Perisitua Arona
Ao faaliliuina e le Perofeta o Iosefa Samita le Tusi a Mamona, sa ia iloa ai o loo ta’ua le papatisoga mo le faamagaloina o agasala. I le aso 15 o Me 1829, sa la o atu ai ma lana failautusi o Oliva Kaotui i le vao e fesili atu i le Alii e uiga i le papatisoga. Ao tatalo i la’ua, “sa oo ina oo ifo mai le lagi se avefeau i se ao malamalama tele.” O lenei avefeau o Ioane le Papatiso, o le perofeta sa papatisoina Iesu Keriso i seneturi ua mavae. O Ioane le Papatiso, ua avea nei ma tagata toetu, sa tuu ona lima i luga o Iosefa ma luga o Oliva ma faaee atu ia te i la’ua uma le Perisitua Arona, lea sa aveesea mai i le lalolagi i le taimi o le Liliuese Tele. O lenei pule, sa mafai ai e Iosefa ma Oliva ona papatiso e le tasi le isi (Tagai Iosefa Samita—Talafaasolopito 2:68–72.)
I totonu o le Ekalesia i aso nei, o alii agavaa o le Ekalesia e mafai ona maua le Perisitua Arona e amata mai i le 12 tausaga. Latou te maua le tele o avanoa e auai ai i sauniga paia o le perisitua ma tuuina atu auaunaga. Ao latou faataunuuina ma le agavaa o latou tiute, latou te galulue i le suafa o le Alii e fesoasoani i isi ia maua faamanuiaga o le talalelei.
O tofi o le Perisitua Arona o le Epikopo, ositaulaga, aoao, ma le tiakono. O le faatagaga a le taitai perisitua pulefaamalumalu (e masani lava o le epikopo po o le peresitene o le paranesi), o tiakono e tufaina le faamanatuga. Latou te fesoasoani i le epikopo po o le peresitene o le paranesi e vaavaai lelei tagata o le Ekalesia e ala i le tuuina atu o auaunaga, ma fesoasoani i tulaga faaletino e pei o le aoina o taulaga anapogi. E mafai e aoao ona faia tiute uma o le tiakono, ma latou te maua foi isi avanoa e auauna ai. Latou te saunia le areto ma le vai o le faamanatuga ma galulue o ni faiaoga o aiga. E mafai e ositaulaga ona faia tiute o tiakono ma aoao. A tuu atu i ai le faatagaga a le taitai perisitua pulefaamalumalu, e mafai foi ona latou faamanuiaina le faamanatuga, papatiso, ma faauuina isi i le tofi o le ositaulaga, aoao ma le tiakono.
O le Perisitua Arona o se “lala i le Perisitua Sili po o le faaMekisateko” (MFF 107:14). E masani lava ona taua o le perisitua sauniuni. A o auauna atu se tasi o umia le perisitua i le Perisitua Arona, e saunia o ia e maua le Perisitua Mekisateko, e maua ai faamanuiaga o le malumalu, e faia ai se misiona talai, e avea ma se tane ma se tamā alofa, ma faaauau pea ona auauna i le Alii i le olaga atoa.