A’oga
Na poloai mai le Alii, “Ia saili i le aoao, e faapea foi i le suesue ma le faatuatua” (MFF 88:118). Ua Ia apoapoai mai ia i tatou e aoao le talalelei ma ia maua se malamalama “i mea o i le lagi atoa ma le lalolagi, ma lalo ifo o le lalolagi, o mea sa i ai, o mea o i ai, o mea e ao ina vave oo mai, o mea i le atunuu, o mea o i atunuu mamao, o taua ma mea faafatiatamai a atunuu, atoa ma faamasinoga o loo i luga o le laueleele o le malamalama foi i atunuu ma malo—ina ia [tatou] saunia i mea uma“ (MFF 88:78–80).
A’oga ma Aoaoga Faapolofesa
E ao ona e galue atili e aoaoina lou mafaufau ma ou lima ina ia mafai ona faaeaina oe i lau galuega filifilia. Ia faaaoga lou aoaoina e avea ai ma aafiaga mo le lelei. Ao e faia faapea, o le a iloa oe o se tagata faamaoni. O le a e saunia mo avanoa a o auauai mai, ma o le a avea oe ma se aseta i lou aiga, Ekalesia, ma lou nuu.
Ia saili aoga silisili e maua ai avanoa. O nisi o avanoa o kolisi ma iunivesite, aoga o matata eseese, mataupu e aoao i le fale, aoga faaitumalo, ma aoaoga tumaoti.
Seminare ma Inisititiuti
I le lalolagi atoa, e auai le au paia o aso e gata ai mai le 14 i le 18 tausaga le matutua i le seminare, lea e maua ai aoaoga mai tusitusiga paia i aso o le vaiaso. O le inisititiuti o mataupu faalelotu e maua ai aoaoga i aso o le vaiaso e uiga i mataupu eseese o le talalelei mo le au paia o aso e gata ai e 18 i le 30 tausaga le matutua.
O nei polokalama e maua ai le faaleagaga ma se siosiomaga faamasani e mafai ai e tamaiti ona fegalegaleai ma isi ao aoao atili e uiga i le talalelei.
Mo faamatalaga e uiga i le seminare ma le inisititiuti, faafesootai se taitai perisitua o le uarota.
Aoaoga Faifaipea i le Olaga
Faaauau ona sailia avanoa mo aoaoga i lou olaga atoa. O le a fesoasoani lea ia te oe e te maua ai le malamalama fou i lau galuega filifilia ma isi tomai ma poto masani. I suiga televave o lenei lalolagi, e tatau ona e faaavanoaina ni taimi e aoaoina ai oe lava mo le taimi nei ma le lumanai.
E le gata i le faalauteleina o au aoaoga e ala i a’oga, ae e mafai foi ona faaauau pea ona e aoao e ala i le faitau, auai i gaoioiga faaleaganuu, asiasi i fale maimoa ma nofoaga o talafaasolopito, ma matau le lalolagi o loo siomia ai oe..