Muai Faauuina

I le muai olaga o agaga, sa tofia ai e le Atua ni agaga e faataunuuina ni misiona patino i le taimi e soifua ai i le olaga nei. O lenei mea ua taua o le muai faauuina.

O le muai faauuina e le faapea ua mautinoa ai o ia tagata o le a maua ni valaauga po o ni tiutetauave faapitoa. O nei avanoa e oo mai i lenei olaga o se taunuuga o le faaaogaina ma le amiotonu o le saolotoga, e pei lava o le oo mai o le muai faauuina o se taunuuga o le amiotonu i le muai olaga.

Sa muai faauuina Iesu Keriso e faia le Togiola, e avea ma “Tamai mamoe na fasia talu ona faavaeina le lalolagi,“ (Faaaliga 13:8; tagai foi 1 Peteru 1:19–21). Ua ta’ua mai e tusitusiga paia nisi o e na muai faauuina. Na aoaoina Aperaamo e uiga i lona muai faauuina ina ua ia vaai i se faaaliga lea na ia vaai ai i agaga o i “latou uma e toatele o e tautaua ma maoae” i le muai olaga i le lalolagi o agaga. Na ia faapea mai: “Ma sa silasila atu le Atua i ia agaga ua lelei, ma sa ia tu i lo latou lotolotoi ma faapea atu: O le a ou faia ia avea i latou nei ma au faipule; aua sa ia tu i le lotolotoi o i latou o e o ni agaga, ma sa ia silasila atu ua lelei i latou; ona ia fetalai mai lea ia te au: Aperaamo e, o oe lava o se tasi o i latou ia; na filifilia lava oe ae e te le i fanau mai” (Aperaamo 3:22–23). Na ta’u atu e le Alii i a Ieremia, “Na au iloa oe a o le i faia oe e au i le manava; na au faapaiaina oe a o le i fanau mai oe, na au tofia oe e fai ma perofeta i nuu” (Ieremia 1:5). O Ioane le Papatiso na muai faauuina e saunia tagata mo le misiona a le Faaola i le olaga nei (tagai Isaia 40:3; Luka 1:13–17; 1 Nifae 10:7–10).

O le mataupu autu o le muai faauuina e faatatau i tagata uma o le Ekalesia, e le na o le Faaola, ma Ana perofeta. Ao lei foafoaina le lalolagi, sa tuuina atu ni tiutetauave faapitoa i ni tamaitai faamaoni ma sa muai faauuina foi ni alii i ni tiute faapitoa o le Perisitua. E ui lava e te le o manatuaina lena taimi, ae e mautinoa lava na e malie atoatoa e faataunuuina feau faapitoa i le galuega a lou Tama. A e faailoa atu lou lava agavaa, o le a tuuina atu ia te oe avanoa e faataunuuina ai tofiga na e mauaina i lea taimi.