Loto Faafetai

Na folafola mai e le Alii, “O lē talia foi mea uma ma le faafetai o le a faamamaluina“ (MFF 78:19). O le loto faafetai o se uiga faagaeetia ma le faaeaina. Atonu e mafai ona e faapea ifo mai mea na tutupu ia te oe e sili atu lou fiafia pe afai e ia te oe le loto faafetai. E le mafai ona e ita, lē fiafia, pe leaga le loto pe a e faafetai.

Ia faafetai mo ou faamanuiaga matagofie. Ia faafetai mo avanoa e tele ua e maua. Ia faafetai atu i ou matua. Ia faailoa atu ia te i la’ua lou loto faafetai. Ia faafetai atu i au uo ma ou faiaoga. Ia faailoa atu lou agaga faafetai i tagata uma o ē na faia se mea lelei mo oe pe fesoasoani ia te oe i soo se itu.

Ia faafetai i lou Tama Faalelagi mo Lona agalelei ia te oe. E mafai ona e faaali atu lou loto faafetai i le Atua e ala i le faailoa o Lona aao i mea uma, faafetai atu ia te Ia mo mea uma ua Ia tuuina mai ia te oe, tausi Ana poloaiga, ma auauna atu i isi. Faafetai atu ia te Ia mo Lona Alo Pele, o Iesu Keriso. Faaali atu le faafetai mo faataitaiga sili a le Faaola, mo Ana aoaoga, mo Lona aao mafola e siitia ma fesoasoani, mo Lana Togiola lē i’u.

Faafetai atu i le Alii mo Lana Ekalesia toefuataiina. Faafetai ia te Ia mo mea uma ua ofoina mai mo oe. Faafetai ia te Ia mo uo ma aiga. Ia avea se agaga o le faafetai e taitai ma faamanuia ai ou aso ma po. Ia galue e atiina ae le loto faafetai. O le a e iloa e aumaia ai ni taunuuga matagofie.