Faamaoni

Ua ta’ua i le Mataupu Faavae o le Faatuatua e sefulutolu, “Matou te talitonu i le faamaoni.” Ia faamaoni o lona uiga ia moni, amiosa’o, ma ia leai se taufaasese i taimi uma.

Pe afai e te faamaoni i ala uma lava, o le a mafai ona e mauaina le filemu o le mafaufau ma faatumauina le faaaloalo mo oe lava. E te faatupuina le malosi o uiga lelei, lea e mafai ai ona e auauna atu i isi. E faatuatuaina oe i fofoga o le Atua ma i latou o loo siomia oe.

I se isi itu, afai e te le faamaoni i au upu ma au gaoioiga, ua e faatiga ia te oe lava ma e masani lava ona faatiga ai foi i isi. Afai e te pepelo, gaoi, kopi, pe le popole i le tuuina atu o le galuega atoa mo lou totogi, ua e aveesea lou faaaloalo mo oe lava. Ua e le maua taitaiga a le Agaga Paia. O le a e iloa ai ua e faaleagaina fesootaiga ma tagata o lou aiga ma uo, ma o na tagata o le a le toe faatuatuaina oe.

O le faamaoni e masani ona manaomia ai le loto tele ma le ositaulaga, aemaise lava pe afai e taumafai isi e tauanau oe e faamaonia se amioga lē tonu. Pe a maua oe i lea tulaga, ia manatua o le filemu tumau e maua mai le faamaoni, e sili atu le taua nai lo le faamalieina i tupe, i le faia o le mea o loo faia foi e isi tagata.