Faasaunoa/Faatautala ma le Saua
O le faasaunoa o le sauaina lea o isi po o oe lava ia i se ala e faamanu’alia ai po o le faamaina foi. E na te faaleagaina le mafaufau ma le agaga ma e masani lava ona faamanu’a ai foi ma le tino. E mafai ona faatupuina le fenumiai, masalosalo, lē faatuatuaina, ma le fefe. O se solia lea o tulafono a le atunuu ma e matuai feteenai lava ma aoaoga a le Faaola. Ua tausalaina e le Alii soo se foliga lava o le faasaunoa po o le faasaua—faaletino, feusuaiga, upu, po o lagona. O amioga faasaua e mafai ona oo atu ai i se aoaiga faale-Ekalesia.
Fautuaga mo e Faasaunoa
Afai na e faasaunoa i soo se isi, e tatau ona e salamo i lau agasala. Aioi atu i le Alii e faamagalo mai oe. Fesili atu mo le faamagaloga a i latou sa e faatiga i ai. Talanoa i lau epikopo po o le peresitene o le paranesi ina ia mafai ona ia fesoasoani ia te oe i laasaga o le salamo ma, pe a tatau ai, ia fesoasoani ina ia e maua nisi fautuaga faaopoopo po o fesoasoaniga.
Afai e faatupuina tele e ou lagona ita lau amio faasaua, ia e aoao e pulea lou loto ita. Alu i le Alii i le tatalo, ma fesili atu ia te Ia e fesoasoani mai ia te oe. O lou tulimata’i atu i le faavavau, o le a e iloa ai o lou ita e toetoe lava a oo mai i taimi uma, o se tali i mea e lē taua tele.
Afai o e lagona le ta’usalaina i faiga faalefeusuai, ia e saili e pulea lou mafaufau. Manatua o ou mafaufauga e malosi tele ona aafiaga i lou olaga— “aua e pei ona manatu [se tasi] i lona loto, ua faapea lava o ia” (Faataoto 23:7). Aloese mai ata mataga ma soo se isi lava mea e ono mafai ona faatupuina manaoga lē mama faalefeusuaiga. Tatalo mo le malosi e “teuteuina [ai] ou manatu i le mama e le aunoa” (MFF 121:45).
Fesoasoani mo i Latou na Aafia Fua i Faiga Saua
Afai o oe o se tasi na sauaina, saili nei loa se fesoasoani. Talanoa i ou taitai o le perisitua, e masani lava o lou epikopo po o le peresitene o le paranesi ae o nisi taimi o se tasi o le au peresitene o le siteki po o le itu. E mafai ona fesoasoani ia e iloa le mea e fai.
Ia mautinoa e le tuuaiina oe mo le amio faataumaoi a isi. E le tatau ona e lagonaina le ta’usalaina. Afai na aafia fua oe i faiga faiaiga faamalosi po o isi faiga faatautala faalefeusuaiga, pe sa sauaina oe e se tasi lua te masani, po o se tagata ese, e oo lava i se tasi o le aiga, e le ta’usalaina oe i le agasala faalefeusuaiga. Ia e iloa o loo e mama, ma e alofa le Tama Faalelagi ia te oe.
Ia tatalo mo le filemu lea e na o Iesu Keriso ma Lana Togiola e maua mai ai (tagai Ioane 14:27; 16:33). Na oo le Faaola i ou tiga uma ma sauaga, e oo lava i tiga na mafua mai i isi, ma e Na te silafia foi le ala e fesoasoani ai ia te oe (tagai Alema 7:11–12). Nai lo lou saili e taui atu i ai, ia e taulai atu i mea e mafai ona e pulea, e pei o ou lava uiga faaalia i le olaga. Tatalo mo le malosi e faamagalo atu ai i e ua faatiga ia te oe.
Faaauau pea ona saili le fesoasoani mai lou taitai perisitua ina ia mafai ona ia taitaiina oe i le faagasologa o le faamalologa o lagona. O faamanuiaga o le talalelei, e mafai ai ona e taofia faiga tuputupu pea o le faasaua ma faasaoloto ai oe mai mafatiaga sa oo ia te oe..