Isi Punaoa
Siona

Siona

O loo i le Mataupu Faavae ma Feagaiga ia le tele o fuaitau lea o loo poloaiina ai e le Alii le Au Paia e “tausisi e aumaia ma faatuina tuutuuga fuafuaina o Siona” (MFF 6:6; tagai foi i le MFF 11:6; 12:6; 14:6).

O le upu Siona e tele ona uiga i totonu o tusitusiga paia. O le uiga taatele lava o loo faaaogaina o le upu “o e loto mama” (MFF 97:21). E masani lava ona faaaogaina le upu Siona e faasino i tagata o le Alii po o le Ekalesia foi ma ona siteki (tagai MFF 82:14).

I ona popofou o lenei tisipenisione, na fautuaina ai e taitai o le Ekalesia ia tagata ina ia fausia Siona e ala lea i le malaga atu e nonofo mau i se nofoaga tutotonu. Ua poloaiina i tatou i aso nei e o tatou taitai ina ia fausia Siona i soo se mea lava o tatou nonofo ai. Ua fautuaina tagata o le Ekalesia ia nonofo i o latou lava laueleele na soifua ai, ma fesoasoani e faatuina le Ekalesia iina. Ua tele malumalu ua fausia ina ia mafai ai e tagata uma o le Au Paia o Aso e Gata Ai i le lalolagi atoa ona maua faamanuiaga o le malumalu.

O le upu Siona e mafai foi ona faatatau i nofoaga patino e pei o nei:

  • O le nuu o Enoka (tagai Mose 7:18–21).

  • O le aai anamua o Ierusalema (tagai 2 Samuelu 5:6–7; 1 Tupu 8:1; 2 Tupu 9:28).

  • O le Ierusalema Fou, lea o le a fausiaina i le aai o Jackson County, Misuri (tagai MFF 45:66–67; 57:1–3; Mataupu Faavae o le Faatuatua 1:10).