“O le Mea Na Aoaoina ai A’u e se Pāpā Falaoa e uiga i le Auaunaga,” Liahona, Iuni 2024.
O Leo o le Au Paia o Aso e Gata Ai
O le Mea Na Aoaoina ai A’u e se Pāpā Falaoa e uiga i le Auaunaga
O le a se mea e mafai ona ou fafagaina ai la’u tama teine i lenei afiafi o le a aoga mo lana ’aiga paleni?
O la’u uo o Wendy o se kuka lelei tele. Mai le aso na ia siitia mai ai i le auala e le mamao mai lo matou aiga, sa ia faasoa mai ai ni meaai ia i matou. E i ai lava sana alofaga i taimi uma: “O le a le ofi lenei mea i la’u pusa aisa,” po o le “Sa ou soona faia ni meaai se tele!” Po o le a lava lana tala e fai mai pe a ia aumaia ana meaalofa, o le mea ou te faalogo i ai i taimi uma o le, “Ou te alofa ia te oe.”
Sa ou lagonaina lona alofa mo lo matou aiga aemaise lava ina ua mavae se tasi aso faigata tele. O se tasi o la’u fanau e lei leva ona maua i se faaletonu o le teena o meaai, ma o mea uma e uiga i meaai sa faigata ma atuatuvale ai lo matou aiga.
I se tasi po sa matou feiloai ai ma la’u tama teine ma ana ’au fofo. I lenei fonotaga sa tuuina atu ai ia te ia se fuafuaga o le taumafataga, ma o la’u galuega o le fuafuaina o ni ’aiga se tolu ma ni vai’aiga mama se tolu mo ia i aso uma. O nei ’aiga ma vai’aiga mama sa tatau ona ausia ni taiala faapitoa o meaai o le a fesoasoani e toefuatai ai lona mamafa.
O lenei galuega sa lofituina tele mo a’u. E le o au o se kuka lelei, o lea o le mauaina o na taiala patino ma le faamoemoe e taumafai ia ai e la’u tama e le manao e ai le tele o meaai na toeitiiti lava a ou tagi ai. A o matou tietie atu i le fale, sa ou mafaufau ma le lotovaivai lava i se manatu se tasi: “E leai se mea e tatau mo lana vai’aiga nanei.”
Ina ua taunuu i le fale, sa ou taulaalaa atu i le faitotoa ma vave ona sosogi i se mea manaia. O iina, o loo taatia ai i luga o le fata o le umukuka, se papa falaoa na tiliva mai e Wendy a o matou o ese atu. Sa i ai se saito, se fualaau aina, ma se ga’o—e atoatoa mo le meaai o le afiafi sa matou manaomia! E sili atu foi ona lelei, sa ’ai ma le loto naunau e la’u tama teine.
Ina ua ou valaau atu ia Wendy mulimuli ane e faafetai atu ia te ia mo le falaoa, ou te lei faasoa atua le tala atoa. Atonu sa mafaufau o ia pe aisea ua fai ai sina o’u fiafia i lana meaalofa. Sa lei iloa e Wendy o loo ia i matou se tauiviga. Sa na ona ia faia lava ni falaoa fa’i “ua tele naua” ma sa lei manao e maimau.
I ni nai masina mulimuli ane, a o ou faalogologo i se faasalalauga e uiga i le avea ma tagata tausi feagaiga, sa ou mafaufau po o le a moni lava le uiga o le avea ai ma se tagata tausi feagaiga. Ona oso mai lea i lo’u mafaufau le meaalofa a Wendy o le falaoa fa’i.
Ina ua mulimuli Wendy i lona loto ma aumai ia i matou le falaoa i lena aso, sa ia faanoanoa faatasi ma i latou o e sa faanoanoa ma faamafanafanaina i latou o e sa manaomia le faamafanafanaga (tagai Mosaea 18:9), e ui lava ina sa lei iloaina le tala atoa. Ma sa faia ai se eseesega tele.