Isi Punaoa
Meaalofa Faaleagaga

Meaalofa Faaleagaga

O meaalofa faaleagaga o faamanuiaga po o tomai e tuuina mai e le mana o le Agaga Paia. E tuuina mai e le Atua a itiiti lava o le tasi o nei meaalofa i tagata faamaoni uma o le Ekalesia. A e mauaina nei meaalofa, o le a latou faamalosia ma faamanuiaina oe lava ia ma fesoasoani ai ia te oe e te auauna atu ai i isi. (Tagai MFF 46:8–12.) O loo aoao mai tusitusiga paia i le tele o meaalofa a le Agaga:

  • Malamalama “O Iesu Keriso o le Atalii o le Atua, ma sa faasatauroina o ia mo agasala a le lalolagi” (MFF 46:13).

  • O le mana e talitonu ai i upu a i latou e molimau mai ia Iesu Keriso (tagai MFF 46:14).

  • Malamalama i “le eseesega o pulega” (MFF 46:15; tagai foi i le 1 Korinito 12:5). O lenei meaalofa e faaaogaina i le pulea ma le taitaiina o le Ekalesia.

  • Malamalama i “eseesega o galuega,” e fesoasoani ia i tatou e iloa ai pe o se aoaoga po o se uunaiga e sau mai le Atua pe mai se isi auala (MFF 46:16; tagai foi i le 1 Korinito 12:6–7).

  • O le meaalofa “o le Upu o le Poto” (1 Korinito 12:8; MFF 46:17). E le o faatatau i le tulafono lea ua tatou iloa o le Upu o le Poto. Ae, o le meaalofa o le atamai—o le iloa lea ona faaaogaina o le malamalama i auala amiotonu.

  • O le meaalofa “o le upu o le malamalama” (1 Korinito 12:8; MFF 46:18).

  • O le mafai lea ona e aoao atu e ala i le mana o le Agaga Paia (tagai Moronae 10:9–10; tagai foi i le MFF 46:18).

  • O le meaalofa o le faatuatua (tagai 1 Korinito 12:9; Moronae 10:11).

  • O le meaalofa “ia maua le faatuatua e faamaloloina ai” (MFF 46:19).

  • O le meaalofa “ia maua le faatuatua e faamalolo atu ai” (MFF 46:20; tagai foi i le 1 Korinito 12:9; Moronae 10:11).

  • “O le faia o vavega” (1 Korinito 12:10; MFF 46:21; tagai foi i le Moronae 10:12).

  • O le meaalofa o valoaga (tagai 1 Korinito 12:10; Moronae 10:13; MFF 46:22). Na aoao mai e Ioane le Soo Pele e faapea “o agaga o valoaga o le mau lea ia Iesu” (Faaaliga 19:10).

  • “Iloa agelu ma agaga e auauna mai” (Moronae 10:14).

  • “Iloatino le eseesega o Agaga” (1 Korinito 12:10; MFF 46:23).

  • O le meaalofa o le tautala i gagana eseese (tagai 1 Korinito 12:10; Moronae 10:15; MFF 46:24).

  • O le meaalofa o le “faamatalaga o gagana” (1 Korinito 12:10; MFF 46:25; tagai foi i le Moronae 10:16).

O nei meaalofa faaleagaga ma isi o loo i totonu o tusitusiga paia ua na o ni nai faataitaiga o le tele o meaalofa a le Agaga. E ono faamanuiaina e le Alii oe i nisi auala e faalagolago i luga o lou faatuatua ma ou manaoga faapea foi ma manaoga o i latou o loo e auauna atu i ai. Ua Ia poloaiina i tatou ina ia tatou galulue ma le filiga ina ia tatou mauaina faamanuiaga faaleagaga:

“Ia faaeteete ai ne’i olegia outou; ma ia matua saili atu i meaalofa sili ina ia le olegia outou, a ia manatua pea lava pe na tuuina atu i se a ia mea;

“Aua e moni, ou te fai atu ia te outou, ua tuuina atu ia mea mo le lelei o e alolofa mai ia te au ma tausi au poloaiga uma, ma le tausisi e faia faapea; ina ia faamanuiaina i latou uma o e saili ma ole mai ia te au” (MFF 46:8–9; Tagai foi i le fuaiupu e 26).