Puapuaga
O se vaega o le ata o le faaolataga a le Tama Faalelagi, lou fetaiai ma puapuaga i le taimi o le olaga faaletino. O tofotofoga, o mea e lē fiafia ai, faanoanoaga, ma’i, ma le loto tiga, o ni vaega faigata o le olaga, ae peitai e mafai ona latou taitaiina atu i le tuputupu a’e faaleagaga, faaleleia atili, ma le alualu i luma a o e liliu atu i le Alii.
O puapuaga e eseese mafuaaga e oo mai ai. E ono mafai i nisi taimi ona lua fetaiai ma tofotofoga, o se taunuuga lea o lou faamaualuga ma le le usiusitai. O nei tofotofoga e mafai ona aloese mai ai e ala i le ola amiotonu. O isi tofotofoga o ni vaega faanatura o le olaga ma e ono oo mai i taimi o loo e ola amiotonu. Mo se faataitaiga, e mafai ona tupu ia te oe tofotofoga i taimi o ma’i, po o le lē mautonu, po o le oti foi o e pele. E oo mai puapuaga i nisi o taimi ona o filifiliga le lelei ma upu ma gaoioiga faatiga a isi.
Tali atu ma le Faatuatua i Puapuaga
O lou manumalo ma le fiafia, i le taimi nei ma le faavavau, e faalagolago tele lea i lau tali atu i faigata o le olaga.
O se tala i totonu o le Tusi a Mamona ua faailoa mai ai tali eseese i puapuaga. Sa faimalaga le perofeta o Liae ma lona aiga i le vao mo le tele o aso, ma faaaoga a latou aufana ma aū e saili ai meaai. Sa fetaia’i le aiga ma faigata ina ua le toe mafai ona faaaoga aufana a atalii o Liae. Sa le toe malolosi aufana a Lamana ma Lemuelu, ma ua le toe aoga foi le aufana a Nifae. Sa fia aai ma vaivai, ma ua amata ona muimui Lamana ma Lemuelu i le Alii. E oo lava ia Liae na amata foi ona muimui. Ae o Nifae, sa le manao e faavaivai. Sa ia alu e galue. Na tomanatu: “Ua oo foi ina faia e au o Nifae le aufana laau, ma le u i le laau sagatonu. O lenei foi, ua ou fai auupega aū i le aufana ma le u, atoa ma le maata ma maa. Ua ou fai atu foi i lo’u tama: Po o fea le mea ou te alu i ai e maua ai mea e ai?” Na faamaualaloina Liae ona o upu a Nifae, ma sa fesili atu ai o ia i le Alii po o fea latou te o e maua mai ai ni meaai? Na tali mai le Alii i ana tatalo ma taitaiina Nifae i se nofoaga e mafai ona maua mai ai meaai. (Tagai 1 Nifae 16:15–31.)
O nisi tagata a fetaiai ma faigata, e pei lava i latou o Lamana ma Lemuelu. Latou te feitai ma tomumumu. Latou te fesili i fesili nei, “Aisea ua tupu ai ia te au nei mea? E tatau ea i se a ona ou puapuagatia i lenei mea i lenei taimi? O le a se mea sa ou faia ua talafeagai ai ona oo mai lenei mea?” Ae o nei fesili e i ai le malosiaga e osofaia ai o latou mafaufauga. O fesili faapenei e faigata ai ona latou malamalama, e mitiia ai lo latou malosi, ma faoa mai ia i latou le malamalama e finagalo le Alii ia latou maua. Nai lo lou tali atu i ai faapena, e ao ona e mulimuli i le faataitaiga a Nifae. Mafaufau e fesili atu i fesili e pei o le, “O le a le mea e tatau ona ou faia? O le a se mea e tatau ona ou aoaoina mai lenei mea na tupu? O le a se mea e ao ona ou suia? O ai e tatau ona ou fesoasoani i ai? E faapefea ona ou manatuaina ou faamanuiaga e tele i taimi o faigata”
E manaomia tali eseese mo puapuaga eseese. Mo se faataitaiga, afai e aafia oe i se ma’i, atonu pau lava le mea e fai o lou onosai ma faatuatua. Afai e te mafatia ona o upu ma amioga faatiga a isi, e ao ona e galue agai i le faamagaloina o e sa faatuāupua oe. Afai sa aafia fua oe i se faiga saua po o le faatautala, e ao ona e sailia loa lava se fesoasoani. Afai e oo mai tofotofoga ona o lou lava le usitai, e ao ona faasa’o lau amio ma sailia ma le agaga maualalo le faamagaloga.
E ui lava ina eseese nisi o au tali i puapuaga, ae tasi le tali e tatau lava ona le suia—o lou faalagolago lea i le Tama Faalelagi ma Iesu Keriso. Sa aoao mai le perofeta o Alema, “O i latou uma o e faalagolago i le Atua, e lagolagoina i latou i o latou tofotofoga, ma o latou tiga, ma o latou puapuaga, e faaeaina foi i latou i le aso gataaga” (Alema 36:3).
Faalagolago i le Tama Faalelagi ma Iesu Keriso
Pe a e faalagolago i le Tama ma le Alo, ua e mautinoa e alolofa faamaoni i La’ua ia te oe—ma e finagalo i La’ua ia e fiafia ma o le a La fesoasoani ia te oe ia faatupula’ia lou faaleagaga. Ia e tausi i poloaiga. Ia e saili ia iloa lo La’ua finagalo, ma faia mea La te finagalo ai e tusa lava pe o e manao i se isi mea. O au tatalo mo se fesoasoani, ia faia faatasi ma lou malamalama o le a le foia e le Tama Faalelagi mea uma i se taimi vave—anei Na te faatagaina oe e te faatali ina ia mafai ona faaauau pea ona e aoao ma faatupula’ia ai. O nei mea uma, o le a e maua ai le faamafanafanaga i le mautinoa lea e malamalama lelei le Faaola i ou tofotofoga. O se vaega o Lana Togiola le iu, na Ia tauaveina ai i Ona luga, “puapuaga ma ma’i o lona nuu.” Na Ia tauaveina i Ona luga “o latou vaivai, ina ia faatumuina lona alo i le alofa e tusa ma le faaletino, ina ia silafia e ia e tusa ma le tino le ala e tausi ai lona nuu e tusa ma o latou vaivai” (Alema 7:11–12). Ona sa ia tauaveina ou tiga, Na te silafia le ala e fesoasoani ai ia te oe. Afai e te taulai atu ia te Ia i le faatuatua, o le a Ia faamalosia oe ina ia e lavātia soo se tofotofoga e oo atu ia te oe.
Ao e taumafai e faalagolago i le Alii i taimi o tofotofoga, ia e manatua le fautuaga lenei na tuuina atu i le Perofeta o Iosefa Samita:
“O lē faamaoni i puapuaga e sili atu lona taui i le malo o le lagi.
“Tou te le mafaia ona vaai i o outou mata faaletino, i lenei olaga le faatatauga a lo outou Atua e uiga i na mea o le a oo mai i aso lumanai, atoa ma le mamalu e mulimuli ai pe a mavae puapuaga e tele.
“Aua e oo mai faamanuiaga pe a mavae atu puapuaga e tele ” (MFF 58:2–4).
Mauaina o le Filemu ma le Olioli i taimi o Puapuaga
E mafai ona e maua le filemu ma le olioli e tusa lava pe te lua tauivi ma luitau ma faanoanoaga. O loo i ai i le Tusi a Mamona ni faamaumauga o ni tagata amiotonu o e na aoaoina lenei mea moni. A o puapuaga i le pologa i lalo o se pulega saua, sa sasaa atu o latou loto i le Atua (tagai Mosaea 24:8–12). Na tali mai le Alii:
“Ina faaea ia o outou ulu ma ia lototetele aua ua ou iloa le feagaiga ua outou osia ma au; Ou te faia foi le feagaiga ma lo’u nuu ma laveai ia te i latou ai le nofopologa.
“Ou te faamāmāina foi avega ua faaeeina i o outou tauau ina ia outou le lagona ai lava i outou tua, manu lava o outou nofo pologa. Ou te faia foi lenei mea ina ia outou laulaututu e fai ma molimau ia te au i aso amuli ina ia outou mautinoa lava o au o le Alii le Atua, ua asiasi atu i lo’u nuu i o latou puapuaga” (Mosaea 24:13–14).
Sa tali atu tagata i le faatuatua, ma “faamamasagia ai avega na faaeeina ia i [latou] ioe ua faamalolosia i latou e le Atua ina ia faigofie ona latou tauave a latou avega, ma ua latou gauai ma le loto fiafia ma le onosai i le finagalo atoa o le Atua“ (Mosaea 24:15).
E faapei o nei tagata amiotonu, e mafai ona e “gauai ma le loto fiafia ma le onosai i le finagalo atoa o le Atua,” i le iloa o le a Ia faamalosia oe i ou puapuaga. Ua Ia folafola mai, “O mea uma foi na puapuagatia ai outou o le a galulue faatasi mo lo outou lelei atoa ma le mamalu o lo’u igoa” (MFF 98:3).