Iosefa Samita

I le tautotogo o le 1820, sa suesue ai Iosefa Samita e 14-tausaga le matua mo le Ekalesia moni a Iesu Keriso ina ua ia faitau i se mau i totonu o le Tusi Paia: “A e afai ua leai se poto i so outou, ina ole atu ia i le Atua, o lē foai tele mai i tagata uma ma le lē toe ta’uta’ua; ona foaiina mai ai lea ia te ia” (Iakopo 1:5; tagai foi Iosefa Samita—Talafaasolopito 2:11–12). I se faatuatua lē maluelue ma le faigofie, na mulimuli ai Iosefa talavou i le fautuaga a le mau. Na ia alu atu na o ia i le togalaau, lea na ia tatalo atu ai ina ia iloa po o fea le Ekalesia e ao ona auai. O le tali mai i lana tatalo, na faaali mai ai le Atua le Tama ma Iesu Keriso ia te ia. O se tasi nei o mea, sa faatonuina ai e i La’ua o ia, e aua nei auai i se tasi o Ekalesia na i ai i lena taimi. (Tagai Iosefa Samita—Talafaasolopito 2:13–20.)

Ina ua faamaonia le agavaa o Iosefa Samita, sa tuuina atu loa ia te ia lana misiona paia o se perofeta a le Atua. Na ala mai ia te ia ona faataunuuina e le Alii se galuega sili ma le ofoofogia e aofia ai le aumaia o le Tusi a Mamona, toefuataiina mai o le perisitua, faaalia mai o upumoni taua o le talalelei, faatulagaina o le Ekalesia moni a Iesu Keriso, ma le faatulagaina o galuega faalemalumalu. I le aso 27 o Iuni, 1844, na fasiotia ai Iosefa ma lona uso o Ailama i se osofaiga a ni tagata faaauupegaina. Sa faamaufaailogaina ai a la’ua molimau i o la’ua toto.

Ina ia atoatoa lau molimau o le talalelei Toefuataiina, e tatau ona aofia ai se molimau i le misiona paia a Iosefa Samita. O le moni o le Ekalesia a Iesu Keriso o le Au Paia o Aso e Gata Ai e faalagolago lea i le moni o le Uluai Faaaliga ma isi faaaliga na tuuina atu e le Alii i le perofeta o Iosefa. Sa tusia e Peresitene Ioane Teila, le Peresitene lona tolu o le Ekalesia, “O Iosefa Samita, le perofeta ma le Tagata Vaai a le Alii, e sili atu ana mea ua faia, vagana o Iesu lava, mo le faaolataga o tagata i lenei lalolagi, i lo soo se isi lava tagata ola na ola ai” (MFF 135:3).