Isi Punaoa
Aualofa

Aualofa

O le Aualofa na faavaeina e le perofeta o Iosefa Samita i le aso 17 Mati 1842, i Navu, Ilinoi. E lua faamoemoega na i ai i le Aualofa i le taimi na faavaeina ai: mo le tuuina atu o fesoasoani i e matitiva ma e le tagolima ma le faaolaina o agaga. O loo faaauau pea le faalapotopotoga i le taimi nei, o loo tumau pea ma le faamaoni i na uluai mataupu faavae o le taitaiga. I le salafa o le lalolagi, e galulue faatasi tuafafine o loo i le Aualofa ma ē o umia le perisitua e tauaveina le misiona a le Ekalesia. E lagolagoina e le tasi le isi a o latou:

  • Faateleina a latou molimau ia Iesu Keriso e ala i le tatalo ma le suesue i tusitusiga paia.

  • Sailia le malosi faaleagaga e ala i le mulimuli i uunaiga a le Agaga Paia.

  • Gaua’i atu i latou lava i le faamalosia o ulugalii, o fanau, ma aiga.

  • Iloa le tamalii o le tulaga faatina ma olioli i le tulaga faatama’ita’i.

  • Fiafia e auauna atu ma faia galuega lelei.

  • Fiafia i le olaga ma le aoaoina.

  • Tu atu mo le upu moni ma le amiotonu.

  • Lagolago le perisitua o le pule a le Atua i le fogaeleele.

  • Olioli i faamanuiaga o le malumalu.

  • Malamalama i lo latou taunuuga paia, ma taumafai ina ia faaeaina.

Afai o e i ai i le Aualofa, o se tasi o auala e mafai ai ona tuuina atu sou sao i le misiona a le faalapotopotoga, o le taliaina lea o se matafaioi o le avea ai ma se faiaoga asiasi. A o e asiasi ma auauna atu i uso ua tofia oe i ai, ia faaaluina se taimi e aoao atu ai le talalelei ma atiina ae ni uiga faauo. E le gata i le auauna atu i tagata taitoatasi, ae e mafai ona e faia se vaega taua o le faamalolosia lea o aiga.

E tatau i taitai i totonu o uarota ma paranesi ona mautinoa ua tofia ni faiaoga asiasi i tuafafine uma o e ua 18 tausaga pe sili atu foi lo latou matutua. O taitai perisitua ma taitai o le Aualofa e tatau ona tulitulitatao pea faiaoga asiasi, ina ia fesoasoani e faataunuuina manaoga faaleagaga ma le faaletino o tuafafine taitasi.

I le avea ai o oe ma se tamaitai o le Aualofa, o oe o se tasi o le usoga a tamaitai o le lalolagi atoa, ua faatasia i le loto faamaoni ia Iesu Keriso. Ua soofaatasi oe ma isi afafine o le Atua o ni tamaitai o le faatuatua, e amioatua, e silasila mamao, ma alofa mama, faatasi ai ma le malamalama ua mautu lelei, e i ai se uiga, faamoemoega, ma se faasinomaga o lou olaga. O lou auai i le Aualofa, e te maua ai avanoa e te olioli ai i le mafutaga faaleusoga ma paaga, tuuina atu auaunaga manaomia, fetufaai atu lau molimau ma au taleni, ma tuputupu ae ai faaleagaga.