Tapuai
O le tapuai atu i le Atua o le tuuina atu lea ia te Ia o lou alofa, faaaloalo, auaunaga, ma le loto atoa. Na poloaiina e le Alii Mose, “Ifo atu i le Atua, aua ua na o ia lava e te auauna atu i ai” (Mose 1:15). Ua Ia poloai mai i lenei augatupulaga, “Ia e alofa atu i le Alii lou Atua ma lou loto atoa, ma lou manatu, mafaufau, ma lou malosi atoa; a o le igoa o Iesu Keriso ia e auauna atu ai ia te ia” (MFF 59:5). Afai e te ave le faamuamua i se isi tagata po o se isi mea nai lo le alofa i le Atua, o loo e faatinoina le tapuaiga sese, po o le ifo i tupua (tagai Esoto 20:3–6).
O le tatalo o se tasi lea auala e te tapuai atu ai i le Tama. Na aoaoina e Alema lona atalii o Helamana, “Tagi atu foi i le Atua ina ia fesoasoani o ia ia te oe i mea uma, ioe, ia faia au mea uma ona o le Atua; o mea uma e te alu i ai, ia alu i ai ona o le Atua. Ioe, ia liliu atu ou manatu i le Atua, ioe, ia e tuuina e faavavau le alofa o lou loto i le Atua” (Alema 37:36).
E tatau ona e auai atu i sauniga a le Ekalesia i le agaga o le tapuaiga. Ua poloai mai le Alii: “Ina ia e tausi atili ai ia te oe lava ia mama nai le lalolagi, ia e ulu atu i le fale tatalo ma avatu ai au faamanatuga i lo’u aso paia; aua e moni o le aso lenei ua atofaina e te malolo ai i au galuega, ma avatu au viiga i Le Silisili” (MFF 59:9–10).
O le auai atu i sauniga perisitua o se vaega foi o lau tapuaiga. A o e ‘ai ma inu ma le migao i le faamanatuga ma ulu atu i le malumalu, ia e manatua ma tapuai atu i lou Tama Faalelagi ma faailoa atu lau faafetai mo Lona Alo o Iesu Keriso.
E le gata i le faaali atu o le tapua’i i foliga vaaia, ae e tatau foi ona i ai ia te oe se uiga tapua’i i soo se mea lava e te alu i ai ma mea uma lava e te faia. Na aoao atu e Alema lenei mataupu faavae i se vaega o tagata o e na tulia i fafo mai o latou fale tapuai. Sa ia fesoasoani atu ina ia latou iloa, o le tapuaiga moni e le faatuaoia i le na o se tasi se aso o le vaiaso (tagai Alema 32:11). I lana lauga atu i lenei lava vaega o tagata, na faamalosiau atu ai foi le soa a Alema o Amoleka ina ia “tapuai atu i le Atua i le agaga ma le faamaoni i mea uma tou te i ai” (Alema 34:38).