Aiga Atua

O le mataupu faavae o le faatuatua muamua e faapea, “Matou te talitonu i le Atua le Tama Faavavau, ma Lona Alo o Iesu Keriso, ma le Agaga Paia.” O nei tagata e toatolu e fausia ai le Aiga Atua. Latou te pulefaamalumalu i le lalolagi ma isi foafoaga uma a lo tatou Tama i le Lagi.

O le aoaoga faavae moni e uiga i le Aiga Atua na leiloa i le liliuese lea na tupu ina ua mavae le misiona a le Faaola i le olaga nei, ma le maliliu o Ana Aposetolo. O lenei aoaoga faavae na amata ona toefuataiina mai ina ua maua e Iosefa Samita i le 14 o ona tausaga le Uluai Faaaliga (tagai Iosefa Samita—Talafaasolopito 2:17). Mai le faamatalaga o le Uluai Faaaliga e le Perofeta ma isi ana aoaoga, ua tatou iloa ai o sui o le Aiga Atua e tolu tagata mavaevae. O le Tama ma le Alo e i ai tino o aano ma ivi, ae o le Agaga Paia o se peresona o agaga (tagai MFF 130:22).

E ui lava o sui o le Aiga Atua o ni tagata mavaevae, ma mavaevae foi a latou matafaioi, ae e tasi i latou i le faamoemoe ma le mataupu. E atoatoa lo latou lotogatasi i le faataunuuina o le ata o le faaolataga paia a le Tama Faalelagi.

Mau Faaopoopo: Mataio 3:13–17; Ioane 14:6–10; 17:6–23; Galuega 7:55–56; 2 Nifae 31:18; Mamona 7:5–7; MFF 76:20–24

Tagai foi Agaga Paia; Iesu Keriso; Le Atua le Tama