Isi Punaoa
Faaolataga

Faaolataga

I a outou talanoaga ma nisi tagata Kerisiano, e ono fesiligia ai oe, “Pe ua faaolaina ea oe?” O i latou e fesili i lenei fesili, e masani ona faatatau i le faatinoga ma le faamaoni o le ta’uta’u atu, po o le tautino atu ua e taliaina Iesu Keriso e avea ma ou Alii ma Faaola patino. O le faia o lena fesili, latou te faaalia ai lo latou faatuatua i upu nei, na tusia e le Aposetolo o Paulo:

“Afai e te tautino i lou gutu i le Alii o Iesu, ma talitonu i lou loto ua toe faatuina mai o ia e le Atua nai e ua oti, e faaolaina oe; aua o le loto e talitonu ai, e oo mai ai le amiotonu; a o le gutu e tautino ai, e oo mai ai le ola” (Roma 10:9–10).

Taliina o le Fesili “Pe ua Faaolaina ea Oe?”

I le Roma 10:9–10, o le upu faaolaina ma le faaolataga o loo faaalia ai se sootaga faafeagaiga ma Iesu Keriso. O lea sootaga faafeagaiga, ua mautinoa ai lo tatou faaolataga mai taunuuga e faavavau o le agasala pe afai tatou te usiusitai. O tagata faamaoni uma o le Au Paia o Aso e Gata Ai, ua faaolaina e tusa ai ma lea faauigaga. Ua liua i tatou i le talalelei toefuataiina. O le sauniga o le papatisoga, tatou te ulu atu ai i se sootaga faafeagaiga ma le Faaola, ma tauave ai Lona suafa i o tatou luga. Tatou te faafouina a tatou feagaiga o le papatisoga pe a tatou aai ma feinu i le faamanatuga.

Uiga Eseese o le Upu Faaolataga

I totonu o aoaoga faavae o le Ekalesia a Iesu Keriso o le Au Paia o Aso e Gata Ai, o upu faaolaina ma le faaolataga e tele ni ona uiga. O lau tali i le fesili “Pe ua Faaolaina ea Oe?” e tusa ai ma nei uiga, a lē o le “Ioe” po o le “Ioe, ae e i ai ma ni tuutuuga.” O faamatalaga o loo i lalo, o loo otooto atu ai uiga eseese e ono o le upu faaolataga.

Faaolataga mai le Oti Faaletino. O tagata uma lava o le a oo i ai le oti. Peitai e ala mai i le Togiola ma le Toetu o Iesu Keriso, o le a toe tutu uma mai ai tagata uma—faasaoina mai le oti faaletino. Na molimau Paulo, “Aua faapei ona oti uma ia Atamu, e faapea foi ona faaolaina uma ia Keriso” (1 Korinito 15:22).

Faaolataga mai le Agasala. Ina ia faamamaina mai agasala e ala i le Togiola a le Faaola, e tatau ona e faatuatua ia Iesu Keriso, salamo, papatiso, ma mauaina le meaalofa o le Agaga Paia (tagai Galuega 2:37–38). Pe afai ua maea ona e papatiso ma mauaina le Agaga Paia e ala mai i le pule tatau o le perisitua, ua maea ona faasaoina ai oe iina mai le agasala i se tuutuuga. O le a le faasaoina atoatoa oe mai le agasala seiloga ua muta lou soifuaga i luga o le fogaeleele, ma sa e tumau ai ma le faamaoni e oo i le iuga.

Ia manatua e le mafai ona faasaoina oe i au agasala; e le mafai ona e mauaina le faaolataga atoatoa i le na o lou faailoa atu o lou talitonuga ia Keriso ma le malamalama o le a e toe faia le agasala i le gasologa o lou olaga (tagai Alema 11:36–37). O le alofa tunoa o le Atua e mafai ai ona faasaoina oe mai au agasala (tagai Helamana 5:10–11). Ina ia mauaina lenei faamanuiaga, e tatau ona e faailoa lou faatuatua ia Iesu Keriso, taumafai e tausia poloaiga, tuuese agasala, ma toe faafouina lou salamo ma le faamamaina e ala i le sauniga o le faamanatuga.

Toe Fanaufouina. E i ai nisi taimi e fesiligia ai oe pe ua e toe fanaufouina. O le aoaoga faavae o le toe fanaufouina faaleagaga o loo faailoa mai pea e le aunoa i tusitusiga paia. O le Feagaiga Fou o loo i ai le aoaoga a Iesu e tatau ona “toe fanaufouina” ma a tatou lē “fanau i le vai ma le Agaga, e le mafai ona [tatou] sao i le malo o le Atua” (Ioane 3:3, 5). O lenei aoaoga o loo ua toe faamautu mai i totonu o le Tusi a Mamona: “Aua e ao ina toe fanauina tagata uma lava, ioe, o tane atoa ma fafine, o atunuu uma, ituaiga, ma gagana eseese, ma nuu; ioe, ina ia fanauina i la le Atua, ma ia liua mai le faaletino ma le pau i le amiotonu, ona ua togiolaina e le Atua, ma ua avea mona atalii ma afafine; ua faapea foi ona avea i latou ma tagata fou; a latou le faia lenei mea, e le mafai ona fai mo latou tofi le malo o le Atua” (Mosaea 27:25–26).

O lenei toe fanaufouina o se gasologa e tupu pe a maea ona tatou papatiso ma mauaina le meaalofa o le Agaga Paia. E oo mai o se taunuuga o lo tatou lotomalie e “osi le feagaiga ma lo tatou Atua e fai lona finagalo, ma usiusitai i ana poloaiga i mea uma na te poloaiina ai i matou, i o matou aso uma ua totoe” (Mosaea 5:5). Ona faapea lea ona “liua o [tatou] loto ona o le faatuatua i lona suafa, o le mea lea ua fanauina ai [tatou] ia te ia ” (Mosaea 5:7). Afai ua papatisoina oe ma ua e mauaina le meaalofa o le Agaga Paia, ma se feagaiga e ave i ou luga le suafa o Iesu Keriso, ua mafai loa ona e faapea mai ua toe fanaufouina oe. Ma e mafai ona e toe faafouina lena toe fanaufouina i Sapati taitasi i le taimi e te taumafa ai le faamanatuga.

Faaolataga mai le Valea. E toatele tagata o loo ola i se tulaga o le pogisa, latou te le iloaina le malamalama o le talalelei toefuataiina. Ua na ona “taofia mai le upu moni ona ua latou le iloa le mea e maua mai ai” (MFF 123:12). I le avea ai ma se tagata o le Ekalesia a le Alii, ua faaolaina oe mai lea tulaga. Ua ia te oe le malamalama o le Atua le Tama, o Iesu Keriso, le faamoemoega o le olaga, le ata o le faaolataga, ma lou taunuuga e faavavau. E mafai ona e ola o se soo o le Faaola, o le na folafola mai, “O au nei o le malamalama o le lalolagi; o le mulimuli mai ia te au, e le savali o ia i le pouliuli, ae ia te ia le malamalama o le ola” (Ioane 8:12).

Faaolataga mai le Oti Faalua. O nisi taimi e talanoa mai tusitusiga paia i le faaolataga mai le oti faalua. O le oti faalua o le oti faaleagaga mulimuli—o le vavaeeseina mai le amiotonu ma lē maua ai se nofoaga i soo se malo lava o le mamalu (tagai Alema 12:32; MFF 88:24). E le oo mai lea oti faalua seia oo i le Faamasinoga Mulimuli, ma o le a oo mai i nai tagata toaitiiti (tagai MFF 76:31–37). E toeitiiti lava o tagata uma e ola i luga o lenei fogaeleele e mautinoa le faaolaina mai le oti faalua (tagai MFF 76:40–45).

Ola e Faavavau, po o le Faaeaina. I tusitusiga paia, o le upu faaolaina ma le faaolataga e masani ona faatatau i le ola e faavavau, po o le faaeaga (tagai Aperaamo 2:11). O le ola e favavau o le iloaina lea o le Tama Faalelagi ma Iesu Keriso ma nonofo faatasi ma i laua e faavavau—o le ulu atu lea i se nofoaga i le tikeri maualuga o le malo selesitila (tagai Ioane 17:3; MFF 131:1–4; 132:21–24). Ina ia mauaina lenei meaalofa silisili, e tatau ona tatou faia mea e sili atu i le na o le salamo mai a tatou agasala, papatiso ma faamauina e le pule tatau o le perisitua. E tatau i alii ona mauaina le Perisitua Mekisateko, ma e tatau foi i tagata uma o le Ekalesia ona tausia feagaiga paia i totonu o le malumalu, e aofia ai faaipoipoga e faavavau.

Pe a tatou faaaogaina le upu faaolataga e faatatau i le ola e faavavau, e leai se isi o i tatou e mafai ona faapea ua tatou faaolaina i le olaga faitino. O lena meaalofa mamalu faatoa oo mai lava pe a maea le Faamasinoga Mulimuli.