Pau

I le faatoaga o Etena, na poloaiina ai e le Atua, “O laau uma lava o i le faatoaga e te ai saoloto ai. A o le laau e iloa ai le lelei ma le leaga, aua e te ai ai; ae ui i lea, ia faitalia oe ma lau filifiliga i ai, aua ua tuuina atu ia te oe; peitai ia e manatua ua ou faasaina; aua o le aso e te ai ai, e te oti ai lava” (Mose 3:16–17). Ona ua solia e Atamu ma Eva lenei poloaiga ma aai i le fua o le laau e iloa ai le lelei ma le leaga, o lea sa tuliesea ai i la’ua mai le afioaga o le Alii (tagai MFF 29:40–41). I se isi faaupuga, sa oo ia te i laua le oti faaleagaga. Sa avea foi i la’ua ma tagata faitino—ua oo i ai le oti faaletino. O lenei oti faaleagaga ma le oti faaletino ua ta’ua o le Pau.

O Lo Tatou Tulaga Pau

O le avea ai ma fanau e tupuga mai ia Atamu ma Eva, ua tuufaasolo mai ai ia i tatou se tulaga pau i le olaga faaletino (tagai Alema 42:5–9, 14). Ua vavaeeseina i tatou mai le afioaga o le Alii ma ua oo ai i le oti faaletino. Ua tuuina i tatou i se tulaga o le faafeagai, lea ua suesueina ai i tatou e ala i faafitauli o le olaga ma faaosoosoga a le fili (tagai 2 Nifae 2:11–14; MFF 29:39; Mose 6:48–49).

I lenei tulaga pau ma le puapuagatia, ua i ai se feteenaiga i totonu o i tatou. O i tatou o fanau agaga a le Atua, o i ai ni malosiaga e avea ai ma “tofusia faatasi ai … i le amio Atua” (2 Peteru 1:4). Ae ui i lea, “ua faaletusa i matou i luma [o le Atua]; ona o le pau ua leaga pea i matou” (Eteru 3:2). E tatau ona tatou agai pea i luma e faatoilalo ai tuinanau ma manaoga leaga.

I le toe faaleoina o upu a le agelu, na faapea mai ai le Tupu o Peniamina, “Aua o le tagata o le lalolagi o lē ita lea i le Atua, ma ua faapea talu le pau o Atamu e faapea foi e oo i le faavavau, faavavau lava. A e afai e gauai o ia i galuega alofa a le Agaga Paia, ma ua tuu ese le tagata o le agasala, ma ua avea o ia ma tagata amiotonu ona o le togiola o Keriso le Alii; ma ua avea foi o ia e pei o le tama itiiti, ua fia usiusitai, ma agamalu, ma faamaulalo, ma onosai, ma ua tumu i le alofa ma le fia gauai i mea uma ua silafia e le Atua e tatau ona fatiga ai o ia, e pei lava ona gauai le tama itiiti i lona tama” (Mosaea 3:19).

Faamanuiaga o le Pau

O le Pau o se vaega taua tele o le fuafuaga o le faaolataga a le Tama Faalelagi (tagai 2 Nifae 2:15–16; 9:6). E valalua le faasinoga—e faasino i lalo ae agai i luma. E le gata ina aumaia ai le oti faaletino ma le faaleagaga, ae ua aumaia ai foi ia i tatou le avanoa e fananau mai ai i le fogaeleele ma aoao ai e alualu i luma. O lo tatou faaaogaina ma le amiotonu o lo tatou saolotoga ma lo tatou salamo faamaoni pe a tatou agasala, e mafai ai ona tatou o mai ia Keriso ma, o Lana Togiola, e saunia ai mo le mauaina o le meaalofa o le ola faavavau. Na aoao mai le perofeta o Liae:

“O lenei, faauta, ana le solitulafono Atamu, po ua le pau o ia, a e tumau pea o ia i le faatoaga o Etena. Ma ua tumau lava mea uma ua faia e pei ona i ai ina ua uma ona faia, a e faapea pea lava e faavavau, e leai lava se iuga.

“Ma ua le fanafanau foi [Atamu ma Eva], o lea e tumau ai i laua i le le agasala, ua leai se olioli, aua ua le iloa se malaia, ua le fai se lelei, aua ua le iloa se agasala.

“A e peitai, faauta, ua faia mea uma i le poto o Le ua silafia mea uma.

“Na pau Atamu ina ia i ai tagata, ua ola tagata ina ia latou maua le olioli.

“E afio mai foi le Mesia i le atoatoa o aso ina ia togiola e ia le fanauga a tagata ai le pau” (2 Nifae 2:22–26; tagai foi fuaiupu 19–21, 27).

Na faamatalaina e Atamu ma Eva lo laua agaga faafetai mo faamanuiaga na oo mai talu le pau:

“Ma sa viia e Atamu le Atua i lena aso ma sa faatumuina o ia i le Agaga Paia, ma sa amata ona ia perofeta ane e uiga i aiga uma o le lalolagi, ua faapea atu: Ia viia le suafa o le Atua, aua ua pupula o’u mata ona o la’u solitulafono, ma o le a ou maua le olioli i le olaga nei, ma o le a ou toe vaai i le Atua i le tino.

“Ma sa faalogo Eva, le ava a Atamu, i ia mea uma, ma sa ia fiafia, ma faapea atu: Ana le seanoa la ta solitulafono, semanu ta te le maua ni fanau, ma lē iloa le lelei mai le leaga, ma le olioli o le togiolaina o i taua ma le ola faavavau e tuuina mai e le Atua ia i latou uma o e usiusitai” (Mose 5:10–11).

Faaolaina mai le Pau

Ona o lo tatou natura pau i le olaga nei ma a tatou agasala a le tagata lava ia, pau lava lo tatou faamoemoega ua i ai lea ia Iesu Keriso ma le ata o le faaolataga.

O le Togiola a Iesu Keriso, o le a toe faaolaina ai tagata uma mai aafiaga o le Pau. O le a tatou toetutu uma, ma o le a toe aumaia i tatou i luma o le afioaga o le Alii ina ia faamasinoina ai (tagai 2 Nifae 2:5–10; Alema 11:42–45; Helamana 14:15–17).

E le gata ina faaolaina i tatou mai aafiaga o le Pau, ae e mafai foi e le Faaola ona faaolaina i tatou mai a tatou agasala. I lo tatou tulaga pau, ua tatou agasala ma faamamao ese i tatou lava mai le Alii, ma aumaia ai e i tatou lava le oti faaleagaga i o tatou luga. E pei ona faapea mai le Aposetolo o Paulo, “Ua agasala tagata uma lava ma ua le oo i le viiga mai le Atua” (Roma 3:23). Afai tatou te tumau i a tatou agasala, e le mafai ona tatou mau i le afioaga o le Atua, aua “e le mafai ona i ai se mea lē mama … i le malo o le Atua” (Mose 6:57). Faafetai tele, ona o le Togiola “e faataunuuina ai le ala o le salamo” (Helamana 14:18), ua mafai ai e i tatou ona maua le faamagaloina o a tatou agasala ma mau i le afioaga o le Atua e faavavau. Na aoao mai Alema, “Ua tuuina mai i le tagata aso e salamo ai o ia; o le mea lea ua avea ai lenei olaga ma olaga faataitai, o aso e sauniuni ai e fetaiai ma le Atua, o aso e sauniuni ai i le ola faavavau na talatalaina atu e i ma’ua, e mulimuli ane lea i le toe tu mai o e ua oti” (Alema 12:24).

Agaga Faafetai mo le Taulaga Togiola a le Faaola

E pei lava ona tatou le manaomia tele se meaai seia lagona lo tatou mole, o le a tatou le manaomia atoatoa foi le faaolataga faavavau seiloga tatou te iloa lo tatou manaomia o le Faaola. O lenei iloa e oo mai a o tatou tuputupu ae i lo tatou malamalama e uiga i le Pau. E pei ona aoao mai le perofeta o Liae, “O lenei ua sē ma pa’ūū tagata uma, e faapea pea lava foi, sei iloga latou te faalagolago i lenei Togiola” (1 Nifae 10:6).