Faigamalo a le Malo ma Tulafono
O le vaega 134 o le Mataupu Faavae ma Feagaiga o loo otootoina ai “talitonuga e uiga i malo ma tulafono lautele” o le au paia o aso e gata ai. (MFF 134, ulutala o le vaega). O loo aofia i lea vaega faamatalaga nei:
“Matou te talitonu ua faatuina malo e le Atua mo le lelei o tagata; ma o loo na faia tagata e tali atu mo a latou faiga e uiga i ia malo, i le faia o tulafono atoa ma le faaaogaina, mo le lelei ma le saogalemu o tagata uma… .
“Matou te talitonu, e ao i tagata uma ina lagolagoina ma faamalosia malo o loo latou nononfo ai ao puipuia i latou i a latou aia faaletagata e le mafesuiaina e tulafono a ia malo, ma o solitulafono ma fouvalega e le tatau ai lava mo tagata uma ua faapea ona puipuia, ma e ao ina faasalaina tatau; o malo uma foi e i ai le aia e faatuina tulafono e tatau ai e tusa ma lo latou malamalama ina ia faamautu fuafuaga faamoemoeina a tagata uma; ae ui i lea, e faamamalu pea le saolotoga o le loto fuatiaifo.
“Matou te talitonu e ao ina faaaloalogia tagata uma i lona tulaga e pei o pule ma faipule ua tofia mo le puipuiga o e mama, ma le faasalaina o e solitulafono, o tulafono foi e tatau ona faaaloalo ma ava i ai tagata uma, aua a aunoa ma ia tulafono o le a suia le filemu ma le lotogatasi i le pule faamalosi ma le matata’u, o tulafono tau tagata ua faatuina mo le aoga o le faatulagaina o o tatou faamoemoe o tagata taitoatasi ma atunuu ma le va o le tagata ma le tagata; ma tulafono paia ua tuuina mai mai le lagi, ua faavae ai tulafono i mea faaleagaga mo le faatuatua ma le tapuaiga, o ia mea e lua e tali atu ai e le tagata i Lē na faia o ia” (MFF 134:1, 5–6).
E tasi le elemene autu o le tuueseeseina o le ekalesia ma le malo, o le matafaioi lea a le malo e tuuina atu le saolotoga e tapuai ai. E lagolagoina e perofeta o Aso e Gata Ai lenei mataupu faavae, o pei ona tusia i le mataupu faavae lona sefulutasi o le faatuatua: “Matou te tautino atu e ia i matou le aia matou te tapuai atu ai i le Atua Silisili e tusa ai ma o matou loto fuatiaifo, ma matou te tuuina atu foi lenei aia tatau i tagata uma e faitalia i latou pe faapefea, po o fea, po o le a foi latou te auauna i ai.” E o gatasi ma le tuueseeseina o le Ekalesia ma le malo, e le saini faamaonia e le Ekalesia se pati faaupufai po o se sui tauva. E le faatagaina foi le faaaogaina o ona fale ma fanua mo faamoemoega faapolokiki. E le auai le Ekalesia i faiga faapolokiki sei vagana ua i ai se fesili e aafia ai le mea sao ua avea ma se faafitauli, lea e masani lava ona faailoa faalauaitele atu ai se manatu o le Ekalesia.
E ui lava ina leai se vaega faapolokiki e faapito i ai le Ekalesia, ae ua uunaia tagata taitoatasi o le Ekalesia e auai o ni tagatanuu. I le avea ai o oe ma se au paia o aso e gata ai, e ao ona e malamalama i lou nofoaga ma lou tulaga i le atunuu o loo e nofo ai. Aoao i le talafaasolopito, ma tulafono a le atunuu. Afai e te maua le avanoa e palota ai ma e auai i mataupu faalemalo, ia auai ma le malosi i le lagolagoina ma le puipuia o mataupu faavae o le mea moni, amiotonu, ma le saolotoga.