Legavia

O le legavia o le mama mai feusuaiga, o se tulaga e “fiafia mai ai le Atua“ (Iakopo 2:7). Ina ia ola mama, e ao ona e mama i ou mafaufauga, upu, ma gaoioiga. E le tatau ona e faia ni sootaga tau feusuaiga ae e te le i faaipoipo faaletulafono. Pe a uma ona e faaipoipo, e tatau ona e faamaoni atoatoa i lau tane po o lau ava.

O feusuaiga faaletino i le va o le tane ma le ava e matagofie ma paia. Ua faauuina e le Atua mo le foafoaina o fanau ma le faaalia o le alofa i totonu o le faaipoipoga.

I le lalolagi i aso nei, ua taitaiina e Satani le toatele o tagata e talitonu o faiga faalefeusuaiga i fafo o le faaipoipoga, e talia. Ae peitai i fofoga o le Atua, o se agasala matautia. O se faatautala lena i le mana sa Ia aumaia ia te i tatou e foafoa ai ola. Sa aoao mai le perofeta o Alema o le agasala tau feusuaiga e sili atu ona matautia nai lo isi lava agasala vagana ai le fasioti tagata ma le faafitia o le Agaga Paia (tagai Alema 39:3–5).

O nisi tagata e taumafai e faatalitonuina i latou lava o feusuaiga i fafo atu o le faaipoipoga e talia pe afai o i la’ua o loo faia, ua alofa le tasi i le isi. E lē moni lea mea. O le solia o le tulafono o le legavia, ma uunaia o se tasi tagata e faia, e lē o se faaaliga lea o le alofa. O tagata e alofa le tasi i le isi, e lē mafai lava ona faalamatiaina e le tasi le fiafia ma le saogalemu o le isi e faataunuu ai ni tuinanauga e lē tumau faaletagata.

Pe a taufai manatu tagata uma i le tausia o le tulafono o le legavia, o le a faateleina lo latou alolofa, faatuatuaina, ma tautinoga, ma maua ai le fiafia e sili atu ma le lotogatasi. Pe a faatusatusa le eseesega, o sootaga e fausia i luga o feusuaiga lē mama e vave ona motusia. O i latou e auai i ni feusuaiga lē mama e masani ona lagona le fefe, ta’usalaina ma le matamuli. O le oona matuitui, fuā, ma le ita e masani lava ona suia lagona lelei sa i ai i a latou fegalegaleaiga.

Ua tuuina mai e lo Tatou Tama Faalelagi ia i tatou le tulafono o le legavia mo lo tatou puipuiga. O le usiusitai i lenei tulafono e taua tele mo le filemu patino ma le malosi o uiga, atoa ai ma le fiafia i totonu o le aiga. A e tausisia lou lava mama atoatoa mai feusuaiga, o le a e aloese mai le faaleagaina i la le agaga ma lagona, lea e masani ona tupu mai le faia o faigā aiga ma se tasi ae le i faaipoipo. O le a e nofouta i taitaiga, malosi, faamafanafanaga, ma puipuiga a le Agaga Paia, ma o le a e faataunuuina se tulaga manaomia taua mo le mauaina o se pepa faataga o le malumalu ma auai i sauniga o le malumalu.

Agasala Faalefeusuaiga

E tausalaina e le Alii ma Ana Perofeta feusuaiga e lē mama. O faiga faalefeusuaiga uma i fafo o le faaipoipoga ua solia ai le tulafono o le legavia ma e matautia i le faaletino ma le faaleagaga mo i latou o ē faia.

O Tulafono e Sefulu e aofia ai le tulafono e aua le mulilua, o le feusuaiga lea i le va o se tamaloa ua faaipoipo ma se tasi e ese mai lana ava po o le va o le fafine ua faaipoipo ma se tasi e ese mai lana tane (tagai Esoto 20:14). Na faapea mai le Aposetolo o Paulo “o le finagalo o le Atua” ina ia tatou “faamamao mai le faitaaga,” po o le feusuai o le tagata e lei faaipoipo ma soo se isi lava (1 Tesalonia 4:3). O loo tumau pea ona saunoa tetee atu Perofeta o aso e gata ai i nei agasala ma tetee atu i faiga faatiapolo o feusuaiga faatautala.

E faapei o isi soliga o le tulafono o le legavia, o faiga faatauātane po o le faatauāfafine, o se agasala mamafa. E faafeagai ma faamoemoega o feusuaiga a tagata (tagai Roma 1:24–32). E na te faaleagaina sootaga lelei ma taofia ai tagata mai le mauaina o faamanuiaga ia e mafai ona maua i le olaga faaleaiga ma sauniga faaola o le talalelei.

O le na o le aloese mai feusuaiga i fafo atu o le faaipoipoga e lē lava mo le tulaga faatonuina a le Alii mo le mama atoatoa o le tagata. E manaomia e le Alii se tulaga maualuga o le mama mai Ona soo, e aofia ai le faamaoni atoatoa i lou toalua i mafaufauga ma amioga. I le Lauga i luga o le Mauga, na Ia fetalai ai: “Ua outou faalogo na fai mai e anamua, Aua e te mulilua, A ou te fai atu au ia te outou, ai se vaai atu i le fafine ina ia manao i ai, ua uma ona mulilua ma ia i lona loto” (Mataio 5:27–28). I aso e gata ai na Ia fetalai mai, “Aua e te… mulilua, … pe faia soo se mea faapena” (MFF 59:6). Ma sa Ia toe faamamafaina le mataupu faavae na Ia aoaoina i le Lauga i luga o le Mauga: “Ai se vaai i se fafine ina ia manao i ai, po o le, afai e mulilua nisi i o latou loto, o le a lē ia te i latou le Agaga, a o le a faafitia le faatuatua ma matatau“ (MFF 63:16). O le lapataiga e mo tagata uma, pe ua faaipoipo pe o nofofua foi.

Afai ua e agasala i le faia o feusuaiga, ia talanoa i lou epikopo po o le peresitene o le paranesi ina ia mafai ona ia fesoasoani ia te oe i le faagasologa o le salamo (tagai “Salamo,” itulau 146–150).

Afai o loo e tauivi ma faaosoosoga tau le feusuaiga, e aofia ai le i ai o lagona e tosina atu ai i lou lava itupa, ia aua lava nei e gauai atu i na faaosoosoga. Ia e mautinoa e mafai ona e filifili e aloese mai amioga faapea. E mafai ona e maua le fesoasoaniga a le Alii pe a e tatalo atu mo le malosi ma galuega e faatoilalo ai faafitauli. O se vaega o lenei faiga, ia e fesili atu mo fautuaga mai lou epikopo po o le peresitene o le paranesi. O le a fesoasoani o Ia ia te oe.

Tausia o le Tulafono o le Legavia

E tusa lava pe o le a le malolosi o faaosoosoga, ae o le a fesoasoani le Alii ia te oe e teena pe afai e te filifili e mulimuli atu ia te Ia. Na tautino mai e le Aposetolo o Paulo, “Ua le maua e outou se tofotofoga e ese i lo tagata; a ua faamaoni le Atua, o lē na te le tuuina atu outou i le tofotofoga e sili i se mea ua outou lavatia, a e sauni foi faatasi ma le tofotofoga se mea e sao ai, ina ia outou lava oono” (1 Korinito 10:13). E mafai ona fesoasoani lenei fautuaga ia te oe e faatoilalo ai faaosoosoga faifai pea i le lalolagi ma le lē ma i aso nei:

Filifili nei e ola mama. E manaomia le na o le tasi ona e faia o lenei faaiuga. Ia faia nei loa lenei faaiuga, ae lei oo mai le tofotofoga, ma ia faamautuina lau faaiuga faatasi ai ma se tautinoga loloto ia le toe mafai ona maluelue. Ia fai nei loa lau tonu e te lē faia lava se mea i fafo atu o le faaipoipoga e faaosofia ai lagona malolosi ia e na o totonu lava o le faaipoipoga e faaali ai. Ia aua nei e faaosofiaina na lagona i le tino o se tasi tagata po o lou lava tino. Fai nei lau tonu o le a e faamaoni atoatoa i lou toalua.

Pulea ou mafaufauga. E leai se tasi na te faia le agasala taufeusuaiga i se taimi faafuasei. O gaoioiga lē mama e masani lava ona amata i mafaufauga lē mama. Afai e te faatagaina ou mafaufauga e manatu ai i mea leaga ma le lē mama, o lona uiga o lena ua e laa i le sitepu muamua e agai atu ai i le ola le mama. Sola ese faavave mai tulaga e taitaiina atu ai i le agasala. Tatalo e le aunoa mo le malosi e tetee ai faaosoosoga ma pulea ai ou mafaufauga. Ia avea lenei mea ma vaega o lau tatalo i aso taitasi.

Aloese mai tusi ma ata mataga. Aua nei matamata, faitau, pe faalogologo i soo se mea e faatupu ai pe faamatalaina ai le tino o le tagata po o se faiga faalefeusuaiga i se auala e faatupuina ai lagona. O ata ma tusi leaga e faigata ona toe alu ese ma e faataumaoia ai. E mafai ona ia faoina mai ia te oe le loto pulea ma le malosiaga e te iloa ai le matagofie o le olaga. E mafai ona tosoina ai oe i lalo ma taitaiina atu ai oe i mafaufauga faatiapolo ma amioga faasaua ma le faatautala.

Afai e le i faia sou aiga ma o loo e tafao faamasani [ma se uo], ia e faaaloalo i lē lua te tafafao faamasani. Aua lava nei e faaaogaina o ia o se mea e faamalie ai ou tuinanau. Ia fuafua ma le faaeteete gaoioiga lelei ma le malie ina ia le mafai ona tuua na o oulua ma lau uo e aunoa ma se mea e faia. Ia tafafao i nofoaga e malu puipuia e faigofie ona e pulea ai oe lava. Aua nei auai i ni talanoaga po o ni gaoioiga e faatupuina ai lagona feusuai. Aua nei faia ni kisikisiga, taotootoga faatasi pe taotooto foi i luga o le tasi tagata, pe tago i itutino sa o le tasi, pe o fai ni lavalava pe leai foi. Aua lava nei faatagaina se tasi e faia na mea ia te oe.

Afai ua e faaipoipo, ia faamaoni i lou toalua i ou mafaufauga, upu, ma taga. Na fetalai mai le Alii: “Ia e alofa atu i lau ava ma lou loto atoa, ma pipii atu ia te ia a e le o se isi. O le vaai atu foi i se fafine ina ia manao i ai o le a faafitia le faatuatua, ma o le a le maua le Agaga, ma afai na te le salamo o le a lafoaiina o ia i fafo” (MFF 42:22–23). Aua lava nei fai amio i soo se auala. I le mea sili e te mafaia, ia e taumamao mai le i ai na o oulua ma se tasi o le isi itupa. Ia e fesili ifo ia te oe lava, pe mata e fiafia lou toalua pe afai na te iloa au upu ma au taga. Ia manatua le fautuaga a le Aposetolo o Paulo ia “mamao outou ma mea leaga eseese uma lava“ (1 Tesalonia 5:22). Afai e te aloese mai ia tulaga, o le a leai se avanoa mo se tofotofoga e amata ai.

Faamagaloga mo le Tagata Salamo

O le ala sili lava o le mama atoatoa o le amio. O se mea sese le faia o agasala feusuai ma le mafaufau e na o ona e salamo mai ai lava i se taimi mulimuli. O lena ituaiga uiga, o se agasala lava lea, e faailoa ai le le migao i le Alii ma feagaiga na e osia ma Ia. Ae ui o lea, afai e te faia agasala feusuai, ua ofo mai e le Alii le faamagaloga pe afai e te salamo.

E faigata le salamo, ae e mafai. E mafai ona e toe mama (tagai Isaia 1:18). O le atuatuvale ona o le agasala, e mafai ona suia i le filemu lelei o le faamagaloga. Ina ia e iloa le mea e tatau ona faia e salamo ai, tagai “Salamo,” itulau 146–150.

Ia e galue agai atu i le aso e te agavaa ai e ulu atu i le malumalu, ia taialaina i upu a le Faisalamo:

“O ai ea se alu ae i le mauga o Ieova? O ai se tumau i lona afioaga paia?

“O le ua i ai lima mama ma le loto mama” (Salamo 24:3–4).