E Faapefea ona Tatou Maua le Malologa a le Alii?

Ua aoao mai e Alema le auala e mafai ai ona tatou saunia e ulu atu i le malologa o le Alii.

Ata

tamaitai o loo tatalo

Na valaaulia e le Faaola tagata uma:

“O mai ia te a’u, outou uma o e tigaina ma mafatia i avega, o a’u foi e malolo ai outou.

“Ia outou amoina la’u amo, ma ia outou faaa’oa’o ia te au, … ona maua lea e outou o le malologa mo outou agaga.

“Aua e avegofie la’u amo, o la’u avega foi e māmā ia” (Mataio 11:28–30).

I aoaoga fesootai i le Alema 13, na saunoa ai Alema e uiga ia i latou “o e na faamamaina ma ulu atu i le malologa o le Alii” (fuaiupu12). Ona ia faia lea o lenei valaaulia: “Ma o lenei, ou uso e, ou te manao ia outou faalotomaualalalo outou lava i luma o le Atua, ma aumai fua e tatau ai mo le salamo, ina ia mafai foi ona outou ulu atu i lena malologa” (fuaiupu 13).

Pe a tatou lafoai a tatou agasala ma salamo, e mafai ona faatumulia i tatou i le filemu ma maua le mafutaga faifai pea a le Agaga Paia. I fuaiupu28 ma le 29, o loo lisi ai e Alema ni auala e mafai ona tatou saunia ai i tatou lava e ulu atu i le malologa o le Atua:

Faamaualalo i tatou lava i luma o le Alii.
Valaau atu i Lona suafa paia.
Mataala ma tatalo e le aunoa e tetee atu i faaosoosoga ma ia taitaia e le Agaga.
Ia i ai le faatuatua i le Alii.
Ia i ai le faamoemoe o le a tatou maua le ola e faavavau.
Ia i ai pea le alofa o le Atua i o tatou loto.

Na aoao mai Peresitene Russell M. Nelson e faapea, o le ola ai i tulafono maualuluga atu a Iesu Keriso, e mafai ai ona tatou maua le malologa, toomaga, ma le filemu—e le na o le faavavau ae i o tatou olaga i le taimi nei. Na ia faamatalaina mai:

“O ē tausia feagaiga e aiā i se ituaiga faapitoa o malologa lea e oo mai ia i latou e ala i a latou sootaga faalefeagaiga ma le Atua. …

“Pe a tatou tauivi e ola i tulafono maualuluga atu a Iesu Keriso, o le a amata ona suia o tatou loto ma o tatou natura patino. E siitia e le Faaola i tatou i luga a’e o faaosoosoga o lenei lalolagi pa’ū e ala i le faamanuiaina o i tatou i le alofa mamā sili atu, lotomaualalo, agaalofa, agalelei, loto-pulea, filemu, ma le malologa.

“Ia, atonu tou te manatu e foliga mai o lenei mea o se galuega faaleagaga mamafa lava nai lo se malologa. Ae o le upumoni silisili lenei: e ui e manatu pea le lalolagi o le malosi, o meatotino, lauiloa, ma mea faafiafia o le tino e aumaia ai le fiafia, ia e leai! Latou te lē mafaia! E leai se mea latou te fofoaina ae ua na o se suitulaga gaogao mo ‘tulaga manuia ma le fiafia o i latou o e e tausi i poloaiga a le Atua’ [Mosaea 2:41].

“O le upumoni lava, e matuā sili ona faavaivai tagata le saili o le fiafia i nofoaga e lē mafai ona e maua ai!”¹