Sau, Mulimuli Mai ia te A’u
O Se Suiga o le Loto: “E Mafai Ea Ona Outou Lagonaina Nei?”
O le liua tumau e mafai ona avea ma a tatou pe a tatou manatuaina le Alii ma Lona agalelei ia i tatou.
Na tuuina atu e Alema le Itiiti nei fesili faatupu manatu i tagata i le aai o Saraemila:
“Ua fanauina ea outou faaleagaga i la le Atua? Ua outou maua ea ona foliga i o outou mata? Ua oo ea lenei liuga tele i o outou loto? …
“Ma o lenei faauta, ou te fai atu ia te outou, … afai ua oo ia te outou se liuga o le loto, ma afai ua outou lagona le fia pepese i le pese o le alofa togiola, ou te fia fesili atu, e mafai ea ona outou lagonaina nei?” (Alema 5:14, 26).
Sa ou ola ae ma auai i le Uarota Muamua a Ogden i Ogden, Iuta, ISA. Ina ua pe a ma le iva o’u tausaga, sa amataina e lo matou epikopo (o lo’u tama) le vaega o molimau o se sauniga anapogi ma molimau e ala i le talosagaina o tagata uma o le potopotoga e tuuina atu a latou molimau. Sa faaauau le fonotaga e pei lava ona talosaga ai [lo’u] Tama. Na toetoe lava o tagata uma sa auai sa tutu ma tuuina atu a latou molimau.
O le falelotu lea sa auai Elder Hales i le Uarota Muamua a Ogden a o laitiiti.
Ata pu’e mai faaaloaloga a le tusitala
O se mea taua tele lenei mea na tupu mo a’u. O molimau uma sa faigofie, tautino tonu, ma taulai atu i mea na iloa e tagata taitoatasi e moni e uiga i le Faaola ma Lana talalelei. I la’u maitau iai, na mafai e tagata uma ona lagonaina se liligiina ifo maoae o le Agaga. E le masalomia lava, sa ou lagonaina muamua le Agaga, ae sa i ai le Agaga i se auala ofoofogia i lena aso. Sa ou lagonaina se molimau mamana i le moni o le talalelei. I le mavae ai o nei tausaga uma, ou te lei faagaloina lava lenei aafiaga ina ua ou lagonaina le lotogatasi o le uarota ma le alofa o le Faaola.
Po o a lava o tatou uluai aafiaga i le mauaina o se molimau faamautuina o le moni o le talalelei a Iesu Keriso, e mafai ona faamanuiaina tele i tatou mai le fesili ifo ia i tatou lava, “Pe mafai ea ona [tatou] lagonaina i le taimi nei?” ona faia lea o so o se faasa’osa’oga o le ala.
Pe o tatou manatuaina ea mea na tatou oo i ai ma lagonaina ina ua tatou taliaina le talalelei a Iesu Keriso ma tautino atu e auauna atu ia te Ia ma tausi Ana poloaiga? Pe o tatou lagonaina pea …le Agaga o le Atua e pei o se afi … mumu”1 i o tatou ivi? O tatou naunautai pea ea i lo tatou avea ai ma soo?
Manatua ma Salamo
E fautuaina pea i tatou e le Tusi a Mamona ia manatua. Aisea? Aua a tatou manatuaina aafiaga faaleagaga ma lagona, o le a sili ona tatou maua le malosi sili atu e aloese ai mai le agasala ma faaauau ai pea i la tatou tautinoga e tumau i luga o le ala o feagaiga.
Ua ofoina mai foi e le Tusi a Mamona se faamalosiauga tele ia salamo. Ina ua uma ona maitauina le manaomia ona salamo o tagata, sa faamalamalama atu e Alema faamanuiaga o le faamagaloga o loo maua e ala i le Togiola a le Faaola ma ofoina mai lenei savali o le faamoemoe, lea e faatatau ia i tatou i aso nei:
“Faauta, o le Faaola ua auina mai se valaaulia i tagata uma, ona ua faaloaloa mai ia te i latou aao o le alofa mutimutivale, ma ua ia fetalai: Ia salamo, ona ou talia lea o outou.
“Ioe, ua fetalai mai o ia: O mai ia ia te au ma o le a outou aai ai i le fua o le laau o le ola; ioe, o le a outou aai ma feinu saoloto i le areto ma vai o le ola;
“Ioe, o mai ia ia te au ma aumai galuega o le amiotonu, ma o le a lē salaina ai outou i lalo ma lafo i le afi. …
“Faauta, ou te fai atu ia te outou, o le leoleo mamoe lelei: ioe, ma o lona lava suafa ua ia valaauina ai outou, o le suafa lava lea o Keriso” (Alema 5:33--35, 38).
Alofa i le Atua ma Tuaoi
Na faaauau e Alema ana aoaoga e ala i le fesili atu i tagata pe ua tafiesea i latou mai le faamaualuga ma le lotomataua (tagai Alema 5:28–29). Sa ia fesili foi:
“O i ai ea se tasi i totonu o outou ua faatauemu i lona uso, pe ua ia faaputuina i ona luga o sauaga?
“Oi talofa i se tasi faapena, ona ua lē saunia o ia, ma ua oo mai le taimi e ao ai ona salamo o ia, a leai, e lē mafai ona faaolaina o ia!” (Alema 5:30–31).
Ua aoaoina i tatou e Peresitene Russell M. Nelson e uiga i la tatou matafaioi o le taulimaina o isi i le alofa ma le faaaloalo ma ia aloese mai le faamasino atu ma le agaleaga. Sa Ia fetalai:
“E pei ona tusia i le Tusi a Mamona, … ua valaaulia e le Faaola “i latou uma ia o mai ia te ia ma taumamafa i lona agalelei; ma e lē teena e ia se tasi e sau ia te ia, e uliuli pe paepae, e pologa pe saoloto, o tane ma fafine; … ua tutusa tagata uma i le Atua” (2 Nifae 26:33). …
“ … Ina ua luiina [le Faaola] e se Faresaio taufaifai e faailoa mai le poloaiga silisili i le tulafono, o le tali a le Faaola sa sili ona manatua pea ma puupuu. Sa faatumulia i le upumoni lea e taitai atu ai i se olaga fiafia. O Lana faatonuga o le alofa muamua lea i le Atua ma o tatou loto atoa, ma, ia alofa atu i o tatou tuaoi e pei o i tatou lava ia i tatou (tagai Mataio 22:35–39).”2
E le gata i lea, o upu a Alema o loo aumaia ai se savali mamana ma tuusa’o e aua nei o tatou fulitua i e matitiva ma e le tagolima (tagai Alema 5:55). Nai lo lena, e tatau ona tatou fesoasoani atu ia i latou o e manaomia le fesoasoani. E taua tele lenei mea mo i tatou ia faatumauina ai se faamagaloga o a tatou agasala (tagai Mosaea 4:16–26) ma ia faaauau pea ona lagonaina le suiga ua aumaia e le Faaola i o tatou loto.
Ia Filiga i Faiga Faalelotu Faaletagata Lava Ia
O lo tatou ola ai i le olaga faitino e manaomia ai lo tatou savavali i le faatuatua. E i ai taimi e mafai ai ona tatou feita. E ono faaitaina i tatou e tagata o le aiga ma i latou tatou te mafuta faatasi. Atonu o nisi taimi tatou te lagona ai le lēlavā, gase, vaivai, fia moe, ma faaosoosoina i soo se itu. O tulaga i lenei lalolagi e ono afua ai ona tatou taumanatunatu pe moni “ua ata le tiapolo, ma olioli ana agelu” i lo tatou malaia (3 Nifae 9:2). Ona o nei tulaga ma tofotofoga, aemaise lava i nei aso e gata ai, o lo tatou naunautaiga mo le ola ai i le talalelei e mafai ona vaivai pe afai tatou te le filiga.
Ae e mafai ona tatou mulimuli i faiga faavae faalelotu e puipuia ai i tatou lava, e tusa lava pe faigata le olaga. O nei faiga faalelotu patino e taua i le faamalosia o lo tatou faatuatua, faatumauina o lo tatou gafatia e tetee atu ai i faaosoosoga, ma manatua ai o tatou aafiaga faaleagaga. Latou te fesoasoani ia i tatou ia tuputupu ae faaleagaga ma faatoilalo ia mailei a Satani.
O molimau a perofeta e toalua o aso e gata ai e uiga i faamanuiaga o nei faiga faalelotu patino e lua e taua tele:
Sa molimau mai Peresitene Ezra Taft Benson (1899–1994):
“O se tasi o mea aupito sili ona taua e mafai ona e faia … o le faatofuina lea o outou lava i tusitusiga paia. Suesue i ai ma le filiga. Taumamafa i afioga a Keriso. Aoao i aoaoga faavae. Ia atamai i mataupu faavae o loo maua ai i totonu. E i ai nai isi taumafaiga o le a aumaia ai ni vaega e sili atu. … E i ai nai isi auala e maua ai musumusuga sili atu. …
“… Pe a faatofuina e le aunoa ma le faifai pea e tagata taitoatasi o le ekalesia ma aiga i latou lava i tusitusiga paia, … O le a faatupulaia o molimau. O le a faamalosia tautinoga. O le a faamalosiauina aiga. O le a tafe mai faaaliga faaletagata lava ia”3
I le semina faaleautaitai o le konafesi aoao ia Oketopa 2019, na saunoa ai Peresitene Nelson: “I le faaiuga o le konafesi aoao ia Oketopa o le tausaga ua te’a, sa ou uunaia ai le Au Paia ia auai atu e le aunoa i le malumalu. Aisea? Ona o sauaga a le fili ua matuā faateteleina na’ua le saoasaoa, le malolosi ma le eseese. O le manaomia ona tatou i ai soo i le malumalu e le aunoa ua matuā sili ona manaomia i le taimi nei. Sa ou folafola atu i lena taimi, ma toe faamamafa atu i le taimi nei, o i latou o e faia e le aunoa se taimi ma le Alii—ia i ai i totonu o Lona maota paia—ma tausia lena fuafuaga, o le a maua vavega.”4
O Faamanuiaga o se Loto ua Suia
Na uunaia e Alema le nuu o Saraemila ia manatua le faatagataotauaina o i latou o e na muamua atu ia i latou. Sa ia uunaia i latou ia manatua le “alofa mutimutivale ma le tali-tiga” o le Alii i o latou tama ma ia manatua na Ia “laveaiina o latou agaga mai seoli” (Alema 5:6). Na suia loto o o latou tamā e ala i galuega, alofa mutimutivale, ma le alofa tunoa o Iesu Keriso (tagai Alema 5:7; tagai foi 2 Nifae 2:8). O faamanuiaga na e mafai foi ona tatou maua pe a tatou manatua le Alii ma Lona agalelei ia i tatou.
A o ou manatua lena sauniga anapogi ma molimau tulaga ese mai lo’u laitiiti, o lagona na ou maua ma fatu o le molimau na totoina i lo’u loto e le Agaga Paia e fesoasoani ia te au e manao ia avea ma se tagata sili atu i le taimi nei. A tatou mulimuli i le fautuaga a Alema e ala i le manatuaina o o tatou lava aafiaga faaleagaga, mulimuli ma le faamaoni i a tatou faiga faalelotu faaletagata lava ia, ma mafaufau loloto ma le lotomaualalo i mea uma na faia e le Faaola mo i tatou, tatou te faamalosia lo tatou gafatia e faamamalu a tatou feagaiga ma faalatalata atili atu ia te Ia.
Ua potopoto le autalavou matutua mo se gaoioiga i le falelotu o le Uarota Muamua a Ogden. O le tina o Elder Hales (itu taumatau, laina lona tolu, agavale mamao) ma le tama (itu taumatau, laina lona lua, taumatau mamao) na auai i le gaoioiga a o lei faaipoipo ia Oketopa 1949.