Faaosoosoga
E faapei ona vavalo le Aposetolo o Paulo, o aso mulimuli o “aso faigata” (2 Timoteo 3:1). O faatosinaga a le fili ua matua sosolo atu ma ua taufaasese. Peitai e mafai ona e teena Satani ma manumalo mai ana faaosoosoga. Ua tuuina mai ia te oe e le Tama Faalelagi le meaalofa o le saolotoga e filifili ai—le mana e filifili ai le lelei mai le leaga. E mafai ona “faamaulalo [oe lava] i luma o le Atua, ma ia valaau atu i lona suafa paia, ma ia mataala ma tatalo e le aunoa ina ia le tofotofoina [oe] e sili i mea e mafai ona [e] onosai ai” (Alema 13:28). A e loto e usiusitai i poloaiga, o le a tuuina atu e lou Tama Faalelagi ia te oe le malosi e tetee atu ai i faaosoosoga.
O lenei fautuaga o le a fesoasoani ia te oe e manumalo ai i faaosoosoga:
Ia faatotonugalemu lou olaga i le Faaola. Na apoapoai atu le perofeta o Helamana i ona atalii, “Ia manatua, ia manatua lava, e ao ina oulua atiina ae lo oulua faavae i luga o le papa o lo tatou togiola, o le Keriso lea, o le Alo o le Atua. Pe a faaoo mai e le tiapolo ana matagi tetele, ioe, o ana u fanafana i le asiosio, ioe, pe a pesi mai ia te oulua lana uatoa uma lava ma ana afa, e le malo ai ia te oulua, e toso ifo ai oulua i le vanu o le puapuaga, ma le auega e le gata, ona o le Papa ua atiina ae ai oulua, o le Faavae mau lea, o le Faavae foi lea, afai e ati ae tagata i ona luga, e le mafai lava ona pauu i latou” (Helamana 5:12).
Tatalo mo le malosiaga. Ina ua asiasi atu le Faaola toetu i tagata o Sa Nifae, sa Ia aoao atu i le motu o tagata: “E tatau ona outou mataala ma tatalo e le aunoa, nei oo mai le faaosoosoga ia te outou; aua e manao Satani ia te outou, ina ia lulu o ia ia te outou e pei o le saito. O le mea lea e tatau ai ona outou tatalo e le aunoa i le Tama i lo’u igoa” (3 Nifae 18:18–19). I aso e gata ai ua Ia tuuina mai ai foi lea lava aoaoga e tasi: “Ia tatalo pea, ina ia mafai ona e manumalo, ioe, ina ia mafai ona e manumalo ia Satani, ina ia mafai ona e sao mai lima o auauna a Satani o e fesoasoani i lana galuega” (MFF 10:5).
Ia suesue i tusitusiga paia i aso uma. Ao e suesue i upumoni o le talalelei ma faaaogaina i lou olaga, o le a faamanuiaina oe e le Alii i le mana e tetee atu ai i faaosoosoga. Na aoao mai Nifae, “O i latou uma o e faalogo foi i le afioga a le Atua, ma taofi mau i ai, e le fano i latou e faavavau, e le mafai foi tofotofoga ma u fanafana mu a le ita mai ona manumalo ia te i latou e oo i le tauaso e taitaieseina ai i latou i le malaia” (1 Nifae 15:24; Tagai foi i le Helamana 3:29–30).
Ia faatumuina lou olaga i le lelei. E tele mea lelei e mafai ona e filifili mai ai e le manaomia ai ona e tofo atu i le leaga. Pe a e faatumuina lou olaga i le lelei, o le a leai ai se avanoa mo se isi lava mea.
Aloese mai nofoaga ma tulaga e faaosoosoina ai oe. E le mafai ona e matua aloese mai faaosoosoga, peitai e mafai ona e aloese mai nofoaga ma tulaga e ono faaosoosoina ai oe. E mafai foi ona e aloese mai mea e le talafeagai o i totonu o tusiata, tusi faitau, televise, ata tifaga, ma musika ma luga o le Initoneti.
Taumafai malosi ina ia faaosofia isi e fai mea e lelei. A o latalata i Ona puapuaga i le Faatoaga o Ketesemane, na tatalo ai le Faaola mo Ona soo: “Aua e le ni o le lalolagi i latou, faapei o a’u, ou te le so le lalolagi. Ou te le ole atu ina e aveese ia te i latou i le lalolagi, a ia e tausi ia te i latou ina nei leaga. E le ni o le lalolagi i latou, faapei o a’u foi, ou te le so le lalolagi a’u. Ia e faapaiaina i latou i lau upu moni; o lau afioga o le upu moni lea. Faapei ona e auina mai au i le lalolagi, ua faapea foi a’u ona auina atu i latou i le lalolagi” (Ioane 17:14–18). I le avea ai ma se soo o Iesu Keriso i aso e gata ai, e mafai ona e i ai i le lalolagi ae “le so le lalolagi.” I le faaopoopo atu i le aloese o oe lava mai faaosoosoga, e mafai ona e uunaiina isi e ola i ni olaga lelei ma atoatoa. E mafai ona e faia se faataitaiga amiotonu, avea ma se uo lelei, auai i auaunaga fesoasoani i le nuu, ma, pe a talafeagai ai, ia faailoa atu ina ia lagona ou manatu i le puipuia o tulaga faatauaina o uiga mama.
Aua nei faalotolotolua i au faaiuga e tetee atu i faaosoosoga. Ia taumafai malosi e mulimuli i faataitaiga a le Faaola, o le na “oo foi ia te ia tofotofoga ae peitai na te lei gauai ai” (MFF 20:22). Ina ua faaosoosoina e Satani Iesu i le vao, e lei vaivai ai le Alii. O Lana tali sa vave ma mausali: “Satani e, ina alu ese ia oe i o’u tua” (Luka 4:8). E ala mai i ou mafaufauga, upu, amioga amiotonu, ona mafai ona e tali atu i faaosoosoga a le fili i le lagona lava lena e tasi. “Ia outou tetee atu i le tiapolo, ona sola ese ai lea o ia ia te outou. Ia outou faalatalata atu i le Atua, ona faalatalata mai lea o ia ia te outou” (Iakopo 4:7–8).