Satani
O Satani, lea e taua foi o le fili po o le tiapolo, o le fili o le amiotonu ma i latou o e o saili e mulimuli i le Atua. O ia o se atalii faaleagaga o le Atua o le sa avea ma agelu “sa i ai le pule i luma o le Atua ” (MFF 76:25; Tagai foi i le Isaia 14:12; MFF 76:26–27). Peitai i le uluai Fono Sili i le Lagi, o Lusifelo, lea na faaigoa ai Satani i le taimi lena, sa tetee i le Tama Faalelagi ma le ata o le faaolataga. I lenei tetee atu i le Atua, sa “saili [ai Satani] e faaumatia le saolotoga o le tagata” (Mose 4:3). Sa ia faapea atu: “o le a ou togiolaina le fanauga uma a tagata ina ia le se ese se agaga e toatasi, ma e moni o le a faapea lava ona ou faia; o le mea lea, ia tuu mai ia te au lou mamalu” (Mose 4:1).
Sa faaosoosoina e Satani le “tasi vae tolu o au a le lagi” e o ese mai le Tama (MFF 29:36). O le taunuuga o lea liliuese na vavaeeseina mai ai Satani ma e na mulimuli ia te ia mai le afioaga o le Atua ma aveesea ai le faamanuiaga o le mauaina o se tino faitino (tagai Faaaliga 12:9). Na aveesea ai foi mai ia i latou le avanoa e maua ai se nofoaga i se malo o le mamalu.
Sa faatagaina e le Tama Faalelagi ia Satani ma e ua mulimuli ia Satani e faaosoosoina i tatou o se vaega o lo tatou aafiaga i le olaga faitino (tagai 2 Nifae 2:11–14; MFF 29:39). E talu ai ona o Satani o loo “saili ina ia malaia tagata uma e pei o ia lava” (2 Nifae 2:27), o le mea lena o loo tauivi ai o ia ma e ua mulimuli atu ia te ia ina ia taitaieseina i tatou mai le amiotonu. O loo agai atu lana faatuiese ma le malosi i le vaega sili ona taua o le fuafuaga a le Tama Faalelagi mo le fiafia. Mo se faataitaiga, e taumafai malosi o ia e taufaatauvaaina le Faaola ma le perisitua, e faaoso le le talitonu i le mana o le Togiola, e ta’u faaseseina faaaliga, e faatosina ese i tatou mai le upu moni, ma faia feteenaiga e uiga i tiute tau le tagata lava ia. E taumafai malosi o ia e taufaatauvaaina le aiga e ala i le faafenumiai o ituaiga, lagolagoina fesootaiga faalefeusuaiga i fafo atu o le faaipoipoga, fai ma ulaga le faaipoipoga, ma le fautuaina o ni tagata matutua ua faaipoipo e aua nei faia ni fanau, ae semanu e mafai ona latou tausia ni fanau i le amiotonu.
E leai se mea o le a e gauai ai i faaosoosoga a Satani. O loo i totonu ia te oe le mana e te filifili ai le lelei mai le leaga, ma e mafai ona e saili atu e le aunoa i le fesoasoani a le Alii e ala i le tatalo. (Tagai “Faaosoosoga,” itulau 57–60.)