Faapau Pepe

I sosaiete o ona po nei, ua avea le faapau pepe ma faiga ua masani ai, ua puipuia e ala i finauga taufaasese. Afai e te lua fetaiai ma ni fesili e uiga i lenei mataupu, e mafai ona e saogalemu e ala i le mulimuli i le finagalo faaalia lenei o le Alii. Na tausalaina e Perofeta o Aso e Gata Ai le faapau pepe, ma faasino atu i le tautinoga a le Alii, “Aua e te …fasioti tagata pe faia foi soo se mea faapena” (MFF 59:6). O loo manino la latou fautuaga i lenei mataupu: O tagata o le Ekalesia a Iesu Keriso o le Au Paia o Aso e Gata Ai e le tatau ona gauai atu, faatino, faamalosia, totogi pe faia ni fetuunaiga e faapau ai pepe. Afai e te fautuaina se faapau pepe i soo se ala, ua ono tatau ona faia sou aoaiga faale-Ekalesia.

Na saunoa mai taitai o le Ekalesia, e i ai nisi tulaga lē maalofia e mafai ona faatagaina ai se faapau pepe, e pei o le maitaga na mafua ona ua toso faamalosi le tamaitai, po o le mata’ifale ma toe ui i fanau, pe na iloiloina foi e se fomai atamai ua lamatia le ola po o le soifua maloloina o le tina, pe ua iloiloina foi e se fomai atamai faapea ua i ai ni faaletonu matuia i le pepe o le a le ola ai pe a fanau mai. Ae oo lava i nei tulaga e le mafai ona otometi ai se faatagaga mo se faapau pepe. O i latou e fetaiai ma nei tulaga, e ao ona mafaufau i le faapau pepe pe a mavae ona talanoa i taitai o le Ekalesia i le lotoifale ma maua se faamaoniga e ala i le tatalo faatauanau.

Pe a toifale se tamaitai, o le mea sili e ao ona fai o le faaipoipo o le tina ma le tama o le tamaitiiti ma galulue agai i le faatuina o se fesootaiga faaleaiga e faavavau. Afai e foliga mai e le manuia se faaipoipoga, e tatau ona la tuuina atu le pepe mo le liliuina, ae fautuaina le faia e ala i le LDS Family Services (Auaunaga a le AAG mo Aiga) (tagai “Liliuina Faaletulafono o se Tamaitiiti,” itualu 93–94).