Galuega Faafaifeautalai
Pe a tatou mauaina faamanuiaga o le ola ai i le talalelei, tatou te mananao e fetufaai atu na faamanuiaga mo isi. Na fetalai le Alii e uiga i le olioli e oo mai i o tatou olaga pe a tatou fetufaai atu Lana talalelei:
“Afai foi e faapea ona oulua galulue i o oulua aso uma i le alagaina o le salamo i lenei nuu, ma aumaia, tau lava o se agaga e toatasi ia te au, faauta i le tele o lo outou olioli faatasi ma ia i le malo o lo’u Tama.
“Ma o lenei, afai o le a tele lo outou olioli faatasi ma se agaga e toatasi ua oulua aumaia ia te au i le malo o lou Tama, faauta i le sili atu o lo outou olioli pe afai lua te aumaia ni agaga e toatele ia te au!” (MFF 18:15–16).
O Le Tiute Faafaifeautalai a Tagata Taitoatasi o le Ekalesia
Na folafola mai e le Alii e faapea o le galuega faafaifeautalai o le tiutetauave o tagata uma o le Au Paia o Aso e Gata Ai (tagai MFF 88:81). I le avea ai ma tagata o le Ekalesia a le Alii, e te mafaia, e ala mai lou ola i se olaga lelei ma le malosi o lau molimau, ona fesoasoani e saunia tagata o lou aiga, uo, ma nisi tou te fegalegaleai faatasi ina ia feiloai atu i faifeautalai.
O le savali faafaifeautalai e aupito sili ona mamana e mafai ona e tuuina atu, o au lava faataitaiga i le ola ai i se olaga fiafia o se Au Paia o Aso e Gata Ai. Ia manatua e lē auai mai tagata i le Ekalesia ona na o mataupu faavae o le talalelei ua latou aoaoina. Latou te auai mai ona latou te lagonaina se mea ua amata ona faamalieina ai o latou manaoga faaleagaga. Afai e te faamaoni i lau faauooga ma i latou, o le a mafai ona latou lagona le agaga o lau molimau ma lou fiafia.
I le faaopoopo atu i se faataitaiga lelei, e mafai ona e “saunia e tali atu ia i latou uma o e fesili mai ia te outou i le uiga o le faamoemoe o loo ia te outou” (1 Peteru 3:15). E mafai ona e tatalo mo avanoa e talanoa atu ai i isi e uiga i le talalelei toefuataiina. Ma o le a mafai ona e nofo saunia, aua e toatele tagata ua latou manaomia le upumoni.
Auauna Atu i se Misiona Tala’i
Ina ua mavae Lona Toetu mai, sa poloaiina ai e le Alii Lona au soo e “o … ma fai nuu uma lava ma soo, ma papatiso atu ia te i latou i le suafa o le Tama, ma le Atalii, ma le Agaga Paia” (Mataio 28:19). I le faataunuuina o lea poloaiga, o alii talavou agavaa uma i le Ekalesia o loo i ai le tiutetauave e saunia ai i latou i la le agaga, o la le tino, ma lagona e auauna atu o ni faifeautalai faamisiona. O tamaitai nofofua ma ulugalii matutua e mafai foi ona maua le avanoa e galulue auauna ai i se misiona. Afai e te manao e auauna atu o se faifeautalai faamisiona, talanoa i lou epikopo po o lou peresitene o le paranesi.
Auauna atu i Tagata Faatoa Auai i le Ekalesia
O le galuega faafaifeautalai e aofia ai le fesoasoani atu ma lagolagoina i latou o e ua auai i le Ekalesia. A o e manatunatu loloto i lenei matafaioi, ia manatua e ono feagai tagata fou ma tofotofoga i le taimi latou te auai mai ai i le Ekalesia. O a latou tautinoga fou ua manaomia ai e i latou ona tuueseina uiga tuai, o uo ma ē na masani ona latou fegalegaleai. E le gata i lea, ae e faailoa atu foi e le Ekalesia se ituaiga o olaga fou e ono foliga mai e ese ma faigata.
O tagata taitoatasi faatoa auai mai i le Ekalesia, e manaomia e i latou mea e tolu: o se uo, o se tiutetauave, ma le faafaileleina pea o i latou i “le afioga lelei a le Atua” (Moronae 6:4). E mafai ona avea oe ma se vaega o lenei taumafaiga e tuuina atu lea fesoasoani. E mafai ona avea pea oe ma se uo. E tusa lava pe e te le o i ai i le tulaga e tuuina atu ai se tofiga aloaia po o ni matafaioi i totonu o le Ekalesia, ae e mafai lava ona e galue i tafatafa o tagata fou i galuega auauna atu. Ma e mafai foi ona e saili i avanoa e fetufaai atu ai le afioga a le Atua ma tagata faatoa auai mai.