“O Le Molimau a se Tina: O Se Meaalofa mai le Atua,” Liahona, Iuni 2024.
O Se Molimau a se Tina: O Se Meaalofa mai le Atua
I le aiga o lo’u toalua, sa ou maua ai le aiga, auai, ma le mea e sili ona taua, o se molimau i lo’u Tama Faalelagi.
Sa ou ola ae o se tamaitiiti e toatasi, na tausia e se tina nofotoatasi. Ma te siitia soo. Ou te manatua le lagona e peiseai e leai so’u tulaga mautu po o se nofoaga e ta’ua o le aiga. Ina ua oo i lo’u tausaga faaiu i le aoga maualuga, sa siitia atu lou tina i Kalefonia ae ou nofo pea i Iuta, ma le faamoemoe e maua se tulaga mautu i lo’u olaga.
Sa ou siitia atu ma nonofo ma nisi o o’u tauaiga. Sa ou sau ma ou alu e pei ona ou loto i ai, ma e lei siakia lava au e se tasi. E faapei o miti a talavou uma, e sa’o a? Sa le mo a’u lea faiga, ma e le o le tulaga mautu lea sa ou faamoemoe i ai. Sa ou lagonaina pea e pei a’u o se tagata tuulafoaina. Sa ou lagona le tuuatoatasi.
Sa ou faafoliga toa, ma foliga fiafia i le ao, ae i le po sa masani ona ou paka i se pakaga taavale a le Ekalesia e faalogologo ai ma loimata i musika a le Ekalesia. Sa amata ona ou maua lenei lagona naunau ia iloa sa i ai moni lava le Atua.
“Tama Faalelagi, ou te fia iloa o loo i ai Oe. O a’u ua leiloa. Ua ou lagona le tuuatoatasi. Ou te fia iloa mo a’u lava. Ou te matua manaomia lava ona iloa.”
Filemu. Na pau le mea na ou faalogo i ai o le filemu.
E lei oo mai lava lena filemu ma le mafanafana. E oo mai pea ia te a’u le lagonaina o le toilalo, e pei na maimau lo’u taimi i le tatalo. O tatalo sa ou faia i na po i la’u taavale, i loimata, sa foliga mai e le taliina i taimi uma lava. E foliga mai e iai i taimi uma lava … le filemu.
I le aluga o nai tausaga na sosoo ai, sa ou lagonaina pea le tuuatoatasi, ae e ui lava i na tatalo na foliga mai e le taliina mai, ae sa i ai pea lo’u faatuatua o loo i ai le Atua.
O se Lagona o le Auai
Ina ua ou feiloai i le alii ua avea ma o’u toalua, sa iu ina ou lagonaina se lagona o le auai ma le mautu—o se lagona o le aiga. Sa faafeiloai a’u ma le loto atoa e lona aiga. O se mea maoae lena mo a’u aua sa ou moomoo mo na lagona mo se taimi umi lava. Ina ua ma faaipoipo i le malumalu, sa ou lagonaina le olioli tele i le auai ai i se aiga e faatotonugalemu i le talalelei.
Sa ou fiafia e vaai i faamanuiaga faaleperisitua o tuuina atu i le aiga, auai i le lotu i le uarota a le tina o lo’u toalua ma le taumafataga o le afiafi i lona togalaau mulimuli ane, ma faalogologo i musika malie o tata mai i lona faamalama i le umukuka a o matou nonofo uma, aai, ma talanoa. O nei aafiaga na mauaa i lo’u loto ma amata ona faatumulia ai se gaogao lea sa manaomia ona faatumuina. O lenei iunite faaleaiga o le mea tonu lava lea sa ou manaomia, ma sa silafia e le Atua. Ae e lei uma ona Ia taliina na tatalo na faia i le leva o le po.
Sa ma saofafai faatasi ma lo’u tina faaletulafono i lona faapaologa i se tasi taeao. Sa ia fai mai se mea e taua tele ia te au. Mo le taimi muamua i lo’u olaga, sa ou faalogo ai i le Agaga o molimau mai ia te au o loo i ai moni lava le Tama Faalelagi.
“Pe a e iloa o loo i ai moni lava le Tama Faalelagi iina,” sa ia fai mai ai, “e suia mea uma.”
Mai iina, na suia ai mea uma! Sa tuputupu a’e la’u molimau a o ou saili ia iloa atili. Ua ou iloa nei le taimi e fetalai mai ai le Agaga ia te au. Ou te iloa lena lagona matagofie pe a latalata mai o Ia.
O Se Tali mai le Tama Faalelagi
I se tasi aso sa ou faitau ai i se fesili musuia i luga o ala o faasalalauga faaagafesootai lea na fesili mai, “O fea o le a e feiloai atu ai i le Alii i le aso?”
Sa ou “feiloai” ia te Ia e ala i se uunaiga faaleagaga na oo mai ia te a’u a o ou savali atu i se auala tanu e latalata i lo matou fale i ni nai tausaga talu ona ou faaipoipo. Sa ou tu ma tusi i lalo le uunaiga. Sa ou vaai ia te a’u lava i na tausaga uma ua mavae, i le nofonofo ai na o a’u i le paka o taavale a le Ekalesia ma malamalama ai e faapea, i lena taimi, na vaai ai le Atua i le mea sa le mafai ona ou vaaia.
O le mea sa le mafai ona ou vaaia i lena taimi o le, i se aso o le a faaali mai ai e le Atua ia te au po o ai o Ia e ala mai i lo’u tina faaletulafono i le lumanai, o lē ou te lei feiloai i ai i le taimi lea. Sa mafai ona Ia vaai o le a ou maua se sootaga ma ia o le a fausia ma faamalosia ai a’u i auala ou te lei iloaina muamua lava.
Sa Ia tali mai ia te au i lena taimi tuanai ua leva, ae ou te lei lagonaina. Sa Ia vaai i le ata telē, ae ou te lei vaai i ai. Sa le mafai ona ou vaai i Ana fuafuaga mo a’u. I lena taimi i la’u savaliga, sa Ia uunaia lemu lo’u loto i mea sa Ia teuina mo a’u i le taimi atoa lava.
Pe a ou faalogo i lo’u tina faaletulafono o tatalo pe talanoa e uiga i lona alofa mausali mo lona Faaola, e mafai ona ou lagonaina lana molimau. O le faamanuiaina e avea ai ma se tasi o ona afafine o se meaalofa faapitoa mai le Atua. O lana molimau o se meaalofa foi mai le Atua e faamanuiaina ai o tatou olaga uma. Ou te iloa o loo soifua lo’u Faaola aua sa ia faaaluina lona olaga atoa e faalatalata atu ai ia te Ia. Na te faasusulu atu Lona moni mo tagata uma ina ia vaai i ai.