Taofiofi o le Fanau Mai

Pe afai e gafataulimaina faaletino e le ulugalii faaipoipo, ua ia te i la’ua le avanoa o le faia o tino faitino mo fanau agaga a le Tama Faalelagi. E i ai la la’ua vaega e fai i le fuafuaga tele o le fiafia, lea e faatagaina ai fanau a le Atua e maua tino faaletino ma ola ai i le olaga nei.

Afai ua e faaipoipo, o oe ma lou toalua e ao ona oulua talanoaina a oulua matafaioi paia o le aumaia o fanau i le lalolagi ma faafaileleina i latou i le amiotonu. Ao faia lea matafaioi, ia mafaufau i le paia ma le uiga o le ola. Mafaufau loloto i le olioli lea e oo mai pe a i ai le fanau i le aiga. Mafaufau i faamanuiaga faavavau e oo i le i ai o se fanau lelei. Faatasi ai ma se molimau e uiga i nei mataupu faavae, o le a oulua saunia ai e filifili ma le agaga tatalo le aofai o tamaiti ma le taimi e fananau mai ai i latou. O nei filifiliga e i ai lea i le va o oulua ma le Alii.

Ao oulua talanoaina lenei mataupu paia, ia manatua o fesootaiga taufeusuaiga i totonu o le faaipoipoga ua faatagaina faalelagi. A o le tasi o faamoemoega o nei fesootaiga o le mauaina lea o tino faaletino mo fanau a le Atua, o le isi o le faaalia lea o le alofa o le tasi i le isi—e fusia faatasi ai tane ma ava i le loto faamaoni, mama, feavatai, ma le tasi o le faamoemoe.