Lotogatasi i la Tatou Ekalesia e Faavavau

Saunia e Angela Okoro-Omaka, Stockholm, Suetena

Ina ua mavae lo ma’ua siitia atu mai Nigeria i Suetena, sa faigata ia i ma’ua ona maua se lotu sa lagona e tonu mo i ma’ua. Ona oo lea i se tasi aso, sa ou feiloai ai i ni tamaitai talavou se toalua o e sa fai mai ia te au sa la mananao e talanoa mai ia te au e uiga ia Iesu Keriso.

Ata

tane ma le avā o loo nonofo faatasi ma uu lima

O Ata na pueina e Ashlee Larsen

O mataupu faalelotu o se vaega taua o o matou olaga i Nigeria. Sa ma maua ma lo’u toalua o Okoro le faatuatua tele ia Iesu Keriso ma alolofa ia te Ia. Ina ua matou siitia atu i Suetena, sa alu uma o ma taimi ina ua fananau vave mai le ma masaga i le tolu masina. Sa matou nonofo mo le fa masina i le falemai ma e lei auai atu i se lotu i lena taimi.

Mulimuli ane, sa ma mananao e toe o i le lotu, ae ma te lei mauaina se lotu sa lagona e tonu mo i ma’ua. Sa ma mananao i se lotu e mafai ona auai ai lo matou aiga atoa mo o matou olaga atoa ma le faavavau. Sa faaauau pea lenei manaoga mo le lua tausaga, ae sa ma le fiafia ona ua matou o ese mai le faiga masani o le o i le lotu ma tatalo faatasi o se aiga.

Ina ua atoa le tausaga o tamaiti, sa ou i ai i se afā kiona matautia ina ia mafai ona ou auai i le aoga ma aoao ai i le gagana Suetena. Sa ou faalogo i se tasi o valaau mai i o’u tua. Ina ua ou tepa i tua, sa ou vaaia ni tamaitai talavou aulelei se toalua. Ou te lei malamalama i mea na la fai mai ai, ae sa ou iloaina upu “Iesu Keriso.”

Ina ua la iloaina ou te lei tautala faaSuetena, sa la fesili mai, “E te tautala i le Igilisi?” Ina ua ou tau atu ia i laua e faapena lava, sa la fai mai, “Ma te fia talanoa atu ia te oe e uiga ia Iesu Keriso.”

“O le a se mea e uiga ia te Ia?” Sa ou fesili atu ai. “Ou te iloaina o Ia!”

Sa la talie ma fiafia tele ma sa la savavali agai mai ia te au. Sa faagaeetia a’u ma naunau ia iloa le mea o le a la fai mai ai. Sa la fai mai o i laua o ni faifeautalai a Iesu Keriso, ma sa ou ioe e toe feiloai ma i laua ma talanoa atili e uiga ia Iesu. A o ou alu ese atu, sa ou lagonaina le fiafia. Ina ua ou toe tilotilo atu ia i laua, sa na o lo la tutu ai iina ma faasusulu mai le olioli lava e tasi sa ou lagonaina.

Ata

tamaitai o loo nofo i luga o le nofoa faamalu

Ina ua ia mauaina le Ekalesia, sa “maligi loimata matagofie o Sister Okoro-Omaka ona sa ou fiafia lava e toe foi mai i lo’u Faaola.”

Toe Foi Mai ia Iesu Keriso

Ina ua ou sau i le fale mai le aoga, sa ou fai atu i lo’u toalua, “Pelē, mate mai la. Ua ou maua le ekalesia o le a avea ai i tatou ma ona tagata auai!” Sa ou gatete, sa ou matuai fiafia lava. Ou te lei iloa po o fea na sau ai nei lagona uma, ae sa ou fiafia lava i le taele o lo’u loto e uiga i le feiloai atu i faifeautalai.

E lei umi ae amata ona matou aoao e uiga i le Ekalesia toefuataiina a Iesu Keriso faatasi ma faifeautalai. Sa maligi o’u loimata matagofie ona sa ou fiafia lava e toe foi mai i lo’u Faaola. Sa leai ni a’u fesili e uiga i mea na la aoaoina ai i matou seia oo ina matou oo mai i le Tusi a Mamona. Sa faigata ia te a’u ona talitonu i soo se mea e uiga i ai. Peitai, sa fai mai faifeautalai ia te a’u e faitau le Tusi a Mamona ma tatalo e uiga i ai. Sa ou tatalo ma le faamaoni i aso uma mo ni vaiaso ia iloa pe o le afioga moni lava a le Atua, ae ou te lei faitauina lava.

Ina ua mavae ni nai vaiaso e aunoa ma se tali mai le Atua, sa ou alu i se nofoaafi mo se malaga i Stockholm. I le ala, sa ou aumaia i fafo le Tusi a Mamona ma amata ona faitau.

Sa ou faitau i le faatomuaga ma le Mau a Molimau e Toatolu ma Molimau e Toavalu, ma sa ou faitau e uiga ia Iosefa Samita. Sa ou faitau ma faitau ma faitau. E oo ane i le taimi na ou taunuu ai i Stockholm, ua ou tagi, tetete, ma tutu mone o lo’u tino. Sa ou lagona le lofituina i le Agaga o le Atua. Sa ou iloa mai faaaliga patino po o ai moni lava Iosefa Samita—o ia o se perofeta ma se auauna a le Atua. Sa ou iloa na toefuatai mai e le Alii le talalelei a Iesu Keriso i le lalolagi e ala mai ia te ia.

Ona ou talitonu ai lea i mea uma na tauina mai e faifeautalai ia te au. O le taimi lava na ou faitauina ai le Tusi a Mamona mo a’u lava ia, sa ou iloa ai e moni. Sa ou ta’u atu i faifeautalai sa ou manao ou te papatiso. Sa aumai e lo’u toalua lo matou aiga atoa e faaali ai lo latou lagolago mo a’u.

Ina ua uma lo’u papatisoga, sa amata ona matou toe tatalo faatasi o se aiga, ma sa amata ona ou aoao atu i latou e uiga i mea sa ou aoaoina. Na iu lava, ina tonu ia Okoro e feiloai ma faifeautalai. Sa ia taliaina a la aoaoga, faitau le Tusi a Mamona, ma tatalo e uiga i ai. Sa ia mauaina le tali lava lea e tasi sa ia te au, ma sa ia talosagaina foi ina ia papatisoina. Mulimuli ane, sa autasi lo matou aiga atoa i la matou Ekalesia e faavavau.