Ua Na’o Tusiga Faaeletonika
O Auala Faigofie e 7 e Faaaoga ai Tekinolosi mo le Galuega a le Atua o le Faaolataga ma le Faaeaga
I totonu o aso e fitu, e mafai ai ona e fesoasoani e suia oe lava ma suia le lalolagi.1
“Pe tou te mananao e avea o se vaega tele o le lu’i aupito silisili, le mafuaaga aupito silisili, ma le galuega aupito silisili i le lalolagi i le taimi nei?”2
I le aso 3 Iuni, 2018, sa fai atu ai e Peresitene Russell M. Nelson lenei fesili i se faigalotu e valaaulia ai tagata taitoatasi e auai i le autau a le Alii, po o i se isi faaupuga, e faapotopoto Isaraelu.
“Na auina mai outou i le lalolagi i lenei taimi patino, lenei taimi aupito taua i le talafaasolopito o le lalolagi, e fesoasoani e faapotopoto ia Isaraelu,” na saunoa ai Peresitene Nelson. “E leai se mea o tupu i le lalolagi i le taimi nei, e sili atu ona taua nai lo lena. … O le misiona lenei na auina mai ai oe i le lalolagi.”3
Pe ua e mafaufau ea i le ala ua faamanuiaina ai i tatou e le Atua i tekinolosi e fesoasoani ai ia i tatou i lenei galuega?4 E ui e tele auala e faia ai lenei mea, ae o manatu nei e fitu e mafai ona e faataitaia i lenei vaiaso e te amata ai i se olaga atoa o le auai i le galuega o le faaolataga ma le faaeaga a le Atua. Ia manatua ua na o ni manatu nei e fesoasoani ia te oe e faataitai ai. Mafaufau ma le agaga tatalo po o le fea o manatu ma sini nei—ma manatu fou e oo mai ia te oe e ala i faaaliga—o le a sili ona aoga mo oe.
Aso 1: Saili Avanoa e Auauna Atu Ai
E pei o Iesu Keriso, tatou te taumafai e auauna atu i isi.
E ala i upu o gutu, e mafai ai ona tatou faalogo e uiga i avanoa eseese faaleauaunaga e fesoasoani ai i uo, aiga, ma tuaoi. Faatasi ai ma le fesoasoani a tekinolosi, e mafai ai ona tatou maua le tele o avanoa e fesoasoani ai i lo tatou nuu i le lotoifale po o tagata i le salafa o le lalolagi.
I le asō, taumafai e saili mo auala e faasoa atu ai le alofa faaKeriso e ala i le auauna atu. Afai e mafai, saili se gaoioiga auauna atu e fai i le aso pe saini e auai i se galuega faatino o loo loma. Valaaulia uo, aiga, ma lau uarota po o le paranesi ina ia auai!
Afai e te le o mautinoa po o fea e amata ai, atonu e mafai ona maua i le JustServe.org ni avanoa volenitia i la outou eria.
Manatua le mea na aoao mai e Peresitene Russell M. Nelson: “Po o fea lava o loo tatou nonofo ai, e lagona e tagata o le Ekalesia le faananau e uiga i le tulaga faatamā o le Atua ma tulaga faaleusoga o tagata uma. O lea, o lo tatou olioli silisili e oo mai pe a tatou fesoasoani atu i o tatou uso ma tuafafine, po o fea lava o tatou nonofo ai i lenei lalolagi matagofie.
“O le tuuina atu o le fesoasoani i isi—i le faia o se taumafaiga lotofuatiaifo e popole mo isi e pei, pe sili atu nai lo le tatou popole ia i tatou lava ia—o lo tatou olioli lea. Aemaise lava, ou te fia faaopoopo atu, pe a le talafeagai ma pe a aveesea ai i tatou mai i o tatou tulaga mafanafana. O leola ai i lena poloaiga sili lona lua o le ki lea i le avea ai ma se soo moni o Iesu Keriso.”5
Aso 2: Faasaoina o Talafaasolopito o Aiga
O le faaaogaina o tekinolosi faaonapo nei, e mafai ai ona tatou faasaoina le talafaasolopito o i tatou lava ma o tatou tuaa!
I le asō, mafaufau e fai se tasi o mea nei: faaeletonika ata ua lolomiina, faamaumau ma faaeletonika tala faaleaiga, amata se api talaaga faaeletonika, pe pue ni ata ma vitio o manatuaga taua.
O le FamilySearch.org o se meafaigaluega maoae e mafai ona tatou faaaogaina e faamaea ai lenei gaoioiga. Na faamatalaina e Elder David A. Bednar o le Korama a Aposetolo e Toasefululua le uepisaite a le FamilySearch p loo umia “se tuufaatasiga o faamaumauga, punaoa, ma auaunaga e faigofie ona maua i komepiuta patino ma ni masini eseese e uu i lima, ua mamanuina e fesoasoani ai i tagata ia iloa ma faamaumau o latou talafaasolopito o aiga.”6
Faatasi ai ma le FamilySearch.org, e mafai ona tatou maua galuega faalemalumalu e manaomia ona faia mo o tatou aiga po o faamatalaga o faasinoupu e fesoasoani ai i isi e sue faamaumauga e uiga i o latou tuaa.
O Manatuaga o le FamilySearch ma polokalama o Gafa o le FamilySearch e mafai foi ona fesoasoani ia i tatou i nei taumafaiga!
Aso 3: Fesootai ma Uo ma Aiga
O fegalegaleaiga ma i latou tatou te alolofa i ai e mafai ona fesoasoani latou te lagona ai le faatauaina ma le fiafia. Faatasi ai ma tekinolosi, e mafai ona tatou valaau atu, tesi, po o le auina atu o ni savali tuusa’o i uo ma aiga, e tusa lava po o le a le latalata po o le mamao ese o latou i ai.
I le asō, faaalu sina taimi e valaau atu ai pe auina atu se savali i se tasi e manaomia lou agalelei, lou lotofaafetai, pe atonu foi o se faatoesega.
Na saunoa mai Peresitene Nelson: “O le asō o le a ou talosagaina ai i tatou e fegalegalea’i ma isi i se ala maualuga atu ma sili ona pa’ia. … ‘Afai o i ai nisi mea e mamā, matagofie, pe logoleleia pe tauleleia’ [Mataupu Faavae o le Faatuatua 1:13] e mafai ona tatou fai atu e uiga i se isi tagata … e tatau ona avea lena mea ma a tatou tulaga o fesootaiga.”7
Aso 4: Faasoa ma Valaaulia
O ala o faasalalauga faaagafesootai e mafai ona avea o se meafaigaluega matagofie e fesootai ma faasoa atu ai savali faagaeetia ma le talalelei i fanau uma a le Atua.
Na saunoa mai Elder Gary E. Stevenson o le Korama a Aposetolo e Toasefululua: “O tagata o le Ekalesia e tutu o ni molimau a le Atua i taimi uma, i mea uma, ma i nofoaga uma. O avanoa e fai ai lenei mea i le lalolagi o initoneti e faaaoga ai a tatou lava anomea musuia po o le faasoa atu o anomea faagaeetia na saunia e isi ua le gata mai lea. Tatou te molimau atu pe a tatou alolofa, faasoa ma valaaulia, e oo lava i luga o le initoneti. O au savali e tuu i luga [tweets], savali tuusa’o, ma tusiga o le a faia ai se faamoemoega maualuga atu, ma paia atu pe a e faaaogaina foi ala o faasalalauga faaagafesootai e faaali atu ai pe faapefea ona mamanuina e le talalelei a Iesu Keriso lou olaga.”8
O le asō, e mafai ona tatou taumafai e faasoa atu a tatou molimau ia Iesu Keriso, o se upusii faagaeetia, po o se lauga musuia talu ai nei mai le konafesi aoao. O pese po o atavali faagaeetia o ni filifiliga matagofie foi ia e faasoa atu.
Na faasoa mai Elder Bednar, “Ou te apoapoai atu ia te outou e tafi le lalolagi i savali ua faatumulia i le amiotonu ma le upumoni—savali ia e faamoni, faagaeetia, ma tauleleia—ma e moni lava e tafi le lalolagi e pei o se lolo.”9
Aso 5: Atiina Ae le Ola Tutoatasi
Ina ia ola tutoatasi, o nisi taimi tatou te manaomia ai le fesoasoani mai punavai i fafo atu.
O le asō, e mafai ona tatou faia se mea se tasi e atiina ae ai lo tatou ola tutoatasi. Mo se faataitaiga, e mafai ona tatou mafaufau e faamalosia a tatou molimau e uiga i se autu patino po o le aoao pe faapefea ona faaleleia se tamai pa o se pa’u. E mafai ona tatou filifili e a’oa’o pe faapefea ona kuka se meaai mo se vaega po o le galulue i tomai e manaomia mo se galuega o e moemiti iai. Po o le a lava lau filifiliga, fuafua e amata ona galue ai, ma mafaufau pe mafai faapefea ona fesoasoani tekinolosi ia te oe.
O uo ma tagata o le aiga e mafai ona avea ma punaoa maoae e aoao ai se mea fou. Peitai, o nisi taimi e leai se tasi mo i tatou e liliu atu i ai e mafai ona fesoasoani mai. E ui e taua le siaki pe ono faatuatuaina se uepisaite, ae e mafai ona tatou maua ni vitio e aoao ai pe faapefea ona fai se mea po o ni faatonuga mai lea laasaga i lea laasaga i se sailiga vave.
A o tatou taumafai e atiina ae le ola tutoatasi e siomia ai le talalelei a Iesu Keriso, e mafai ona tatou faitauina tusitusiga paia; lauga ma faigalotu; tusi lesona o le Sau, Mulimuli Mai ia te A’u; mekasini a le Ekalesia; ma isi. O loo maua nei mea uma i le ChurchofJesusChrist.org ma i le polokalama o le Potutusi o le Talalelei. O loo i ai foi vaega e tusi ai faamatalaga, faailoga, pe faailogaai upusii ma itulau e fesoasoani ia i tatou. Ona mafai lea ona tatou tatalo faatauanau mo le Agaga e molimau atu i le moni o mea tatou te faitauina ma mo faaaliga faaletagata lava ia mai le Atua.
Na saunoa mai Elder Hugo E. Martinez o le Fitugafulu: “O le taumafai ia ola tutoatasi o se vaega o la tatou galuega i luga o le ala o feagaiga e toe taitai atu ai i tatou i le Tama Faalelagi ma Lona Alo, o Iesu Keriso. O le a faamalosia ai lo tatou faatuatua ia Iesu Keriso ma fusia fiafia ai i tatou ia te Ia e ala i feagaiga ma sauniga o le faaolataga ma le faaeaga. O le ola-tutoatasi o se aoaoga faavae o le talalelei a Iesu Keriso, ae e le o se polokalama. O se faagasologa tumau mo le olaga atoa, ae le o se mea e faa-tasi ona tupu.”10 Pe a faaaogaina ma le poto, e mafai e tekinolosi ona fesoasoani ia i tatou i lena sailiga i le olaga atoa o le faateleina o le ola tutoatasi.
Aso 6: Faalauteleina a Tatou Aoaoga
O le asō, e mafai ona tatou taumafai e aoao se mea fou. Filifili se autu e manaia ma faitau se tusiga, matamata se vitio, pe faalogologo i se faasalalauga. Vaai pe o i ai ni savali talu ai nei mai perofeta ma aposetolo e uiga i lena autu faapitoa. Mafaufau e faasoa atu lenei faamatalaga fou i se isi tagata!
O manatu e mafai ona aofia ai le aoaoina o se gagana fou po o le faalolotoina o le malamalama i se autu faaleagaga pe faaleaoaoga.
Na saunoa mai Peresitene Nelson, “E matua taua tele le a’otauina o outou—ia i matou, ia te outou, ma i le Atua.”11
O isi avanoa e faalautele ai a tatou aoaoga e mafai ona aofia ai le lesitala i aoaoga maualuluga atu. O le tele o kolisi ma iunivesite e ofoina atu kosi i luga o le initoneti mo tikeri. (BYU–Pathway Worldwide o se punaoa matagofie e maua ai se faailoga i luga o le initoneti i se tau taugofie!) O nisi uepisaite e mafai foi ona ofoina atu ni kosi e le totogia. E pei o le faateleina o lo tatou ola tutoatasi, e mafai ona tatou liliu atu i uepisaite faatuatuaina e fesoasoani ia i tatou e aoao se mea fou e auai ai i le aoaoina mo le olaga atoa.
Aso 7: Manatunatu
I le aso mulimuli o lenei fuafuaga e fitu aso, taofi ma tomanatu. Na faapefea ona e tuputupu ae ma suia a o e taulai atu i le faaaogaina o tekinolosi o se vaega o le galuega a le Atua o le faaolataga ma le faaeaga? O a ni mea ua e aoaoina e uiga i tekinolosi? I taimi e te faaaogaina ai tekinolosi, e mafai faapefea ona fesoasoani ia te oe e faapotopoto ai Isaraelu?
Tusi ou manatu ma metotia i luga o pepa po o luga o le initoneti e manatua ai mea sa e aoaoina.
A o tatou atiina ae lo tatou tomai e faaaoga ala o faasalalauga e faalautele ai le galuega a le Atua, e mafai ona avea i tatou ma se faataitaiga mo isi e mulimuli ai.
O loo faapea mai le Mataio 5:14–16:
“O outou o le malamalama o le lalolagi outou. E le mafai ona lilo le aai ua tu i luga o le mauga.
“Latou te le tutuina foi le lamepa i le tuu ai i lalo o le mea e fua a’i saito, a e tuu i luga lava o le tuugalamepa ia pupula atu ai i e o i le fale uma.
“Ia pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tama o i le lagi.”
O le faasoaina atu o le malamalama o Iesu Keriso o se mea e mafai ona tatou faia i o tatou olaga atoa. Aisea e le faaaogaina ai punaoa ua tuuina mai e le Atua ia i tatou e faalautele ai Lana galuega?