Sefuluai
O le isi faamanuiaga o le avea ai ma tagata o le Ekalesia a Iesu Keriso o le Au Paia o Aso e Gata Ai o le avanoa lea e totogi ai sefuluai. O lou ola ai i le tulafono o le sefuluai, ua e auai i le fausiaina o le malo o le Atua i luga o le fogaeleele.
Uiga ma le Faamoemoega o le Sefuluai
O se sefuluai totogi atoa, e te tuuina atu le tasi-vaesefulu o tupe e te maua i le Alii e ala atu i Lana Ekalesia. E te tuuina atu lau sefuluai i se tasi o le au epikopo po o se tasi o le au peresitene o le paranesi.
O taitai o le lotoifale latou te auina atu tupe o sefuluai i le laumua o le Ekalesia, lea o loo i ai se aufono latou te fuafuaina auala faapitoa e faaaogaina ai foai paia. O lenei aufono e aofia ai le Au Peresitene Sili, le Korama a le Toasefululua, ma le Epikopo Pulefaamalumalu. I le galulue ai e tusa ai ma faaaliga, latou te faia faaiuga ao taitaiina ai i latou e le Alii. (Tagai MFF 120:1.)
O foai o le sefuluai e faaaogaina lava mo faamoemoega a le Alii—e fausia ma faaleleia ai malumalu ma falelotu, e lagolagoina ai le galuega faafaifeautalai, ma faagaoioia ai galuega a le Ekalesia i le lalolagi.
Faamanuiaga o le Totogiina Atoa o le Sefuluai
O le tulafono o le sefuluai e manaomia ai le ositaulaga, ae o lou usiusitai i le tulafono e aumaia ai faamanuiaga e matua sili atu i soo se mea lava ua e tuuina atu. Na aoao mai le perofeta o Malaki:
“Ina aumaia mea e sefulu a’i a outou mea uma lava i le fale e tuu ai mea; ina ia i ai mea e ‘ai i lo’u fale; ma ia outou tofotofo mai ai ia te au i lenei mea, ua fetalai mai ai Ieova o ‘au; pe ou te le toina pupuni o le lagi mo outou, ma sasaa atu le manuia mo outou ina seia silisili ona tele” (Malaki 3:10).
O nei faamanuiaga e maua e i latou uma o e totogiina atoa le sefulu pasene o tupe latou te maua, e tusa lava pe o lena aofaiga e matua laitiiti lava. A e usiusitai i lenei tulafono, o le a faamanuiaina oe faaleagaga ma faaletino e le Alii.
Faia o le Tautinoga e Totogi le Sefuluai
Pe afai e te lei faia se masani o le totogiina pea lava pea o le sefuluai, o le a oo ina faigata ona e talitonu e te mafaia ona e tuuina atu le tasi vaesefulu o au tupe maua. Peitai o tagata faamaoni i le totogiina o le sefuluai ua latou aoaoina e le mafai ona latou le totogiina le sefuluai. I se auala moni ma le matagofie, ua tatalaina pupuni o le lagi ma ua sasaa mai faamanuiaga i o latou luga.
Ia manatua o le totogiina o le sefuluai e le o tupe ae o se vaega o le faatuatua. Faatuatua i le Alii. Na Ia tuuina mai le poloaiga mo lo tatou manuia, ma na Ia tuuina mai foi le faamanuiaga o loo auina mai faatasi. Saili atu le malosi i le faatuatua o Nifae, o le na faapea mai, “Ia tatou faamaoni i le tausiga o poloaiga a le Atua, aua faauta, e silisili lona malosi i le malosi o le lalolagi uma” (1 Nifae 4:1).