Ua Na’o Tusiga Faatekinolosi

Auai i le Konafesi Aoao—o se Pulu Pasama o Kiliata mo Lo’u Agaga Nutimomoia

Saunia e Rabbi Joe Charnes

E alala le tusitala i Colorado, ISA.

Ina ua mavae le maliu o lo’u tina, o le agalelei, musika, ma le atamai faasoa na ou oo i ai a o ou auai i le konafesi aoao o se faamanuiaga ia te a’u.

I le opo agaalofa Elder Matthew L. Carpenter o le Fitugafulu (taumatau) ma Rabbi Joe Charnes (agavale) i le konafesi aoao ia Oketopa 2019.

I le vaiaso ma le afa a o lumanai le sauniga o le konafesi aoao ia Oketopa 2019, sa tatau ai ia te a’u, faatasi ai ma aiga ma uo, ona tanumia le lalelei o lo’u tina, o Eudie (YOU-dee) Charnes. Sa nutimomoia, faanoanoa, ma faateleina le gaogao o lo’u loto. I se tulaga faigofie ma faanoanoa, o le lalelei 0 Eudie, o le lalelei sa i ai o Eudie, ua le toe i ai. Sa lei toe i ai o ia i o’u luma e pipiimau, fusi, pe faafailele—faamanuia, pese atu i ai, tagi i ai, pe tatalo faatasi. O le ola ma le malamalama na tuuina mai ia te a’u le ola ua maliu, o lona faamanuiaina ua alu atu nei ma talaatu. Ma o se vaega foi o a’u na maliu faatasi ma ia, o se vaega loloto i totonu, na tuua ai a’u e faavavau e aunoa ma lena mea. Na maliu ma le mamalu o ia, taliaina e le faatuatua, ma opoina i aao alofa o lona aiga pele: o lo’u toalua, o Sara; o lo ma afafine, o Yael; ma a’u, o lona atalii matuaoti fou.

Sa matou faatasi uma, ae sa tuua taitoatasi lava—na tuua i matou taitoatasi i le faanoanoa, peitai sa fusia faatasi i lo matou faanoanoa faifaatasi. Ma o lena faatasiga maaleale sa matou faasoaina i le tasi ma le isi sa mafai ona maua ai le fesoasoani, ma i nisi taimi sa taofia faatasi ai, e ala i le agalelei ma le i ai o oa soifua e toalua o le nuu o le Au Paia o Aso e Gata Ai: o Brother Mike Law ma lana soa selesitila e faavavau, o Sister Debbie Law, o Colorado, ISA. Ua lofituina o la’ua loto faamaulalo i se alofa lea e na o ona faamatalaina e musuia mai luga, ma e matou te faafetai e faavavau mo le malamalama o lo la’ua faatasi mai i le taimi o la matou savaliga e ui atu i le pogisa ma le faanoanoa o le oti.

O le taimi lea, i le na o le lua aso talu ona tanumia lo’u tina, sa tali mai ai la’u tagi faatauanau mo le faamanuiaina—sa taliina i se valaau faigofie mai le telefoni ma le ofo a la’u uo faapelepele o Uso Mike Law. Sa ia toe aapa mai ma aapa atu i totonu, e pei ona masani ai, e vaai poo ua a mai au, i le maliu i lenei malaga umi ma le tuuatoatasi o le faanoanoa.

A o ma talanoa, sa ou matauina se vaaiga maaleale o le le mautonu na ulu atu i le leo o Mike a o ia fesili mai ia te au i le fesili lenei: “Joe, ou te iloa lava atonu o le tali o le leai, ae e te fia alu i le konafesi aoao, pe afai e mafai ona ou maua ni pepa ulufale?” O la’u tali sa faigofie, vave, tuusa’o, ma faanatinati: ”Mike e leai moni lava se isi nofoaga e tatau ona ou i ai.”

O a’u upu na, a’u uo; o a’u upu na—o upu na usuina i se pese paia ma le faanoanoa paia. Sa na ona ou iloaina lava o le konafesi aoao o le taimi paia lea o le siitia o le alofa tunoa mo lo’u loto. Sa ou iloaina o aao limafoai o tagatauma o le Au Paia o Aso e Gata Ai--o loto musuia o le a fofola ma faaloaloa mai ma le alofa e le faatuaoia—ma o le a le toilalo lava lima o o latou loto agaalofa.

I le konafesi aoao, sa na faigofie ona ataata mai tagata mai le loto. Latou te faafeiloai mai mai le loto, ma latou susulu mai le loto. O loo i ai se gagana le magagana o le i ai o le loto. O lo latou auai ua faapea mai talofa. O le na o le i ai iina ua faapea mai talofa. O le tau lava o le i ai iina sa mafanafana.

O le pulu pasama lenā sa manaomia e lo’u agaga tigā—lena pulu pasama e opoina ai le loto o le agalelei o le konafesi aoao. O le mafuaaga lenā o le avea moni ai o le konafesi aoao ma pulu pasama faamalolo o Kiliata mo lo’u agaga o loo manaomia le fesoasoani.

Ma o se faamaoniga lautele lenei o lo outou faatuatuaga maoae. O le agalelei atamai, alofa, faafailele o le faataitaiga lea o le auaunaga a le nuu o le Au Paia o Aso e Gata Ai; o le faatusa ma le talatuu o lo outou faatuatuaga. Afai e moni le upu tuai e faapea “o le ituaiga o poto aupito maualuga o le agalelei,” ona avea moni lea o le konafesi aoao o se nofoaga e faapotopoto ai mo nisi o tagata soifua sili ona popoto i luga o le paneta.

O outou “o se malamalama i atunuu,” ma o se malamalama i lo’u loto. Ia manuia oe, Mike, mo le mulimuli i uunaiga a lou loto. O lou tuuto e fesoasoani ia te au e toefuatai mai le filemu i totonu ua pepese ai le aufaipese faalelagi, “Le auauna lelei e ma le faamaoni” (Mataio 25:23).

Sa faaauau pea le mamalu o le konafesi aoao i lona atamai faamusika. Ma ou te faamamafa atu le atamai faamusika, ae le na o le matagofie o viiga. O viiga paia uma o galuega o le faatusisolo ma le mamalu faagaeetia lea e musuia ai o tatou agaga ia lele, i le ma e ala i pesega. Ae o viiga foi o ni manatunatuga loloto, ia mafaufau loloto i taimi uma ma tatalo mai le loto. O a latou upu e faatatau i le leoleoina o o tatou olaga, e faataitai ai mo i tatou le atamai, paia ma le Faaleatua. Mai le mamalu o le atamai faamusika, tatou te agai atu ai i le mamalu o le poto lava ia, e pei ona oo mai nei le Au Paia i luma o tagata uma e faamalamalamaina o tatou olaga i se valaauga faamaoni ma tumu i le agaga. I mea e na o le pau le mea e mafai ona faamatalaina ai o se faasologa o taulaga sili o le atamai, o alii ma tamaitai o le meaalofa o le loto paia o le tagata i se maimoaga mataina o le paia, taulaga ma le tatalaina o se atulaulau o le malamalama moni.

I se tusiga e umi atu, “Manatunatuga Lautele: O Se Manatunatuga Loloto o Se Aoao i le Konafesi Aoao,” ua ou faasoa atu ai nisi o savali na tulagaese ia te a’u, sosoo ai ma ni o’u lava manatu faaalia i nisi o na mea taua paia.

Ou te tuua nei outou, uo, ma le taulaga faaiu e tasi o le mamalu. E aofia ai se tuafafine paia ma le Iunivesite o Polika Iaga (BYU) o le sa faamanuiaina a’u i upu o le lotofaafetai mai se nofoaga loloto i totonu. Ou te toe fai atu ma manatunatu soo i ana upu.

I le Aso Gafua mamalu ina ua mavae le konafesi aoao, sa ou maua ai le avanoa e asiasi atu ai i le vasega a Polofesa David Seely e uiga ia Isaraelu anamua i le BYU–Provo. Ina ua maea se tatalo amata e fesoasoani e tatala o matou loto i le lagi, i luga ma totonu, sa amata le matou vasega e ala i le faasoa atu o o matou manatu e uiga i le konafesi aoao ma le meaalofa faafaileleina sa i ai. Ina ua uma ona faasoa atu nisi o o’u manatu patino i le mauaina o taimi paia, sa tali mai lo matou tuafafine paia o le Au Paia o Aso e Gata Ai, “Faafetai lava mo le faamanatu mai ia te au o le matagofie o lo’u faatuatua.” E oo mai i lenei aso, o loo lagonaina pea ana upu i totonu.

Ia te oe, le tuafafine pele, o lona igoa e le o iloa ia te au, ma i le nuu atoa o le Au Paia o Aso e Gata Ai, sei ou fai atu foi faafetai ia te oe. Faafetai atu mo le matagofie o lou faatuatuaga. Faafetai mo le faamanatu mai ia te au o le matagofie o le faatuatua. Faafetai atu mo le faamanatuina ma le musuia o au e ola ma faailoa atu ma le matagofie atili lo’u lava faatuatua. Faafetai mo le faamanatu mai ia te au o le gafatia matagofie e mafai ona fua mai ma fuga mai ai le faatuatua. O lo outou faatuatua o se “malamalama i atunuu” ma o se fetu pupula susulu i lo’u loto.

O lo outou ala o se ala o le fati, ma o se ala o le alofa tunoa ofoofogia. O se fati e musuia ai ona soo faamaoni ia ola i ni olaga o auaunaga, faatasi ai ma le fiafia i le auauna atu, i auaunaga alofa i tagata uma. O lau meaalofa lena, o lou faamanuiaga lena, ma o lou mamalu lena o le Au Paia o Aso e Gata Ai.

O le Konafesi aoao o le Mamalu Aoao. Ou te faamanuia ia te outou i mea uma tou te faia, a o outou “O Atu ma le Faatuatua.”¹ “Ia Mafuta le Atua ma Outou Seia Tatou Toe Feiloai.”²

Ia Filiemū.