“Aapa Maualuga Atu,” Liahona, Iuni 2024.
O Leo o le Au Paia o Aso e Gata Ai
Aapa Maualuga Atu
Sa ou mafaufau pe aisea na tu ai Emily i luga o le ala seia oo ina ou vaaia o ia aapa atu mo le tamaitai talavou sa i ona tua.
Ata pue na saunia e le tusitala
A o auauna atu lo’u toalua o se peresitene o Tamaitai Talavou a le uarota, o taumafanafana taitasi sa ia valaaulia ai a’u i le tolauapiga a Tamaitai Talavou e fesoasoani i gaoioiga i fafo. I le taimi o se tolauapiga talu ai nei, sa ou fesoasoani ai i se auala o maea sa savavali ai tamaitai talavou a o fusi o latou mata.
O i latou na savavali i le ala sa tatau ona pipiimau i se maea manifinifi lea na nonoa atu mai le tasi laau i le isi. A uma ona latou taunuu i laau taitasi, o le a latou tagotago faataamilo i le ogalaau o le laau mo le vaega o le maea lea e taitai atu ai i le isi laau. Na faaalia i le kosi ni nai vaega faigata, e aofia ai se mutaaga motutu. Sa ou fesoasoani i tagata auai pe afai latou te tautevateva pe sa i ai se faafitauli i se tasi o nofoaga na faapitoa le faigata i le afa o le auala.
I lena vaega, e nonoa le maea i se laau e pei ona masani ai. Ae o le maea e tau atu i le laau e sosoo ai sa tu i ni nai futu i luga a’e o le maea e tau mai i le laau lea. E oo atu i le taimi lena i le auala, ua na o le aapa atu o tamaitai talavou i pogati laau taitasi e sue ai le isi maea. Ina ua latou tauivi e sue le maea maualuga atu, sa ou fai atu ia i latou, “Aapa maualuga atu.”
E pei o isi na muamua atu ia te ia, sa lei pine ae le fiafia se tamaitai talavou e igoa ia Emily i le taumafai e sue le maea maualuga atu. Ina ua mavae le 20 sekone, sa ou musumusu atu, “Aapa maualuga atu.” Sa lei pine ae maua e Emily le maea, ae sa tu o ia.
Nai lo le faaauau ai, sa faliu atu Emily ma aapa atu mo le tamaitai talavou sa i ona tua, o Gwen. Ona sii lemu lea e Emily le lima o Gwen i le maea maualuga atu ina ia ona iloa le mea e maua ai. Ona alu atu ai lea o Emily, ae mulimuli atu ai Gwen.
Sa itiiti le taga fesoasoani a Emily, ae sa faamanatu mai ai ia te au lo tatou tiutetauave mamafa o ni soo o Iesu Keriso e fesoasoani i isi i luga o le ala o feagaiga, fesoasoani i fanau a le Atua ia aapa maualuga atu, ma “sii i luga lima ua tautau i lalo” (Mataupu Faavae ma Feagaiga 81:5).
“A o tatou siitia isi, tatou te tutu maualuga teisi atu i tatou lava,” na aoao mai ai Elder Dieter F. Uchtdorf, ao Fesoasoani Lua i le Au Peresitene Sili. Sa ia saunoa foi: “Pe a tatou aapa atu e faamanuia olaga o isi, e faamanuiaina foi o tatou olaga. O le auauna atu ma le ositaulaga e tatala ai pupuni o le lagi, ma faatagaina ai faamanuiaga silisili e o mai i o tatou luga” (“O Le Fiafia, O Lo Outou Tupuaga,” Liahona, Nov. 2008, 119).