe ana faatagaina e ola pea i le lalolagi, e avea i latou ma suli o le malo selesitila o le Atua;

“O i latou uma lava o le a oti e amata atu i le taimi nei e aunoa ma se malamalama e uiga i le talalelei, o e semanu latou te talia ma o latou loto atoa, o le a avea ma suli o lena malo;

“Aua o Au, le Alii, o le a faamasinoina tagata uma e tusa ma a latou galuega, e tusa ma manaoga o latou loto” (MFF 137:7–9).

I sana faamatalaga i lenei faaaliga, na faapea mai ai le perofeta o Iosefa, “Sa ou vaaia foi, o tamaiti uma lava o e oti a o lei taunuu atu i tausaga e malamalama ai, e faaolaina i le malo selesitila i le lagi” (MFF 137:10).

Mai le isi faaaliga i le perofeta o Iosefa, ua tatou aoaoina ai e tolu tikeri i le malo selesitila. Ina ia faaeaina i le tikeri maualuga ma faaauau ai pea e faavavau i sootaga faaleaiga, e ao ona tatou ulu atu “i le feagaiga fou faavavau o le faaipoipoga” ma faamaoni ai i lena feagaiga. I se isi faaupuga, o le faaipoipoga i le malumalu o se tulaga manaomia lea mo le mauaina o le tikeri aupito i luga o le mamalu selesitila. (Tagai MFF 131:1–4.) O i latou uma o e ua agavaa e ulu atu i lena feagaiga fou ma le faavavau o le faaipoipoga, o le a maua lena avanoa, a lē o le olaga nei o le olaga a sau.

Malo Terasitila

O i latou e ulu atu i le mamalu terasitila o le a “maua le mafutaga faatasi ma le Alo, a e le o le atoatoa o le Tama. O lea, o i latou ia o tino terasitila, a e le o tino selesitila, e eseese foi i mamalu e pei ona ese le masina mai le la (MFF 76:77–78). I se faamatalaga lautele, o tagata i le malo terasitila o ni tagata faamamaluina ”o e na faatauasoina i faiga faaoleole a tagata“ (MFF 76:75). O lenei vaega o le a aofia ai tagata o le Ekalesia o e na ”le loto toa i le molimau ia Iesu“ (MFF 76:79). O le a i ai foi i latou o e na teena le avanoa e maua ai le talalelei i le olaga faitino peitai na latou taliaina mulimuli ane i le lalolagi o agaga (tagai MFF 76:73–74). Ina ia aoao atili e uiga ia i latou e ulu atu i le mamalu terasitila, tagai Mataupu Faavae ma Feagaiga 76:71–80, 91, 97.

Malo Telesitila

O le mamalu Telesitila o le a faaagaga mo tagata o e “na le taliaina le talalelei a Keriso, po o le molimau ia Iesu” (MFF 76:82). O nei tagata o le a mauaina lo latou mamalu pe a maea ona faaolaina mai i latou mai le falepuipui o agaga, lea e ta’ua i nisi taimi o seoli (tagai MFF 76:84, 106). O se faamatalaga auiliili o i latou e ulufale atu i le malo telesitila o loo maua i le Mataupu Faavae ma Feagaiga 76:81–90, 98–106, 109–112.

Malaia

O nisi tagata o le a lē agavaa e nonofo i isi malo o le mamalu. O le a ta’ua i latou o “atalii o le malaia” ma o le a “nofo o ia i se malo e le o se malo o le mamalu” (MFF 76:32; 88:24). O le tulaga lea o i latou “uma ua iloa le mana [le Atua], ma ua tofusia ai, a ua tuuina atu ai i latou lava ia manumalo ai le mana o le tiapolo, ma faafitia le upu moni ma teena le mana [o le Atua]” (MFF 76:31; Tagai foi i fuaiupu 30, 32–49).