Isi Punaoa
Upu o le Poto

Upu o le Poto

O le Upu o le Poto o se tulafono o le soifua maloloina na faaali mai e le Alii mo lo tatou manuia faaletino ma le faaleagaga. I lenei faaaliga, lea o loo tusia i le vaega e 89 o le Mataupu Faavae ma Feagaiga, o loo ta’u mai ai e le Alii meaai e lelei tatou te aai ai, ma mea foi e lē lelei mo o tatou tino. Ua Ia folafola mai faamanuiaga faaleagaga ma faaletino pe a tausia le Upu o le Poto.

I le Upu o le Poto, ua poloaiina ai i tatou e le Alii ina ia aua nei o tatou tuuina mea nei i totonu o o tatou tino:

  • Meainu malolosi (tagai MFF 89:5–7).

  • Tapa’a (tagai MFF 89:8).

  • Lauti ma le kofe (tagai MFF 89:9; ua aoao mai i tatou e perofeta o aso e gata ai o le faaupuga “mea inu vevela” e faatatau lea i le lauti ma le kofe).

Soo se mea faatama’i e tuuina ma le loto i ai e tagata i totonu o o latou tino, ua le tusa lea ma le Upu o le Poto. E matua moni lava lenei mea i fualaau faasaina, lea e mafai ona faataumaoia ai i latou ua amioa’i. Ia matua taumamao mai ai lava i nei mea. Aua lava ne’i e faata’ita’ia na mea. O le faaaogaina ma le lē tatau o fualaau mai talavai, e oo atu ai foi i tulaga matautia o lou ola faalagolago atu i ai.

Ua ta’utino mai e le Alii o meaai nei e lelei mo o tatou tino:

  • Fualaau faisua ma fualaau aina suamalie, e ao ona faaaogaina “ma le faautauta ma le loto faafetai” (tagai MFF 89:10–11).

  • O aano o “manu ma manu felelei i le vanimonimo,” e tatau ona “faaaogaina faatatau” (tagai MFF 89:12–13).

  • O fatu e pei o saito, araisa, ma sana, ia ua avea ma “mataiai o le ola” (tagai MFF 89:14–17).

Faamanuiaga mai le tausia o le Upu o le Poto

Mo i latou o e tausia le Upu o le Poto, ua folafola mai e le Alii:

“O le au paia uma lava foi o e manatua e tausia ma faia nei mea uma, ma savavali i le usiusitai i poloaiga, o le a maua le malosi i o latou pute ma le ga’o i o latou ivi;

“O le a maua foi le poto ma oa sili o le malamalama e oo lava i oa natia;

“Latou te taufetuli foi ae le vaivai, ma savavali a e lē matapogia.

“A au foi le Alii, ou te avatua ia i latou le folafolaga, o le a laaloa ia i latou le agelu o le faafanoga, e pei o le fanauga a Isaraelu, a e lē fasia i latou” (MFF 89:18–21).

Faatoilaloina o Mausa

O le ala sili lava o le matua aloese lea mai mea ua faasaina mai le Alii i totonu o le Upu o le Poto. Ae pe afai ua e aafia ma ua e amioa’i i le faaaogaina o nei mea, e mafai ona faasaolotoina mai oe mai lena mausa. E mafai ona e faatoilaloina lea mausa e ala ia oe lava taumafaiga, o le mana o le alofa tunoa o le Alii, o fesoasoani mai tagata o le aiga ma uo, ma le taitaiga mai taitai o le Ekalesia.

Tatalo mo se fesoasoani, ma faia mea uma i lou malosi e tetee atu ai i faaosoosoga lea e oo mai ona ua fai ma au mausa. E finagalo lou Tama Faalelagi ina ia e mauaina faamanuiaga e maua mai lou tausiaina o le Upu o le Poto, ma o le a Ia tuuina atu ia te oe le malosi e ala i au taumafaiga faamaoni ina ia faia.