Taua

Ua fetalai mai le Alii o aso e gata ai o le a i ai “taua ma tala o taua, o le a vavao le lalolagi atoa, ma e matatau ma loto vaivai tagata” (MFF 45:26).

I le avea ai ma tagata o le Ekalesia a Iesu Keriso o le Au Paia o Aso e Gata Ai, o i tatou o ni tagata o le filemu. Tatou te mulimuli i le Faaola, o Ia o le Alii o le Filemu. O loo tatou taulai atu i Lana nofoaiga faatupu i le meleniuma, lea o le a faamutaina ai taua ma o le a toe oo mai ai le filemu i le lalolagi (tagai Isaia 2:4). Ae ui i lea, i lenei lalolagi ua tatou matauina i nisi taimi ua auina atu e taitai o malo ia vaegaau i taua ina ia puipuia o latou malo ma o latou tulaga.

O le Au Paia o Aso e Gata Ai i totonu o le vaegaau e leai se mea o le a latou lagona ai le popole i le va i lo latou atunuu ma lo latou Atua. I totonu o le Ekalesia, “matou te talitonu i le usiusitai i tupu, ma peresitene, ma faamasino, i le usiusitai ma faamamalu ma lagolagoina le tulafono” (Mataupu Faavae o le Faatuatua 1:12). O le auaunaga i le vaegaau ua faailoa ai le faamamaluina o lenei mataupu faavae.

Pe a valaauina tagata o le Au Paia o Aso e Gata Ai e o atu e tau, e mafai ona latou manatu i le faataitaiga a Kapeteni Moronae, le taitaiau sili i totonu o le Tusi a Mamona. E ui o ia o se tagata tau malosi, peitai o se tagata “ua le fiafia i le faamasaaina o le toto” (Alema 48:11). O ia o se tagata sa “mausali i le faatuatua ia Keriso,” ma na o le pau le mafuaaga na tau ai o ia o le “leoleo i ona tagata, ma lana pule, ma lona nuu, ma lana ekalesia” (Alema 48:13). Pe afai e tatau ona o atu tagata o le Au Paia o Aso e Gata Ai e tau, e tatau ona o atu i latou i le agaga o le upumoni ma le amiotonu, ma le manao e faia le lelei. E tatau ona o atu i latou ma le alofa i o latou loto mo fanau uma a le Atua, e aofia ai ma i latou o loo i le itu tetee. Ma afai ua tatau ai ona latou faamaligiina le toto o se tasi, o la latou gaoioiga o le a le faitauina o se agasala.