Ata o le Faaolataga

I le muai olaga, sa saunia ai e le Tama Faalelagi se fuafuaga e mafai ai ona avea i tatou faapei o Ia ma maua ai le atoatoa o le fiafia. O loo taua i tusitusiga paia lenei fuafuaga o le “ala o le olataga” (Alema 24:14; Mose 6:62), “le ala sili o le fiafia” (Alema 42:8), “le ala sili o le togiola” (Iakopo 6:8; Alema 12:30), ma “le ala o le alofa” (Alema 42:15).

O le ata o le faaolataga o le atoatoaga o le talalelei. E aofia ai le Foafoaga, le Pau, le Togiola a Iesu Keriso, ma tulafono uma, sauniga, ma aoaoga faavae o le talalelei. O le saolotoga lelei, lea e mafai ai ona tatou filifili mo i tatou lava e taua foi i le fuafuaga a le Tama Faalelagi. Ona o lenei fuafuaga, ua mafai ai ona faaatoatoaina i tatou e ala i le Togiola, mauaina le atoatoa o le fiafia, ma nofo e faavavau ai i le afioaga o le Atua. E mafai e o tatou sootaga faaleaiga ona oo atu lona malosi i le faavavau.

O oe o se tasi o loo auai i le fuafuaga a le Tama Faalelagi, ma o lou aafiaga e faavavau e mafai ona vaevaeina i ni vaega autu se tolu: muai olaga, olaga faitino, ma le olaga pe a mavae le oti. Pe a oo ina e malamalama i le fuafuaga, o le a e maua ai tali o fesili o loo fesiligia pea e le toatele o tagata: O fea na tatou o mai ai? Aisea ua tatou i ai iinei? O fea tatou te o i ai pe a mavae lenei olaga?

Muai Olaga

Ae e te le i fanau mai i luga o le fogaeleele, sa e nofo ai i le afioaga o lou Tama Faalelagi o se tasi o Ana fanau agaga. I lea muai olaga, sa e auai i se fono sili faatasi ma nisi o fanau agaga a le Tama Faalelagi. I lena fono sili, sa faailoa atu ai e le Tama Faalelagi Lana fuafuaga sili o le fiafia (tagai Aperaamo 3:22–26).

Ina ia o gatasi ma le fuafuaga o le fiafia, o lea na osi feagaiga ai Iesu Keriso, le Uluai Atalii o le Tama i le agaga, e avea ma Faaola (tagai Mose 4:2; Aperaamo 3:27). O i latou na mulimuli i le Tama Faalelagi ma Iesu Keriso na faatagaina ina ia o mai i le lalolagi ina ia ola ai i le olaga faitino ma aga’iga’i atu ai i luma seia oo atu i le ola e faavavau. O Lusifelo, o le isi atalii agaga o le Atua, sa tetee i le fuafuaga ma sa “saili e faaumatia le saolotoga o le tagata” (Mose 4:3). Sa avea ai o ia o Satani, ma tulieseina ai faatasi ma i latou sa mulimuli ia te ia, mai le lagi ma lē maua ai e i latou le avanoa e maua ai tino faitino ma ola ai i le olaga faitino (tagai Mose 4:4; Aperaamo 3:27–28).

I le gasologa o lou i ai i le muai olaga, sa atiina ae ai lou faasinomaga ma faateleina ai lou malosi faaleagaga. I le faamanuiaina ai o oe i le meaalofa o le saolotoga e filifili ai, sa e faia ai ni filifiliga taua, e pei o le filifiliga e mulimuli i le fuafuaga a le Tama Faalelagi. O nei filifiliga e i ai sona aafiaga i lou olaga i na taimi ma le taimi nei. Sa e tupu ae i le malamalama ma e aoao e te alofa ma fiafia i le upumoni, ma sa e saunia ai e te sau i le fogaeleele, lea e mafai ai ona faaauau pea ona e agai i luma.

Olaga Faitino

Ua e maua nei aafiaga o le olaga faitino. Ua tuu faatasia lou agaga ma lou tino, lea ua tuuina atu ai ia te oe avanoa e te ola ai ma atiina ae ai oe i ala sa le mafai ona faia i le muai olaga. O lenei vaega o lou olaga o se taimi o le aoaoina lea e mafai ai ona e faamaoniaina oe lava, filifili ai e sau ia Keriso, ma saunia ai ina ia agavaa mo le olaga e faavavau. O se taimi foi e mafai ai ona e fesoasoani atu i isi ina ia latou mauaina le upumoni ma mauaina se molimau i le ata o le faaolataga.

Olaga pe a Mavae le Oti

Pe a e oti, o le a alu atu lou agaga i le lalolagi o agaga ma faatali ai le toetu. I le taimi o le toetu, o le a toe tuufaatasia lou agaga ma lou tino, ma o le a faamasinoina oe ma tuuina atu ai i se malo o le mamalu. O le mamalu o le a e ulu atu i ai o le a faalagolago lea i le loloto o lou liua ma lou usiusitai i poloaiga a le Alii (tagai “Malo o le Mamalu,” itulau 102–104). E faalagolago i le ala na e “talia [ai] le mau ia Iesu” (MFF 76:51; Tagai foi i le fuaiupu 74, 79, 101).

Faamanuiaga e ala mai i le Malamalama i le Fuafuaga

O se molimau i le ata o le faaolataga, e mafai ona avatua ia te oe le faamoemoe ma le mafuaaga a o e tauivi ma lu’itau o le olaga. E mafai ona e maua le faamautinoaga, i lou malamalama o oe o se atalii/afafine o le Atua ma sa e ola ai i Lona afioaga ae e te lei fanau mai i le fogaeleele. E mafai ona e iloa le taua o lou olaga iinei, i lou iloaina lea o au galuega i le olaga faitino e i ai se aafiaga i lou taunuuga e faavavau. O lenei malamalama, e mafai ai ona faavae filifiliga taua i luga o upumoni e faavavau nai lo tulaga fesuisuiai o le olaga. E mafai ona faaauau pea ona faaleleia au sootaga ma tagata o lou aiga, i lou fiafia lea i le folafolaga e mafai ona faavavau lou aiga. E mafai ona e mauaina le fiafia i lau molimau i le Togiola ma poloaiga, sauniga, feagaiga ma mataupu faavae a le Alii, pe a e iloa “o lē faia galuega o le amiotonu o le a maua ai lona taui, o le filemu lea i lenei lalolagi, ma le olaga faavavau i le lalolagi a sau (MFF 59:23).