“Ua Valaauina i Tatou e Fai Mea Lelei,” Liahona, Iuni 2024.

Ua Valaauina i Tatou e Fai Mea Lelei

Saunia e Elder Ronald A. Rasband

O Le Korama a Aposetolo e Toasefululua

Ata

Elder Ronald A. Rasband

Tatou te fausia le malo o le Atua a o tatou auauna atu i isi, tuu i luga lo tatou sulu, ma tutu atu mo le saolotoga faaletapuaiga.

Sa iloa e Kitiona aoaoga faavae sese ina ua ia faalogo i ai. Sa ia faalogo muamua i ai mai le Tupu o Noa ma ana faitaulaga—o faitaulaga o e “sa faafefeteina i luga i le faamaualuga o o latou loto” ma o e “sa tausia o i latou i lo latou paie, ma lo latou ifo i tupua, ma lo latou faitaaga, i lafoga na tuu e le tupu o Noa i luga o lona nuu” (Mosaea11:5–6).

O le mea na sili ona leaga, na fasiotia e le Tupu o Noa le perofeta o Apinati ma sa saili e faaumatia Alema ma ana tagata liliu mai (tagai Mosaea 17; 18:33–34). Ina ia faamutaina lena amioleaga, sa tauto Kitiona e taofi le tupu, o le na ia faasaoina ona o se osofaiga a sa Lamana (tagai Mosaea 19:4–8).

Mulimuli ane, sa tuuaia sa’o e Kitiona ia faitaulaga a Noa mo le aveeseina atu o afafine sa Lamana e 24. Sa ia maitauina o le valoaga a Apinati e faasaga i tagata na faataunuuina ona sa latou mumusu e salamo. (Tagai Mosaea 20:17–22.) Sa fesoasoani o ia e laveai le nuu o Limae, o e sa nofopologa ia sa Lamana (tagai Mosaea 22:3–9).

O lenei ua matua atu, sa toe faafetauia foi e Kitiona le faamaualuga ma le amioleaga a o ia tu i luma o Neoa, o lē na faailoaina atu le faafaitaulaga pepelo i totonu o le nuu. Sa “tetee atu Neoa i le ekalesia” ma taumafai e taitai sese tagata. (Tagai Alema 1:3, 7, 12; tagai foi 2 Nifae 26:29.)

I le faaaogaina o le afioga a le Atua e fai ma ana auupega, sa apoapoai atu ai Kitiona lototoa ia Neoa mo lona amioleaga. I lona ita, na osofaia ai e Neoa ma fasiotia Kitiona i lana pelu. (Tagai i le Alema 1:7–9.) O lea na iu ai aso o “se tagata amiotonu” o le sa “faia mea lelei e tele i totonu o lenei nuu” (Alema1:13).

O aso e gata ai o loo tatou ola ai, ua tatou maua ai le tele o avanoa e faataitai ai ia Kitiona o “se meafaigaluega i aao o le Atua” (Alema1:8) e ala i le “auauna atu” (Mosaea 22:4) i isi, tutu atu mo le amiotonu, ma tetee atu i faamata’u i lo tatou saolotoga e tapuai ma auauna atu i le Atua. A o tatou mulimuli i le faataitaiga faamaoni a Kitiona, e mafai foi ona tatou faia le tele o mea lelei.

Ata

tamaitai ma se ipu meaai o loo tu i autafa o se fafine o loo taoto i le moega

Lotogatasi i Auaunaga

“I le avea i ma soo [o le Faaola], tatou te saili e alolofa i le Atua ma o tatou tuaoi i le lalolagi atoa,” na saunoa ai le Au Peresitene Sili. “E naunau Le Ekalesia a Iesu Keriso o le Au Paia o Aso e Gata Ai e faamanuia isi ma fesoasoani ia i latou e manaomia le fesoasoani. Ua faamanuiaina i tatou i le i ai o le tomai, punaoa, ma sootaga faatuatuaina i le lalolagi atoa e faataunuu ai lenei tiutetauave paia.”¹

Ou te faafetai mo le auaunaga ma galuega le manatu faapito ua ofoina mai e tagata o le Ekalesia i totonu o o tatou malumalu ma i a latou uarota, paranesi, ma siteki. Ou te faafetai foi i le auauna atu o tagata o le Ekalesia i faalapotopotoga e le mafaitaulia o nuu, a’oga, ma agaalofa ma ua latou punouai i le faitau afe o galuega fesoasoani alofa i tausaga taitasi, e ofofua atu le faitau miliona o itula i le toeitiiti 200 atunuu ma teritori.²

O se tasi o auala e faalautele ai e le Ekalesia avanoa e auauna atu ai i le tele o atunuu e ala lea i le JustServe.org. E lagolagoina e le Ekalesia ae o loo avanoa mo soo se tasi e manao e faamanuia isi, o le JustServe.org “e fesootai ai manaoga volenitia o le alalafaga ma volenitia” o e “faaleleia le tulaga lelei o le olaga i le nuu.”³

E au faatasi foi le Ekalesia ma ona tagata ma faalapotopotoga o auaunaga i le lalolagi atoa. E faafetai le Ekalesia, i ona tagata, sa avea “o le faisao toatasi pito i sili ona tele i tuiga toto a le Koluse Mumu i le 2022.” E le gata i lea, sa faia talu ai nei e le Ekalesia se foai e $8.7 miliona i le Koluse Mumu.⁴

E auai foi le Ekalesia faatasi ma faalapotopotoga e aumai le suavai mama ma ni galuega faatino o le tumama i le tele o nofoaga i le lalolagi atoa. I le 2022, sa auai ai le Ekalesia i le 156 o ia ituaiga galuega faatino.⁵ Tatou te galulue faatasi foi ma foai atu i isi faalapotopotoga lea e aumaia le toomaga i fanau mafatia a le Atua.⁶

“Pe a tuufaatasi o tatou lima e auauna atu i tagata e le tagolima,” na saunoa ai Peresitene Henry B. Eyring, Fesoasoani Lua i le Au Peresitene Sili, “e tuufaatasia e le Alii o tatou loto.”⁷

Ata

lima faaofuofu ma le malamalama o le la

Ia Tuu i Luga Lo Outou Malamalama

I le avea ai ma soo o le Faaola, tatou te faamanuiaina foi o tatou tuaoi a o tatou tausia a tatou feagaiga ma ola ai i ni olaga faaKeriso. Ua aoao mai le Tusi a Mamona e faapea “o tagata o le ekalesia” e le gata ina tatau ona filifili le amiotonu ae ia faia foi o latou leo amiotonu ia lagona pe afai latou te mananao i le Alii e puipui ma faatamaoaigaina i latou (tagai Alema 2:3–7; tagai foi Mosaea 29:27). Ua faamoemoeina i tatou e le Alii e faasoa atu lo tatou faatuatua ma talitonuga ma ia tuu i luga lo tatou malamalama. “Faauta o a’u o le malamalama lea e tatau ona outou tuu i luga.” (3 Nifae 18:24).

“Tatou te le auauna lelei i lo tatou Faaola pe afai e sili atu lo tatou fefefe i tagata nai lo le Atua,” na saunoa ai Peresitene Dallin H. Oaks, Fesoasoani Muamua i le Au Peresitene Sili. Sa ia faaopoopo mai, “Ua valaauina i tatou e faavae tulaga faatonuina a le Alii, ae le o le mulimuli i tulaga o le lalolagi.”⁸

Pe i le aoga, galuega, po o le taalo, i tafaoga, i se tafaoga faamasani, po o luga o le initoneti, o soo o le Alii e le “mama e ave i o latou luga le suafa o Keriso” (Alema 46:21). E ala i a tatou upu ma a tatou galuega, tatou te molimau atu ai o loo soifua le Atua ma tatou te mulimuli atu i Lona Alo.

“O lo tatou faatuatua e le tuumavaevaeina, pe e mautinoa lava e le tatau ona faapea. O le faatuatua e le mo na o le lotu, e le mo na o le aiga, e le mo na o le [aoga],” na maitauina ai e Paul Lambert, o se tagata atamai o le Au Paia o Aso e Gata Ai i mataupu tau i felagolagoma’iga faalelotu. “E mo mea uma e te faia.”⁹

Tatou te le iloa le aafiaga o a tatou molimau, faataitaiga lelei, ma galuega lelei o le a ono iai i isi. Ae a tatou tutu atu mo le mea sa’o ma tuu i luga le malamalama o le Faaola, o le a maitauina i tatou e tagata ma o le a tapuai le lagi mo i tatou.

Ata

tamaitai o loo tu i fafo o se malumalu

Tu Atu mo le Saolotoga Faaletapuaiga

O le faafaitaulaga pepelo i aso nei, faatasi ai ma le faateleina o faalapotopotoga faalelalolagi o loo tetee e faasaga i tagata o le faatuatua, e le ese lava mai taimi o le Tusi a Mamona. O le leo o i latou o e tetee i le matafaioi taua a tapuaiga i nofoaga faitele ma lotoifale faaupufai o malo ua faateleina le leotele. O tagata faasagatau i mataupu faalelotu faapea ma malo, e aofia ai le tele o a’oga ma iunivesite, o loo faamalosia amioga ma talaiga o le ola le mama, le talitonu i se Atua, ma le le talitonu i ni tulaga maumaututu o le amio mama.

O osofaiga i le saolotoga faaletapuaiga o le a faamanuiaina pe afai tatou te le tutu atu mo a tatou aia tatau faalelotu. “I le avea ai o se ekalesia,” na ou aoaoina atu talu ai nei, “tatou te aufaatasi ai ma isi tapuaiga i le puipuia o tagata o faatuatuaga uma ma talitonuga ma a latou aia tatau e talanoa mai ai i o latou talitonuga maumaututu.”¹⁰

Sa tauina se taua i le lagi i le faitalia mama—lo tatou saolotoga e filifili ai. Ina ia faasaoina lo tatou faitalia e manaomia ai lo tatou filiga i le puipuia o lo tatou saolotoga faalelotu.

O faatuatuaga faalelotu malolosi e faamalosia ma puipuia ai aiga, nuu, ma malo. E faaosofia ai le usiusitai i le tulafono, faaosofia ai le faaaloalo mo le ola ma meatotino, ma aoao atu ai le alofa mama, faamaoni, ma le ola mama—o amioga mama e manaomia e faaauau ai se sosaiete amiotonu, saoloto, ma faalemalo. E le manaomia lava ona tatou faatoese atu mo lo tatou faatuatuaga.

O a tatou taumafaiga faafaifeautalai, o a tatou galuega sui i malumalusa, o a tatou taumafaiga e fausia le malo o le Atua, ma lo tatou fiafiaga lava e manaomia ai lo tatou tutu atu mo le faatuatuaga ma le saolotoga faalelotu. E le mafai ona aveesea mai ia i tatou lena saolotoga e aunoa ma le aveesea ai o isi saolotoga.

Na aoao mai le Perofeta o Iosefa Samita, “O le alofa i le saolotoga lea e musuia lo’u agaga—o saolotoga faaletagata ma le faalelotu o tagata uma lava.”⁵ O le saolotoga faaletapuaiga o le a musuia ai foi o tatou agaga pe a tatou mulimuli i fautuaga mai taitai o le Ekalesia:

“Ia aoaoina pea e uiga i mataupu tau le taua faalauaitele, ona talanoa atu lea ma le lototele ma le migao.”¹²
“Ia iloa o le tafia o le saolotoga faaletapuaiga o le a matuai aafia ai o tatou avanoa e tuputupu ae ai i le malosi ma le malamalama o le talalelei, ia faamanuiaina e ala i sauniga paia, ma ia faalagolago i le Alii e taitai Lana Ekalesia.”¹³
“Tutu i luga ma tautatala atu e faamautu atu o loo i ai le Atua ma o loo i ai upumoni a’ia’i ua faatuina e Ana poloaiga.”¹⁴
“Luiina tulafono o le a lepetia ai lo tatou saolotoga e faatino o tatou faatuatuaga.”¹⁵
“O atu i le lalolagi e fai mea lelei, e fausia le faatuatua i le Atua Silisili Ese, ma fesoasoani e aumaia isi i se nofoaga e sili atu ona fiafia.”¹⁶
Suesue i punaoa i religiousfreedom.ChurchofJesusChrist.org ma i religiousfreedomlibrary.org/documents.

Tatou te fausia le malo o le Atua a o tatou auauna atu, tuu i luga lo tatou sulu, ma tutu atu mo le saolotoga faaletapuaiga. Ia faamanuia i tatou e le Alii i a tatou taumafaiga e fai “mea lelei e tele” i totonu o o tatou aiga, nuu, ma malo.