Aiga

I le aso 23 o Setema, 1995, na fofogaina mai ai e Peresitene Gordon B. Hinckley, le Peresitene lona 15 o le Ekalesia, le folafolaga lenei i se sauniga aofai a le Aualofa. O lenei faasilasilaga musuia, ua faaulutalaina “O Le Aiga: O Se Folafolaga i le Lalolagi,” ua avea ma tautinoga aloaia a le Ekalesia e uiga i le aiga:

“O i matou o le Au Peresitene Sili ma le Aufono a le Au Aposetolo e Toasefululua o le Ekalesia a Iesu Keriso o le Au Paia o Aso e Gata ai, matou te tautino atu ma le faamaoni o le faaipoipoga i le va o se alii ma se tamaitai ua faauuina e le Atua ma o le aiga o le totonugalemu lea o fuafuaga a le Foafoa mo le taunuuga e faavavau o Lana fanau.

“O tagata soifua uma - tane ma le fafine ua foafoaina i le faatusa o le Atua. O i latou taitoatasi o se atalii po o se afafine faaleagaga faapelepele a ni matua faalelagi ma o lea ua tofu ai i latou taitoatasi ma se natura ma se taunuuga paia. O le tulaga tane po o le fafine (o le tagata) o se vaega taua lea o le muai olaga, olaga faitino ma lona faamoemoe e faavavau.

“I le muai olaga, sa iloa ma tapuai atalii ma afafine faaleagaga i le Atua o lo latou Tama e Faavavau ma sa [latou] talia Lana fuafuaga e mafai ai e Lana fanau ona maua ni tino faaletino ma le tomai faalelalolagi latou te maua ai le atoatoaga ma iloa tino ai lona taunuuga paia o se suli o le ola e faavavau. O le fuafuaga paia o le fiafia ua mafai ai ona faaauau fegalegaleaiga faaleaiga i tala atu o le tuugamau. Ua mafai i sauniga paia ma feagaiga ua maua i malumalu paia ona toe foi atu ai tagata taitoatasi i le afioaga o le Atua ma toe faatasia aiga e faavavau.

“O le uluai poloaiga na tuuina e le Atua ia Atamu ma Eva, e faatatau i lo la agavaa mo tulaga faamātua o se tane ma se ava. Matou te tautino atu o le poloaiga a le Atua i Lana fanau ia fanafanau ma uluuluola ai le lalolagi ua faamalosia ma faatumauina. Matou te toe tautino atu foi ua poloai mai le Atua o mana paia o le foafoaina o fanau ua na o le va lava o le alii ma le tamaitai ua faaipoipoina faaletulafono, o se tane ma le ava e tatau ona faaaogina ai.

“Matou te tautino atu o le ala ua foafoaina ai le ola faitino ua faatuina i le finagalo paia. Matou te faamaonia le paia o le ola ma lona taua i le fuafuaga e faavavau a le Atua.

“O le tane ma le ava ua i ai le tiutetauave paia e alofa ma tausi e le tasi le isi ma a la fanau. O fanau o le tofi lea mai le Alii’ (Salamo 127:3). Ua i ai i matua se tiute paia e tausia a latou fanau i le alofa ma le amiotonu, ia tuuina atu i ai mea e manaomia i le faaleagaga ma le faaletino, ia aoao i latou e alolofa ma feauaunaa’i, ia tausia poloaiga a le Atua ma avea ma tagatanuu usiusitai i tulafono i soo se mea e nonofo ai. O tane ma ava – tina ma tamā - o le a latou tali atu i le Atua mo le faataunuuina o nei mea e ao ona faia.

“O le aiga ua faauuina e le Atua. O le faaipoipoga i le va o le alii ma le tamaitai e taua i Lana fuafuaga e faavavau. E tatau ona fanauina fanau i totonu o feagaiga o le faaipoipoga ma ia tausia e se tamā se tina o ē ua faamamaluina ma le faatuatua atoatoa feagaiga faaleulugalii. E maua le fiafia i le olaga faaleaiga pe a faavae i aoaoga a le Alii o Iesu Keriso. O faaipoipoga ma aiga manuia e faavae ma tumau i mataupu faavae o le faatuatua, tatalo, salamo, faamagaloga, faaaloalo, alofa, agalelei, galuega, ma gaoioiga faafiafia tuufaatasi. I le fuafuaga paia e tatau ona pulefaamalumalu tamā i o latou aiga i le alofa ma le amiotonu ma o i latou e tuuina atu mea e manaomia o le olaga ma le puipuiga mo lo latou aiga. O le uluai matafaioi a tina o le faafaileleina lea o a latou fanau. O nei matafaioi paia, e ao i tamā ma tina ona fesoasoani le tasi i le isi o se paaga tutusa. O mea e faaletonu, oti, po o nisi mea e tulai mai, e alagatatau ai ona fetuutuunai tagata taitoatasi. E tatau i aiga lautele ona tuuina atu le lagolago pe a manaomia.

“Matou te lapatai atu o tagata taitoatasi o ē ua solia feagaiga o le ola mama, o ē faasaunoa i taitoalua po o fanau, o ē ua faatalale i le faataunuuina o tiutetauave faaleaiga, o le a i ai se aso tou te tutu atu ai e tali atu i luma o le Atua. E le gata i lea, matou te lapata’i atu foi, o le faamalepeina o le aiga o le a aumai ai faafanoga ia na uluai ta’u mai e perofeta anamua ma aso nei.

“Matou te valaau atu i tamalii ma failauga ma taitai o malo i soo se mea ina ia faalauiloa atu na fua faatatau ua fuafuaina ina ia faatumauina ma faamalosia le aiga, o se iunite faavae o malo” (Liahona, Oke. 1998, 24).